أكتشف العالم بين يديك
المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة.
artravelers.com ..
مرحبا بأعضاء المنتدى واشتقنا لكم مره
عدنا من مصر بعد رحلة استمرت تسعة ايام بحمد الله وكانت رحلة جيدة استمتعنا بها مع وجود بعض المنغصات ولكنها كانت عموما ممتعة
واكمل معاكم جدول رحلتنا في الايام الجاية ان شاء الله
الله يسلمكم جميعا
سافرنا على طيران الامارات عن طريق البحرين- دبي- القاهره وبصراحه الخطوط رائعه دقة في المواعيد وراحة في الطائرة ومتعة للاطفال حيث يشاهدون أكثر من اربعين قناة فيضيع عليهم الوقت ومايحسون فيه ويقدمون لهم هدايا في بداية الرحلة
سكنا في فندق ميرديان الهرم لاننا مالقينا فندق خمس نجوم فاضي بوسط البلد بس بصراحة الفندق رايق وهاديء وفخم اكثر سكانه اجانب اخذنا غرفتين لنا ولعيالنا سعر الغرفة الواحده حلو 120 دولار
تعاملنا مع سائق باليوم وكان ياخذ 150 جنيه يوميا وبصراحه اريح من التاكسي والمكاسر معهم وعوار الراس وهو شخص محترم اسمه (بو محمود) واذا بقيتوا رقمه عطيتكم اياه
الماجيك لاند : وهي مدينة اكثر من رائعه الدخول لها ب50 جنيه شامل بعض الالعاب وعرض الدلافين وجوله بالباص على مدينة الانتاج الاعلامي مع انها كانت سريعة جدا ودخول السينما وكان فيلم( العيال هربت)
الاهرامات: اخذنا كرتتين لدخول الاهرامات والتجول داخلها سعر الكارته الواحدة250 جنيه وهذا ارخص سعر لقيناه مع اني احس انهم نصبوا علينا- بس كانت جوله حلوه وشفنا ابو الهول وخمس اهرامات ثلاثه كبار واثنين صغار وبعدين ودونا محل عطورات صغير فيه دكتورة تتكلم عن عطوراتهم الفرعونية وشممتنا اكثر من واحد وكان فيه عطر اسمه زهرة اللوتس ريحتة تجنن شرينا منه بس انتبهوا الاهرامات تغفل الساعه اربعه يعني يبيلكم تروحون لها من الظهر بدري شوي عشان تنبسطون فيها
مدينة الدريم لاند : مدينة العاب وملاهي راقية والعابها حلوة بعضها خطيرة للكبار وبعضها للصغار وفيها مطاعم ومقاهي رايقة- وفيها محل تصوير حلو يصور باللبس البلدي او الفرعوني مع اكسسواراتهم صورنا العيال وكانت صور جميلة جدا الدخول للدريم لاند 50 جنيه للشخص الواحد
خان الخليلي والحسين : مكان مزدحم جدا جدا وازعاج وكتمه فيه بيع لاكسسوارات وتحف و كله قهاوي بس ماطولنا فيه لان العيال تضايقوا من الشحاذة والصراخ والازعاج جلسنا شوي تقهوينا ومابقى بياع او شحات ماجاء،اذابتروحون لها بدون اطفال اريح واحسن
مركب الغراند حياة : الفندق والمركب اكثر من رائع، وهو مكان فخم وراقي لابد من الحجز قبله بيوم او اكثر ، طبعا احنا حجزنا بالنهار لانه اهدى ولافيه راقصات او خرابيط وسعر البوفيه بالغداء للشخص140 جنيه وبالعشاء الظاهر ب240 جنيه لوجود مطرب وراقصة، والبوفيه للغداء لذيذ جدا والخدمة رائعه ثم صعدنا على ظهر السفينة تقهوينا وكانت المناظر خياليه والجو روعه وكانت مدة الجولة ساعة ونصف من الساعة خمس ونص الى الساعة سبعه- وبعدين رحنا الكوفي شوب الي في فندق حياة رجنسي جنب غراند حياة وكانت جلسه حلوه مره والهواء عليل
سوق كرداسه : وهو سوق شعبي كله جلابيات نسائية وجلاليب رجاليه واسعارها معقوله بس الله الله بالمكاسر
المتحف المصري: يقفل الساعة سته وسعر الدخول له 10 جنيه ،وشفنا التماثيل والمومياءات ورمسيس الثاني وكان يخلو من العرب للاسف واكثرهم اجانب
مجمع ستي ستارز: وهو مجمع كبير مرة ومزدحم جدا فيه محلات وملاهي اطفال وسينما ومطاعم متنوعه ويبقى له يوم كامل تقريبا
القرية الفرعونية : تقفل الساعة 11 وسعر الدخول لها120 جنيه للشخص شامل العشاء ركبونا قارب مررنا على القرية وشفنا صناعاتهم القديمة وكيفية التحنيط وتماثيل لملوكهم والهتهم ايام الفراعنة وبعد كذا نزلونا مع مرشد وكانت بصراحة رحلة مملة جدا ولافيها متعة وسعر غالي مايسوى وكله بعوض وناس مش فاهمة مسوية نفسها مرشدين واكل الله يعز النعمه ماينوكل وهذا كان انطباع كل اللي قابلناهم هناك
برج القاهرة : الدخول كان 80 جنيه مع العصير المعلب او 100 جنيه بالاكل في المطعم الدوار- المنظر من فوق البرج اكثر من رائع ولكن الماسآة في انتظار المصعد الصغير جدا وانحشار مجموعه من الناس فيه بالصعود والنزول وعدم الاهتمام بهذا المعلم الرائع
ملحق هيلتون رمسيس : اول مادخلنا فيه حسينا اننا في دولة خليجيه كله خليجين وللأسف استعراضات من الخليجيين والخليجيات -الله يهديهم- والسوق اكثره جزم وشنط تقليد للماركات وقمصان رجالية وهو حلو للتسوق
سوق طلعت حرب : وهو سوق مفتوح ايضا اكثره جزم وشنط واسعاره مناسبه وبضائعه حلوة
محل عمر افندي : وهو محل مكون من سبع ادوار منوعه عجبني فيه القطنيات المصريه والبجامات والفوط --- واسعارها نفس اسعارنا تقريبا
بعض المطاعم اللي زرناها وعجبتنا :
مطعم المنوفي : مشوياته وحمامه المحشي لذيذة وجلسته عادية بس نظيف وزحمة قرية فلفلة : مطعم اكله لذيذ وفيه ملاهي للاطفال واركان للبيع- وفيه قاعة داخلية فيها مطرب مادخلناها طبعا وكانت زحمه جدا بسبب المغني اللي فيها الشبراوي : عنده سندويشات طعميه وشاورما وفول لذيذة كافتيريا نعمة : ايضا سندويشات حلوة ومزدحم مرة مطعم قدورة : وهو مطعم بحري يجنن اكله مرة ونظيف مرة ومرتب وواسع لانه ثلاث ادوار كشري بوطارق : يقولون انه اطعم كشري في القاهره وبصراحة فعلا لذيذ السينمات : عندهم سينمات كثيرة احنا رحنا سينما جالكسي والتحرير وسيتي ستارز والماجيك لاند والشيراتون وكلها مرتبة وحلوة واسعارها من 20 الى 25 جنيه وشفنا افلام حلوة واكثرها تموت من الضحك والافلام اللي شفناها :
العيال هربت- حليم-ظاظا-وش اجرام-جعلتني مجرما-واحد من الناس.
ارجو اني مااكون طولت عليكم وانكم تستفيدون من هالمعلومات ولو ان في المنتدى مواضيع احلى وارتب من موضوعي ، وبالنسبه للصور فأكثر تصويرنا كان بكاميرا الفيديو وبقية الصور اغلبها عائلية بس ان شاء الله خلال الايام الجاية بنزل بعض الصور اللي صورتها بكاميرا الديجيتال وبمساعدة اخوي لان ماعندي خبرة بتنزيل الصور واذا احد عنده سؤال او استفسار انا حاضرة ودمتم
