د.مصرقع
11-04-2022 - 01:30 pm
أول شي السلام عليكم ورحمة الله وبركاته
بداية أشكركم من صميم قلبي على أجوبتكم مقدماً
بسدح لكم كم سؤال وأتمنى من خبراء تايلاند الإجابة ...
وأي عضو يشوف انه بيفيدني بكون له شاكر من كل قلبي
بس معلومة بسيطة بقولها لكم .. انا ما عمري طبيت تايلاند
ونويت هالسنه أشخط لها في شهر نوفمبر ..
فالسؤال الأول اللي يسدح نفسه ..
كيف الزحمة في هالشهر ؟؟
وكم نسبة أشغال الفنادق ؟؟
أنا قريت من عضو خبير في تايلاند الظاهر اسمه ابو بدر يقول هالشهر زحمه ..
فياليته إذا كان يقرأ سطوري الأنيقة الحين يجاوب ..
ليه زحمه وكل البشرية مداومة وتوها راجعه من الاجازة؟:112:
ونسيت أقول لكم إن إجازتي ثلاث أسابيع وناوي أسافر - تايلاند- كوالالمبور - بالي
فحبيت أتأكد من معلومة سمعتها وهي .. انه فيه قطار يطلع من بانكوك إلى كوالالمبور ..
فيه أحد جربه ؟؟ أو سمع عنه ؟ أبي أعرف كم المسافه والوقت اللي بيقطعه بين العاصمتين؟؟
والمناظر حلوة؟؟ والقطار حديث؟؟ والا مثل خط البلدة اللي عندنا اللي يطلع من الدمام - بقيق - الهفوف - الرياض مروراً بحوشة الخرفان والبعارين اللي بين هالمدن ؟؟
وكيف التايلانديين يعرفون عربي والا لا؟؟
لأني بخٍ بخ بالانجليزي .. !!
وترى هالفنسان مهوب أزين منّا .. هذاهم يجون عندنا ولا يعرفون لا عربي ولا انجليزي وأمورهم ماشيه
وفيه سؤال يسدح نفسه بقوة أتمنى منكم كلكم تجاوبون عليه ..
ليه الواحد منكم ( في الغالب ) لما يرجع من السفر ويسدح تقريره ما يدعمه بالأسعار؟؟
أو خايفين أحد يرد عليكم ويقول هكّوا عليك وعطوك سعر غالي؟؟
أكثر تقاريركم ما تتكلم عن الأسعار الا في شي واحد بس ..
لما الواحد يدخل منتزه أو حديقة يجي طاير يقول قيمة التذكرة ب كذا ..
طيب ورااه ما تكمّل خيرك وتعلمنا بكم سكنت وبكم تعشيت وبكم هيّصت؟
أتمنى منكم تسدحون أجوبتكم وانا بانتظاركم ..
د.مصرقع
ياخى ما راح تفيدك اسعار الفنادق لانه الاسعار تختلف من شهر الى شهر وتقدر تشوفهم من النت
وبعدين منو قالك انه الاخوان مايذكرون اسعار الفنادق يمكن انت ماتابعت تقاريرهم اما اسعار الحدايق والرحلات ثايته تقريبا