هلا وغلا وحياك الله .
اخوي ممكن تحدد لنا وين تبي تسكن بالضبط يعني بأي حي ؟
عشان نقدر نفيدك .

اخوي اذا تبي بوسط الرياض على ( شارع الريل ) بحي العمل فأنا اعرفلك فندقين توهم انتهوا من الترميم
واصبحت الفنادق كأنها جديدة ونظيفة وسعرهم مغري جدآ .
في عندهم غرفة مع الحمام ب 80 ريال بس الغرفة صغيرة مرة . وعندهم خدمة الوايرليس .
وفي عندهم غرفة كبيرة اعتقد 160 ريال .
والفنق الثاني عنده غرفة يعني مو صغيرة ولا كبيرة سريرين وحمام ب 100 ريال واحيانا ب 80 ريال .
بس المشكلة موقعهم بمنطقة عمل وعشان كذا الشارع دايم زحمة .
لي صديق اذا نزل الرياض دايم يسكن بأحد هذي الفنادق لأن خدمتهم جيده وغرفهم نظيفة وسعرهم مغري ومو شقق مفروشة لا فنادق .
وعندهم ايضا غرف وتختلف الأسعار على حسب الغرف .
بس انت حدد وين تبي تسكن بالضبط وان شاء الله اني افيدك باللي اقدر عليه .

بصراحه انا ما اعرف كويس بالشوارع بس الي اعرفه اهم شي ما تكون بعيده مره مثلا جهت السويدي و مدري الملز يعني تكون بالشمال او السليمانيه او المربع بس هي المناطق الي اعرفها بس عادي عطنا الي عندك و اسال وينها بالزبط
و مشكور اخ صلوح و الله ينولك الي ببالك

NOUF_O_BSS
حياك الله اخوي
بالنسبة للسويدي كلامك صحيح السويدي بعيد ,,,, بس الملز قريب ومن احلى الأماكن ويقع حي الملز بوسط الرياض .
والملز قريب من كل شي ,,,, قريب من العليا والسليمانية ومن اماكن الفلة وقريب من الاسواق
بس الملز الشقق اللي فيه مو على نفس الميزانية اللي انت ناوي تستأجر فيها .
وبالنسبة للشقق اللي بالشمال( العليا السليمانية ) انسى لأنها غالية .
وبالنسبة للمربع انت وين سكنت ؟ قريب من المتحف الوطني ( متحف الملك عبدالعزيز)
بشكل عام حي المربع دايم زحمة على طول اليوم وبآخر الليل السكان يعانون من قلة مواقف السيارات .
والله يااخوي ياليت توضح لنا ,,,, انت مثلا عندك عمل وودك تسكن قريب من عملك
او عادي تسكن بأي مكان ؟ غير جنوب الرياض طبعا .
اذا زحمة الشوارع ماتفرق معك وودك بسكن نظيف ورخيص انا انصحك تسكن بنفس الفنادق
اللي شرحتلك عنها واذا تبي تلفونات الفنادق والادارة تسمح لي راح احطها هنا .
الفنادق هذي بحي العمل بشارع الريل ,,,, ومن الفندق الى العليا ( مكان الفلة ) بتاكسي 10 بالكثير 15 ريال .
وتراها قريبة من سوق البطحاء 3 دقايق مشي على رجولك ,,,, وقدام الفندق مطعم للمأكولات الشعبية حلو ويمدحونه .
و مشكور اخ صلوح و الله ينولك الي ببالك
اللهم امين مشكور على الدعوة الحلوة ياغالي .

شكرا جزيلا ايش اسم الفندقين و تليفوناتهم الله لا يهينك؟

NOUF_O_BSS
هلابك ياالغالي
فندق العاصمة ت 014024121
فندق الوطن ت 014080604