ابشركم زان الخط معي وضبطت اموري ... لعيونك ياعراف ودعواتك صلح من نفسه
انا قلت لكم من قبل وارجع واقولكم احنا عيله تحفه وقصتنا قصه].. خلصنا من البواب بقولكم قصة عمتي ...
عمتي هذي ياطويلين العمر والسلامه .... ماتواطني بعيشة الله والذنب مو ذنبي ذنب اختي الي اكبر مني ...
خطبتها لولدها ورفضته اختي !!!!! ودارت الايام وولدها الثاني قال لعمتي ابي بنت خالي الي هي انا طبعا رفضت والسبب عندها سببين الاول ان اختي رفضت ولدها والسبب الثاني اني عوبه وقويه وراسي يابس عجز ماعندهم الا البربرة ( طبعا هذا رائيها الشخصي والا انا غير (وحدة تزين مسادحها )خ
شاءت الاقدار انها تروح معانا مصر راحت معانا ومعاها وحده من بناتها وواحد من عيالها اصغر مني .....
وسكنو معانا بالشقه ياليل .... واحنا ناقصين وجع راس ..!!!!
وهي طبيعتها حقنه الله يرحمها ويبيح منها (اذكروا محاسن موتاكم ) خ وربي اني ماستحي
انا بيني وبين بنتها صداقه يعني سمن على عسل بس بعد السفرة اكتشفت شي ثاني اقولكم عليه بعدين
المهم هذي من ضمن السفرة الاولى الله واكبر على هالسفرة العيله كلها ناشبه رايحين حفاله خ
ابوي كان حبيب معانا ويقال له يبي يمشينا قال في مكان اسمه الباشا بوديكم له مكان حلو واكل لذيذ (طبعا هالكلام زمان قبل يخرب اكل الباشا )
فرحنا ورحنا انا وخواتي وامي وعمتي وبنتها وولدها واخواني من جد عيله مزركشه خ
اصلا لو شفتو طاولتنا من كبرها تقولون عندنا عرس مختصر خ وربي انفشل لا ورازين نبي احلى طاوله وعند البست يعني شاهر يابو ظاهر
انبسطنا وعلى قولة المثل لاتدلي البدوي باب بيتك كل ماسالنا ابوي وين تبون قلنا الباشا حسافه ماكتشفنا السرايا ولا فتح دار القمر
يعني عنز بدو طاحت بمريس خ الين جاء يوم وابوي زهق وذا العجز معنا يفشلون وابوي طايرة بوهته بذا البني الغرانيق خ شكله تحسف يوم اخذ امي ههه
وقال خلاص مافي باشا ولاغيره ريحو !!!! في هالفترة بنت عمتي الثانيه توها واصله مصر وانا واختها نسولف لها عن الباشا وانها تجنن خبركم ماشفنا خير وكنا بقرة وطلعنا برة خ
قالت خلاص اعزموني فيها اليوم قلت انا بقول لابوي وهو مايرد طلب لي لان بنات عمتي يستحون منه وبعد الغداء واحنا نتقهوى قلت يبى نبي اليوم نعزم بنت عمتي بالباشا ....قال مافي لاباشا ولا غيره وبنات عمتي جنبي يقبصوني يبوني الح عليه وكل ماقبصوني الحيت زياده .. تكفى يبى الله يخليك طلبتك عشاني اذا لي خاطر يمكن ساعه وانا الح وهو يسكر الموضوع وكل ماهجدت اقبصوني وانا استرسل الين صرخت فيني عمتي باعلى صوت
خلاص صجيتينا واقلقتينا قالك مافي روحه يعني مافي روحه ماتفهمين وانا ساكته مبهورة بصرختها بينت انه فيه غل وحرة علي وتلتفت على ابوي قالت عاجبتك حنتها عليك والله لو تهابك وتخاف منك كان من يوم قلت لها لا اسكتت مهوب توجع روسنا بحنتها
وبناتها ولا كلمه والتفت عليه وانا خانقتني العبرة قلت لها ترى الروحه لبنتك مو لي قالت بنتي توها جايه وانتي الي بتعلمينها الدجه وتخنقني العبرة واروح غرفتي اصيح اصيح واسمعها تلجلج على ابوي معطي البنات وجه ومدلعهم ماعاد في لاحيا ولا مستحى
طبعا ابوي يبي يلطف الجو مهما كان اخته ... قال اليوم بعزمكم في مطعم حلو انا خلاص لما تقفل معاي تقفل خلااص ... جاووني بناتها يعتذرون وتكفين لاتزعلين وامي تعبانه ومريضه وامسحيها بوجهنا (طبعا من الواضح ان انفجار عمتي علي نتيجة رواسب وتكتلات وعوامل تعريه تجاهي خ )
ماعلينا حاولو حاولو كلهم انا عندت ماني طالعه قالو البنات احنا بنطلع مع اخونا نتمشى ونغير جو قلت لهم انا بأأأخذ ابوي وبطلع (نحاسه الله لايعاقبني ) بس خذو امكم معاكم اذا تبوني ارضى
هي الله يرحمها قالت اذا اخوي بيطلع ابطلع واذا بيجلس ابجلس ياليل كانها تعرف نيتي اني باخذه وبطلع
بعد محاولات من عيالها اقتنعت وطلعت معاهم وهي ماودها .... رجعو بالليل ووجيهم مصفوقه كانه صاير لهم شي قلت لهم وش فيكم طبعا البنات عمتي تكابر
قالو اول شي بنسالك انتي دعيتي علينا والا الله يمهل ولا يهمل افا عليكم انا ادعي على عمتي وبناتها
قالو جلسنا تنمشى مع السواق واقترح علينا نركب حنطور وهم عددهم 4 ومنهم 2 من الوزن الثقيل يقولون اول مانزلنا الكوبري طبعا الحنطور مع النزله يسرع الا وتنفك علينا العجله اليسار
وصرنا مايلين والحديدة تحك الاسفلت ورحنا كلنا على جنب كان الكرتة بتنقلب من وزنا وحملنا وهم يصارخون من الروعه وعمتي تصارخ حوبة بنت اخوي حوبة بنت اخوي وتتشهد اشهد ان لااله الا الله واشهد ان محمدا رسول الله (وش دعوة داخله حرب كلها كفر وطاح خ ) وتقولهم ان مت قولو لبنت اخوي تحللني وتسامحني طبعا هي فكرت لو بتموت بتموت جلطه من الروعه مو من الكفر ...
الين وقفت الكرتة وهم مافيهم عرق ينبض وكربو السيارة والحياة حلوة وحلاة الروح احلى ويوم حست عمتي بالامان قالت اسمعو ياويلكم ياسواد ليلكم تقولون لبنت اخوي الي صار تتشمت علينا قالو لها انتي تقولين خلوها تسامحني وتحللني قالت وانا بالحنطور مو الحين واستمرت عمتي بالترصد لي بالكلام ورجعت مع رجعت ابوي الي عقبها استفلينا وانبسطنا ( شكل الدجه الي دجيناها اول سفره نتيجة ضغوطات ومعاناة خ فجاتنا ردة فعل خ) طبعا عقب مارجعنا طلعو بنات عمتي على حقيقتهم اثاريهم كانو يزينزن مسادحهم عندي
توفت عمتي الله يرحمها ويبيح منها بعد هالسفرة ب 8 سنين بس كنت انا وياها صحبه وربع وماكنت ازعلها وهي ماكانت ترضى علي بكلمه
الله يرحمها ويدخلها الفردوس الاعلى ويرحم جميع موتى المسلمين اللهم امين وصلى الله وسلم على سيدنا محمد وعلى اله وصحبه اجمعين
تحيات ي لكم وتابعوني