بسم الله الرحمن الرحيم
أولا : كانت رحلتي من تاريخ 24 /07 /2006 حتى 24 /08 /2006 م
وكانت عن طريق خطوط الخليج (( الناقل البري )) والله أخترت انا هذي الخطوط لعدة أسباب
1- السعر كان معقول في نفس الفترة اللي كنت بروح فيها .
2-المواقف المجانية بحكم أني من سكان الخبر ((يعني جيران )) وأقرب لي من مطر الملك فهد الدولي .
3-وجود مكان شاغر بحكم أن جميع الخطوط الاخر مليانه في نفس الفترة اللي انا رايح فيها .
أشتريت التذكره من أحد المكاتب الصديقة (( لي فيها معرفة وبعدين زبون دائم )) بسعر 2200 ريال .
حولت لي بعض الدولارات وأخذت بطاقة الصراف والفيزة أحتياط ولحجز الفنادق بالفيزة في بعض
الاحيان رتبت الحقائب وهي عبارة عن 3 حقائب :
1- حقيبة ملابس داخليه ((ههه)) وخارجية عفواً حقيبة ملابس بالعربي .
2- حقيبة هدايا للمعارف والشباب الأندونيسي من تمر وأعشاب وملابس سعودية وبعض الهدايا الخاصة
مالكم فيها حاجة ((( مالكم فيها غرض))) .
3- حقيبة المؤون ((العزبه )) من تمر وقهوة ومكسرات خاصة وكيس رز المهيدب خمسة
كيلو وبعض المكرونا والمعلبات من إفطار وتصبيرات قبل الاكل وفتاحة علب تحتها خطين
حتى لا تنسونها وشطه كبيرة وبهارات وصلصل كل هذ الاشياء موجوده صحيح لاكن أسعاره
غالية مالها داعي تنساها .
وكل هذا طلع علي تقريبا 56 كيلو وللأسف في المطار (البحرين الدولي ) قالوا لي أنت متى شريت التذكره
قلت لهم من يومين قالوا كيف لقيت حجز قلت والله لقيت عادي قالوا والله أنك محظوظ قلت طيب والموفيد
قالوا والله مو لاقين أسمك في السستم قلت والله شوفي أختي مستحيل أرجع السعودية بد ما جهزة أغراضي وشناطي شوفي لي حل والا كلمي مدير الحجوزات قالت طيب وبعد تقريبا 20 دقيقة جات وقالت لي معليش تطلع مسقط عن طريق العمانية وبعدين تركب الطيارة الخليجية في مسقط وأنا نسيت أقولكم طبعا الخليجية ما عندهم رحلات مباشرة يعني لازم توقف في مسقط لمدة ساعة إلا ربع قلت مافي مشكله قالت طيب عطني شناطك قلت خذي قالت حبيبي عندك الوزن زايد قلت والله دامكم مخليني أروح عن طريق العمانيه تنازلوا عن الوزن قالت دقيه راحت وجات ((أدري مسوي زحمه )) ورجعت تبتسم قالت أنت رايح لحالك قلت أيه ليه قالت هذا انت لحالك شلون لو معك شباب ((ههه))
والحمد لله وافقوا على الوزن وركبت الطيارة ورحت عمان مسقط الله لا يوريكم المطار يفشل طبعا كبر مطار الظهران سابقا وماله داعي على العموم ما اطول عليكم رحت آخذلي شوية كافي وبعدين أعلنوا عن فتح بوابة العبور لجاكرتا رحت على نياتي بعدين عطيتهم التذاكر والجواز قالو ا وين تذكرة مسقط جاكرتا
قلت شلون عندك قال ياخي مش موجوده قلت والله مدري شكلهم في البحرين شالوها قال
الموجود عندي تذكرة البحرين مسقط بس وتذاكر العوده قلت ياخي ارجوك ((تكفى )) شوف لي حل
قال دقيقة نكلم البحرين وبعدين صحيح أكتشفوا ان التذاكر تبعي في البحرين قالوا خلاص مو مشكلها نخليك تروح بس بعدين خلك حريص ((( يبوني أكون احرص من موظف المطار يالله أوكيه ))):x1:
على العموم سافرت بحمد الله وبعد ثمان ساعات إلا ربع وصلنا لديرة العمة وسوف أكمل لكم التفاصيل الممتعة بعد ما أشوف الردود وأنتم تعرفون رحلتي عباره عن شهر 32 يوم يعني راح أخليها على عدة مراحل
عطوني الردود بارك الله فيكم وأنا بعدين أرد على جميع أستفساراتكم بالتفصيل الممل (((خبير عمة )) 6 رحلات وهذي السابعة مختلفة التفاصيل والظروف والتوقيت والمدة
أخوكم أبو شافي