الحمد لله علي سلامتك
وبأنتظار تفاصيل تجربتك...

الحمد لله على السلامة ومنتظرين تقريرك بفارغ الصبر

مشكور اخوي نواف وفايق الرايق وانا الان ابأجل بعض اشغالي ولا اريد التاخر عليكم لان هناك اناس يريدون المعلومات قبل سفرهم لان الصيف قد ازف على الرحيل والدوامات قادمة لا اطيل عليكم واليكم التقرير :
كانت رحلتنا على الخطوط التركية وهي ممتازة وليست كما يقول البعض حتى الطاقم لم نجد منهم الا كل ترحيب فقط الملاحظة انك اذا طلبت شي يتاخرون قليلا في احضارة وهذه غير مهمة مقارنة بالاشياء الاهم
وصلنا مطار اتاتورك في الساعة السادسة صباحا وفيزنا وختمنا الجوازات بعدها اتجهنا نحو بوابة الخروج من المطار ويبدأ كالعادة ( تلقي الركبان ) وهم العرب والمتكلمين العربية يعرضون اسعارهم وخدماتهم وكل ما مشيت خطورة تلقى واحد وانا مطنش ولا التفت على احد حتى ان واحد قالي اوصلك تقسيم ب 60 ليرة قلت له القى ارخص بالخارج وهو يمشي معي حتى وصل سعر 30 ليرة قلت في نفسي والله ما اخذك حتى لو لقيت اغلى منك وانا عارف ان اللي بالخارج بحدود هالسعر اخترت تاكسي وركب الشنط وقالي ب30 قلنا يالله وصلنا تقسيم وكان الجو غائم والمطر توه واقف والشوارع مبللة وصل العداد 28.5 ليرة واعطيته 30 حسب الاتفاق دخلنا فندق كارتون ( وكان شور اخوي هاشم الطيب ) فندق حلو صغير والغرف صغيرة نوعا ما لكن العيب الوحيد بالفندق ان الحواري اللي خلف الفندق حواري خطرة حتى شكلها مخيف مباني مهجورة كانك بالغالة حتى كنت اقول للمدام يوم تمشينا تحت اقولها هالاماكن شكلها شبهة وفعلا صدق توقعي بعد يومين اخذنا سواق كان معي رقمه من صاحبي وهو امين وقالنا من اللي حجزلكم بالفندق ما يصلح لكم لانه يقع خلفه منطقة السرق والنهب والمخدرات وهو مرتع للصوص وقطاع الطرق ومن يوم قالنا هالكلام وحنا نمشي بترقب وخوف بعكس اول ماوصلنا لاننا ماندري اننا في منطقة علي بابا اخ . والحمد لله ان بقالنا يوم ونص في هالفندق والحمدلله اني ماحجزت فيه الرجعة من بورصة والا كان ياليل ماطولك واخر يوم بالفندق وانا رايح امشي المعزبة رجعنا من الاستقلال الا وانا واقف عند اشارة المشاه والتفت بالخلف الا واحد واقف ورانا وحنا ماحسينا فيه ابدا وشكلة مريب وعليه سلسلةمسكت المدام زين طبعا هي راس المال قلت للمدام امسكي شنطة اليد زين يوم شافني انتبهت له تعدانا وراح قدام وجا معاه واحد من السود ودخلو الحارة الي خلف الفندق قلت الحمدللة فكنا الله
في وجودنا باسطنبول اخذنا سواق اسمه ابو مصطفى رجال كبير ومحترم غير الاولي لا وبارخص من الباقين وسيارته حلوة ويعرف كل الاماكن ودانا على مولات وتل العرايس والملاهي واماكن اخرى تعبت من الكتابة بس اريح شوي واسرد عليكم الباقي وقصص الاستغلال اصبرو شوي وتشوفون ..،،،،،،،،

هلا بك عربي حر والله يسلمك من كل شر ( حلوة تكون مطلع قصيدة ههه ) وين حنا وصلنا ايه نسيت اقولكم ان العرب هناك لا تصدق ولا واحد منهم خصوصا من يعرض عليك ان اسعاره مناسبة وانك لن تجد مثلي ومن هالكلام لاني لقيت الوان من الاحتيال بس بفضل من الله ما لقيتهم بال مع العلم ان المدام تقولي خلنا ناخذهم لاننا ما نفهم على الاتراك سواقين التكاسي قلت لها ما يهمك انتي استمتعي بالرحلة ودعي القيادة لنا ، نعود للمهم فيه بجواهر مول مدينة ملاهي حلوة وفيها قطار الموت والسفينة والسيارات ودانا سواقنا للمتحف الاسلامي بس من سوء الحظ ان القسم الذي كان فيه شعرات من لحية الرسول صلى الله عليه وسلم وعصا موسى كان مغلق للترميمات وقالو بيفتح برمضان واخذنا رحلة بالبسفور ومرينا من تحت الجسر المعلق وكان منظر رائع .
الان قرب انتقالنا إلى بورصة وسبحان الله كأن هالعرب يعرفون بمخططك فهذا عربي عرض على الانتقال من اسطنبول إلى بورصة مع قروب بس يودوني الفندق في بورصة وهم يكملون البرنامج ب 50 دولار للشخص الواحد ( قف هنا نصب واحتيال ) كشفهم الرادار ،، قمت انا وحسبتها براسي مو معقولة 100 دولار على تذاكر السفينه وباصات إلى بورصة لا وازيدكم من النصب بيت واحد اسمه حسن عرض علي انه يجي معنا ويركب الباخرة والتكاليف علي انا إلى ان يوصلني الفندق وياخذ 50 دولار وما بقى إلا يقولي عطني تكاليف الرجعة يعني شايفنا عميان وكلهم يقولون هالعبارة ( انت بتروح بورصة وبتتعب صدقنا بتتعب كثير وباصات وماتدري وين الميناء وقص تذاكر ما تعرف و ) حتى ان زوجتي قالت والله شكلها تعب ومشقة حتى انا قمت افكر اني اقولهم خلوها ب 40 دولار للشخص ونروح معكم بس تعوذت من الشيطان وقلتلها لا تخافين ان شاء الله اللي اعاننا وانتقلنا من سويسرا إلى النمسا بالقطارات وذاك اليوم العصيب بيعيننا وانا كنت مرتاح لان المسافة لبورصة قصيرة وفعلا وصلنا التاكسي لميناء ياني كابي ولاقانا واحد عربي ياله النشبة وقالي ان الباخرة فل مليانه فاذا تبغاني اقصلك تذاكر بمعرفتي ( قف هنا نصب واحتيال) قلت له انقلع اذا ما لقيت ارجع لك وقصينا تذاكر التذكرة ب 12 ليرة ارخص وركبنا الباخرة وساعة وحنا بيلوا ثم باص ب7 ليرة ثم تاكسي ب 13 ليرة بالله احسبوها تلقونها بحدود 45 دولار لشخصين وهالعرب الجرب بيودوننا ب 100 دولار وصلنا فندق الميرا ببورصة فندق حلو وفخم بس انا آرى من خلال جولاتي ان فندق كيرفنساري افضل من حيث الاسواق الي حوله وانا بفندق الميرا تذكرت كلام اخوي الكويتي يوم اخذ محمد الصقر وقلت يمكن يكون محمد هذا متعامل مع الفندق وطلبت من الاستقبال رقم شركة سياحية ودق لي واخذت السماعة والا هذا محمد الصقر اخذت جواله وحجزت على اربع رحلات كل يوم وحده بس كل يوم احجز من راس محمد يعني ما احجز من المندوبين الي يروحون معنا بالرحلة فيطلع لي السعر ارخص وهو ما قصر اعطاني سعر رهيب رحنا معهم كل شي الشلالات الكبيرة والصغيرة وحدائق الطيور والمصانع الجلود والحرير والمناشف ورحنا الجبل والتلفريك وتقضينا اغراض حلوه وكانت مواعيدهم مرة مضبوظة بالمرة ، ورحنا الشجرة الحزينة والقرية القديمة والسوق الاخضر ومبيعات العسل وصلنا لنهاية ايام بورصة ،، هناك نصيحة دائما حاول السفر بين المدن بغير ايام العطل حتى تتجنب الزحام . وجاء موعد رجوعنا لاسطنبول وتيتي تيتي زي مارحتي زي ماجيتي سلكنا نفس الطريق بس يوم وصلنا للميناء باسطنبول والا موقف التكاسي لنا بالمرصاد كلهم كلاب واولهم العرب متفقين على سعر 20 ليرة بتقسيم طيب ياجماعة شغلو العداد لالالالا 20 ليرة طيب تقسيم قريبة المهم قلت والله ما اطيعكم وما تمشي علي هالحركات واتعداهم ورحت للشارع العام وقفت تاكسي وحمل شنطنا وصلنا الفندق ب13 ليرة وكانت عودتنا لاسطنبول للتسوق الفندق كان نيبون ومنطقته حلوة وآمنه وفيها حرس لكن سواقين التكاسي خصوصا الاتراك محترمين ما شفت الا واحد غير محترم ركبت معاه طبعا انا اركب قدام حتى اتفادى النصب وشغل العداد 1.70 ليرة واتونا ما شين ولا حظت يده ضغط على زر بالعداد وقفز 2.75 وناظرني وانا عيني على العداد وبسرعة رجع وضغط زر ورجع العداد 1.70 ومن القهر الي حس فيه شغل زقارة حتى يعطرنا وتسوقنا والحمد لله ورحنا سوق بازار المسقوف وفيه شنط جلد حلوة والمكاسر يدهر شنطة ب 220 ليرة وحنا وياه إلى 100 ليرة بس حلوة وجلد جلد بس يبون مكاسر وادري طولت عليكم واي استفسار نحن بالخدمة .

مشكور اخوي على هذه المعلومات المفيدة
وننتطر باقي التفاصيل ان شاء الله
وشكرا

الف الف شكر لك اخوي بيتوت على النصايح المهمة والمفيدة..
وجزاك الله كل خير ...وربي انك ماقصرت...جعله الله في ميزان حسناتك
تحياتي لك..

هلا بك يأريج ومشكور على مرورك وهلا بك يااحلا بنوته وياحي الله اهل الامارات كلهم ولا شكر على واجب بس نحب لاخواننا الخير والامان والسلامة تحياتي

هلا أخوي بيتوت نصائحك بمحلها في سفرتي هذه السنه الي تركيا ذهبت مع سائق يتكلم العربي من حربيات في انطاكيا و كان السائق يسمسر من ورانا خلال السكن بالفندق و يقول لا تتكلمون عربي حتى لا يرفعون السعر وعند توقفنا عند فندق أربعه نجوم قال بأن سعر الغرفه ب (180) ليره تركي فشكيت بالامر فأرسلت السائق الي السياره وتكلمت مع الرسبشن باللغه الانجليزيه وسئلته عن سعر الغرفه فقال ب(85) ليره تركي يعني النصاب كان بيجمرك (180-85=95ليره تركي ) شوفوا النصب ولا حتيال ، وبعد ما عرفت طلبت من السائق ان يحضر وقلت له خذ هذي يوميتك و نهايتنا هنا . مشكلتنا ان نتعامل مع العرب الاتراك بكل ثقه وهم أساس النصب و الاحتيال ، جميع الاتراك الذين لا يتكلمون العربيه يتعاملون معنا أفضل بكل ثقه وأحترام .