دبي حالها حال اي مدينة في الشرق الاوسط .. الجو في الصيف يعتبر صعب من دون تكييف .. لما انقطعت الكهرباء عن جميع انحاء دبي .. اكيد الكل راح واستخدم البدائل .. بعضهم راح للفنادق .. لان في بعضها تستخدم مولادات خاصة بها في الحالات الطارئة .. والبعض في المراكز .. والبعض الآخر في السيارات .. واللي جلس في البيت في انتظار الكهرباء والبعض منهم تحول الى مدن أخرى .. الشارقة عجمان أبوظبي والكثير المدن .. وكان في تصريح من مسؤول ان العطل تدارك بشكل سريع .. ولكن تمت اعادة الكهرباء على فترات .. تفاديأ للضغط

عزيزي في سنة 1997 انقطع التيار الكهربائي عن مدينة باريس بأكملها و فرانكفورت في سنة 1999 ,, كما ان لندن تتعرض لفترات انقطاع في الكهرباء وهذه امور لا نستطيع تجنبها 100%
ماحدث في دبي كان نتيجة خلل في احد المولدات الرئيسيه ممى ادى لأنقطاع التيار عن دبي وأثر على الحياه اليوميه ولكننا نتفهم هذه الأمور وامكانية حدوثها .. واحد من الربع كان في الصالون يحلق ساير من الصبح عشان يفتك من الزحمه مسكين ماترقع !! سار الشارجه ايكمل الحلاقه
عموما يتم الان ربط امارة ابوظبي بدبي كهربائيا كما ان الشارقه وباقي الأمارات الشماليه سيتم ربطها تمهيدا لربط دولة الأمارات بشبكه كهربائيه واحده .. وشكرا

واحد من الربع كان في الصالون يحلق ساير من الصبح عشان يفتك من الزحمه مسكين ماترقع !! سار الشارجه ايكمل الحلاقه
ذكرتنا بالايام الخوالي في راس الخيمه لول

اما سالفة الحلاق ههه
لكن شي عادي يطفي الكهرباء لكن ما يطول لان فيه مستشفيات ومرضى يعيشون على الاجهزه

لقد انطفى الكهرب في مدينة نييويورك عاصمة المال والتجارة الدولية
فما بالك بدبي...
ولكن هل توجد مولدلات ضغط احتياطية في دبي مثل ما تصرفت باريس عام 1997؟

lanman نعم تداركت دبي تلك المشكلة وزادت من المولدات الاحتياطية الموجودة في العوير وعلى فكرة مشكلة انقطاع التيار الكهربائي عن دبي أوضح الكثير والكثير من معدن شباب الوطن حيث انتشر الشباب في مختلف الطرق لتنظيم سير المرور وللتعاون مع الشرطة والامن ورجال الدفاع المدني وظهرت مقدرة دبي الادارية الفذة في حسن وسرعة التصرف وهذا بلا شك مدعاة للفخر والحمدلله .

1. سالنا السيارات اللي هناك ،، قالوا لي متعطله ... اوف

والله انا صارلي موقف في دبي ..هو عادي بس في هذا المجال ينذكر .
كنت حاجز الى دبي في (اعتقد) 10/6 وسويت اموري تمام من مكتب السفريات ..

• حجزت سياره هوندا اكيورت
• حجزت فندق القصر في مدينة جميرا
• حجزت تذكره دوحه - دبي -دوحه

وكل شيء تمام ،، وطبعا رايح دبي اجازة ويك اند وذلك احتفال انا وزوجتي بمرور سنه من زواجنا في 12/6/2004 والحمد الله رزقنا الله ببنت وكانت تبلغ من العمر ( شهرين).
وكانت الرحله مفاجأه لها ( لزوجتي) بدون ما تدري .. بهذي المناسبه .
المهم طلعنا من الدوحه وكانت الرحله الساعه 8 صباحا تقريبا .. ورحنا المطار ومعانا ريم بنتي طبعا ...
وخلصنا حجوزات المقاعد واخر وناسه وضحك الخ ..
وكنت اقول حق زوجتي قبل ما نسافر راح تظلم الدوحه عقب نسافر وراح تنور دبي بوصولنا ,,
المهم ركبنا الطياره وطرنا ووصلنا دبي في غضون 40 الي 45 دقيقه .. وكانت من اجمل الرحلات لوجود بنتي معي وهي اول سفره معانا ) ..
وصلنا مطار دبي .. ومشينا فيه الا ان المصاعد متعطله , وانا شايل بنتي في يدي .. قلنا يالله سلالم متحركه .. الا السلالم متعطله ,, ونصوت على العامل ونقوله افتح السلم الكهربائي ( قال / ما فيه شغل ) قلنا ما عليه ,, والله نزول من سلم الى سلم لحد ما هلكت انا وزوجتي انا من حمل البنت وخوفي اني اطيح لاني ما اشوف العتبه لما انزل لاني شايل البنت وبكذا وضعيه ، وزوجتي اتعبت لانها توها طالعه من الاربعين ومشاكل الولاده ..
المهم كل ما ننزل الا الظلام يزيد ويزيد .. ويزيد وخبركم شايل البنيه وسلالم .. لحد ما وصلنا الطابق الارضي وخبركم الطابق الارضي لحد ما توصل الكاونتر يبيلك كيلوا ونص تقريبا ،، وخاصة السيور الكهربائيه متعطله (((( طبعا كل هذا ولا ندري ان الكهرباء منقطعه عن دبي )))))

سالنا السيارات اللي هناك ،، قالوا لي متعطله ... اوف

وكملناها مشي .. لحد ما عضلت وعضلت ايدي ..والحمد الله وحنا نمشي بعض السيور كانت تشتغل والسيور اللي تشتغل حولها اناره .. وانا اقول حق زوجتي اش فيهم مطفين الليتات .. تقول زوجتي يمكن ما يبغون يسرفون في الكهرباء..؟؟؟؟؟؟؟
لحد ما وصلنا نهاية الممر ( الطابق الارضي ) الا بعد لازم نطلع فوق مره اخرى .... والله المستعان ...
المهم طلعنا فوق وبعد يبيلها مشي .. لين وصلنا الكاونتر ومسكين الرجال اللي خلصنا قال الله يعينك ... لانه شاف العرق يتصبب ..وانا لحد الحين مو عارف شالسالفه ...
رحت صوب الشنط .. واخذ الشنط ، واخذ القاري حق البنت ،، واشوفه كني شايف السعد وافتح القاري واحط البنت فيه ،، واندز العربه ( القاري ) وفيه البنت ، وانا ادز الشنط .. ولما شافنا مال الجمرك التفتيش قال روحو بدون تفتيش ،، لانه شافني الحاله حاله والعرق يتصبب صب .. والكشخه راحت في عين امها .... ((( وهذا كله وانا مادري ان الكهرباء طافيه )))
المهم اروح مكتب ايجار اليارات واخذ سيارتي اللي انا حاجزها ،،، وكان يسجل على ورقه ، قلت له ما فيه كميوتر ،، قال لا الكهرباء كلها طافيه عن دبي ..!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!
قلت حق زوجتي يوم جيتي انتي والبنت نوركم طفا الكهربه ....ها هاه هاهاهاهاها
واخذنا السياره ،، ورحنا الفندق وطبعا الزحمه اسكت وبس والاشارات طافيه والحاله حاله .. عاد انت وسواقتك تمشي ..
الحمدلله وصلنا الفندق دخلنا الفندق الا بعد الكهرباء طافيه والشيك ان والشيك اوت متعطل ، رويتهم الحجز قالوا الكهرباء طافيه وانتظر ... وهناك فطسه حر وخفت على البنت وهي صغيره ..
وقلت حق المره يالله السياره ،، والله دورنا شجره كبيره والحمد لله عندنا كميرا فيديوا واخذنا نصور انقطاع الكهرباء وزحمة السير وتعليقات عن مناسبتا ،، يوم زواجنا ؛؛؛ واقول خوش رحله ....
قعدنا تحت شجره لمده ساعتين تقريبا ومكيف السياره يبخ علينا .... والمصيبه ان البنيه تبغي تبديل بابرز ،، وقلت حق المدام دبري نفسك ....
واخيرا الا اشوف انوار بعض المحلات افتحت وايقنت ان الكهرباء افتحت ...ورجعه الفندق واقول لهم ،، قالوا لحد الحين ما افتحت عندنا .. وانتظر نص ساعه عندهم وافتحت الكهرباء ..
وجيت استكمل الحجز قالوا انتظر لان الغرف فول وننتظر الناس يطلعون شيك اوت ... ومهاوش ومهاوش ,, بس شالحيله .. وانتظر في اللوبي ومن ثم ذهبت انا والمدام المطعم وتغدينا لين وصلت الساعه 3 عصرا ورجعت للحجز الاستقبال ’ قالوا انتظر نص ساعه ينظفون الغرفه ...
ويالله عدت على خير هالنص ساعه ....
بس بصراحه الفندق رهيب رهيب
فندق القصر ( مدينة جميرا )
وهذي حكايتي ..

وكنت اقول حق زوجتي قبل ما نسافر راح تظلم الدوحه عقب نسافر وراح تنور دبي بوصولنا ,,
قلت حق زوجتي يوم جيتي انتي والبنت نوركم طفا الكهربه ....ها هاه هاهاهاهاها
وربي مت من الضحك :36_11_6:
والله اكيد هذي اطرف قصة صارت لك في دبي ههه الله يعينك ولا والمشكلة جاي تحتفل بذكرى زواجكم بعد يالله ماعليه تعيش وتاخذ غيرها ..
والحمد لله عندنا كميرا فيديوا واخذنا نصور انقطاع الكهرباء وزحمة السير وتعليقات عن مناسبتا ،، يوم زواجنا ؛؛؛ واقول خوش رحله ....
والله احسن شي سويتوه وكان ودي نشوف هاللقطات معاكم لكن خلاص كافي علينا نتخيل ..:36_1_21:

انا سعيد بردكم على الموضوع