1. السلام عليكم ورحمة الله وبركاته


2. اخواني أحبابي اعضاء منتدى العرب المسافرون


3. نبداء الان بالتكلم على شكل نقاط عن كل ماهو إجابي وسلبي


4. بدايتاً مع الخطوط القطرية


5. ((المطار))


6. ((الطريق إلى الجبل))


7. حديقة الزهور


8. حديقة شيبوداس


9. فندق استون مارينا


10. حجز الفندق كان في مكتب بافقيه ب 280 ريال وعن طريق البوكنق ب 250 ريال


11. قبل الختام


12. في الختام

بسم الله الرحمن الرحيم

السلام عليكم ورحمة الله وبركاته

اخواني أحبابي اعضاء منتدى العرب المسافرون

كم يعلم بعض الاعضاء بنيتي للسفر إلى بلاد العمه وهي المرة الثالثة لي وكل مره اجرب اصدقاء جدد في سفراتي وسبق لي كتابة تقرير مفصل عن سفرتي الاولى وهي الاجمل إلى الان وجميع سفراتيتقتصر في جاكرتا والجبل لذلك لن يكون هناك جديد في كتابة تقرير مفصل مع الصور ولكن احببت ان اكتب عن مايختلف في زياراتي السابقه وهذه الزياره وبعض الملاحظات السلبيه والإجابية وبعض المواقف
كان التخطيط بدون سابق انذار حيث اني نويت على السفر وعرضة الفكرة على احد الاصدقاء فأيد الفكره مباشرة وطلب مني ان يكون هناك شخص ثالث معنا فوافقته الفكره لكي تكون الرحله امتع واجمل وفعلاً كانت جميله
بداية التخطيط البحث عن افضل خطوط من ناحية السعر اولاً بشرط ان تكون التذاكر مرنه لعدم ضمان الإجازة وكان الخيار بين الخطوط القطرية والخطوط السيرلانكيه وتم اختيار الخطوط القطريه مع انها اغلى قليلا في السعر واطول ترانزيت لمخاوفنا من الخطوط السيرلانكية
وكان وقت الرحلة من تاريخ (11 إبريل ) إلى تاريخ (21 إبريل )
لمدة عشرة ايام فقط وكنت اتمنا الزياده ولكن عدم رغبة المرافقين بذلك تم اعتماد الرحلة بالمدة المحددة

نبداء الان بالتكلم على شكل نقاط عن كل ماهو إجابي وسلبي

بدايتاً مع الخطوط القطرية

أولاً :كان وقت الرحلة الساعة (5.15م) وبعد التاكد من الرحلة عن طريق موقع الخطوط اتفاجئ بتغير موعد الرحلة إلى الساعة (6.45م) وبعد الاتصال بالمكتب والتاكد من وقت الرحلة افادني بانه تم تغير وقت الرحلة وكان هذا الشي مزعج مع انه من صالحنا في تقليل وقت الترانزيت ولكن المفروض ان تصل رساله على الجوال تفيد بذلك
ثانياً: كانت الطائرة من افضل واوسع الطائرات التي ركبت وكانت جداً مريحة وكانت الوجبات جيدة
ثالثاً: مالحظته في الخطوط القطريه عدم الدقه في وقت الاقلاع وذلك لتاخر جميع الرحلات مايقارب النصف ساعه او اكثر.
رابعاً: يجب على كل مسافر تاكيد رحلة العودة قبل (72) ساعة وإلى سوف يتم إلغاء الحجز وهو مالم الحظه في الخطوط السعودية والاماراتية لعدم طلبهم ذلك .
خامساً : وهي المشكلة الاهم عند العودة من جاكرتا بعد تاكيد الحجز كان وقت الرحلة الساعة (16.55م) وكان التخطيط الذهاب للمطار وتركيب العفش في الطائر ة الذهاب للغداء والصلاة واخذ جوله في المطار وبعد دخولنا المطار الساعة (15.00م) نتفاجئ بانه النداء الاخير للطائرة بحيث سيكون الاقلاع الساعة (15.55م) وايضاً بدون سابق انذار ولا حتى رسالة تفيد بتغيير الرحلة وبعد جهد وجري للحاق بالطائره والدخول لصالة المغادرة نتفاجى بان الموعد لم يتغيير صراحه موقف سخيف من الخطوط القطرية مايميزها فقط طائراتها المريحة

((المطار))

عند الوصول للمطار طبعاً الخطوط القطرية لم توزع كروت الدخول إلى اندونيسا فتم توزيعها مجاناً داخل المطار لكن اذا اردت ان يقوم احد الموظفين بتعبئتها يتم دفع مبلغ وقدره (50 الف ربيه عن كل كرت) وقام احد الموظفين بعرض خدماته لكي يتم تخليص جميع الاوراق بمبلغ (300 الف ) ولم اوافق على الفكره وفضلت الوقوف في الطابور مع انزعاج الاصدقاء من ذلك وتم طلب الهديه من موظف الجوازات وسويت نفسي مثل الابله مافهمت شي ولما اشر بيده قلت بصوت عالي اوه هديه نو هديه ختم الجواز ولم يطلب حجز السكن مع اني ماخذ نسخه من حجز سكن وهمي وعند استلام العفش كان في استقبالنا موظفين حمل الحقائب وكان يعرضون خدماتهم مقابل المال وكان يريد (100 الف ربيه ) عن الحماله والواحده قلت له معصي ينطح معصي لو اشيل الشناط على ظهري واخذت منه الحماله وعطيته (10 الالف ربيه وكان جداً زعلان
وعند الخروج من المطار كان في استقبالي السائق الي متفع معاه يوديني الجبل (500 الف ربيه ) وتم شراء شريحة سمباتي مع انترنت (6) قيقا ب (20 الف ربية )

((الطريق إلى الجبل))

كان الوصول إلى جاكرتا يوم الجمعه وخروجنا من المطار كان الساعة الخامسة مساءً كان الطريق جداً متعب وذلك للزحام الشديد في جاكرتا وعدم وصولنا إلى الجبل إلى عند الساعة العاشرة مساءً والذهاب إلى مجمع سنر علم القريب من البقاله السعوديه وتم استجار الفله ب (600 الف ربيه مكونه من ثلاث غرف مع دورات المياه اكرمكم الله وصالتين كبيره وبعدها قررنا الذهاب للعشاء في مطعم الجزيرة طبعاً اخذنا دجاجه ونص مع اربعه كولا وصحن مقبلات ب 150 ريال لو حنا ماخذين ربع تيس ياشيخ بس كانت الوجبه جيده جداً والاكل نظيف بس يعيبهم مايشخلون الهيل والمسمار مااداني هالحركه في الاكل
طبعاً مطعم الجزيرة في زيارتي السابقه لم يكن موجود وايضاً تم افتتاح مطعم ماما نوره ولحظت الترميم في مطعم كمننا بس لاصحاب الشيشه الله يكفينا شرها ويبعدنا عنها طبعاً انا مو راعي شيشه بس حبيت اجربها في مطعم ماما نوره نصيحه لحد يجرب عندهم الشيشه خايسه مع ان المبلغ رخيص مقارنتاً بمقهى ابو عبدالله وهي المره الاولى لي في الدخول للمقاهي في اندونيسيا من اجل احد الاصدقاء فقط
طبعاً بعد تناول العشاء والذهاب للفيلا قررنا الذهاب في الصباح الباكر إلى سفاري وتم ابلاغ الحارس لكي يقوم بتامين سائق وخادمه وتم الاتفاق معهم السائق ب 500 الف في اليوم والخادمة ب 100 الف في اليوم
طبعاً تقريري ماراح يكون مرفق فيه صور واعذروني على ذلك لكن راح احاول اعطيكم الاسعار وهي الاهم في وجهة نظري دخول سفاري كان ب 250 الف ربيه للشخص الواحد و 145 الف للسائق مع الالعاب مجاناً داخل سفاري ركوب التلفريك ب 50 الف للشخص العروض التي ينصح بمشاهدها في سفاري
الكابوي والدلافين والدرجات والذهاب للشلال بداخل سفاري والقيام ببعض الالعاب تحليل لمبلغ التذكره ههه اعجبني عرض الفور جي داخل الالعاب الشخص ب 50 الف

حديقة الزهور

مع اني مااحب زيارتها لكن لرغبة المرافقين معي وعدم ذهابهم لاندونيسيا سابقاً قررنا الذهاب لها وكان الدخول ب 30 الف للشخص
مزرعة الشاي الدخول ب 10 الف ربيه للشخص وكان ناويين يلعبون علينا يقول ب 20 الف قلت اللوحه مكتوب فيها ب 10 الف تبي تدخلنا بالمبلغ هذا ولا عادي مو لازم ندخلها وافق ودخلنا وتم ركوب الخيول ب 50 الف للشخص لمدة نصف ساعة
حديقة متاهاري
الدخول للشخص ب 15 الف ربيه وفيها لعبة الرفتنج
وكل مسافه لها مبلغ محدد ولحظت إن الاسعار صارت دبل
0متر ب 150 الف
4 كيلو ب 1200000مليون وميتين الف
8 كيلو ب 1800000 مليون وثمان مية الف
طبعاً السعر للقارب وليس للشخص ويتم بيع شورتات هناك بقيمة 25 الف
وفيها لعبه الي تتعلق بالحبل وكان سعرها ب 30 الف للشخص وفيه مسافه اقصر ب 15 الف ربيه
شلالات شلمبر (الشلالات السبع )
كان سعر الدخول ب 50 الف للشخص وتم الجلوس فيها لمدة ساعه ونصف تقريباً
حديقة الفراولة
الدخول ب 10 الف ربيه للشخص مع عصير فراوله مجاني
يعطونك سله تقطف فيها الفراوله الكيلو ب 70 الف (مع نفسهم) اشتريه برى ارخص صراحه وغير كذا انا اشوف انها ماتستحق الزياره بعيده ومضيعة وقت فيها بس لازم تجرب كل شي هناك

حديقة شيبوداس

كان دخولنا لها في وقت مطر جداً شديد وكان الدخول مجاني اذا بتمشي على رجلك اما بالسياره تدفع (40) الف بس لما شفنا المسافه حمدنا ربنا يوم قررنا ندخل بالسياره كان دخولنا من البوابه الخلفيه واستاجرنا ثلاث شمسيات هناك صراحه مفروض تسميها مطريات اخذنا الثلاث ب 40 الف بعد مكاسر شديد وصار لنا موقف طريف بحكم زيارتي السابقه للحديقه قررت بعدم الاستفاده من خدمات المرشد للذهاب للشلال وبعد طلوع ونزول وتعب وارهاق اكتشف ان حنا ندور حول المكان مارحنا بعيد مسوي فيها فاهم الله يصلحني وجميع المسلمين ههه ومااسمع الا التذمر من الي وراي اخر شي قلت لهم ترى الشلال مايستاهل هالتعب كله مايحتاج تزورونه خلونا نرجع بس ووافقوا من التعب الي هم فيه
ومن المواقف المخيفه والطريفه التي حصلت معنا هناك معنا واحد الله يجزاه بالخير اتفق مع صاحب دباب يودينا مطعم ماما نوره ب 20 الف ذهاب فقط وانا كنت اضن انه متفق معه ذهاب وعوده (طياره) وعند الرجوع للفيلا اعطيتهم المبلغ ورفضوا ياخذونه يبون زياده قل لهم شكراً انا محتاج فلوس يجيك راعي الدباب مبرش وبكل ثقه وعزيمه يقولي (والله انا اجي انتا بالليل) وبكل شجاعه ارد عليه بزائير الاسد (فكر انا في خوف) ههه مسكوها علي الشباب فكر انا في خوف واخذ رقم الدباب وقلت له انا الحين اتصل على السفاره واعطيهم الرقم واسجل التهديد ويرد علي (انا مافي خوف انا سوي اتفاق مع شرطه هنا الشباب الي معي قلوا طيب كم تبغى صقتنا ام الركب قلت هذي ثلاثين الف لكل واحد وخلاص انقلع ماعندي زياده والحمد لله ماجانا في الليل كل شوي نسمع صوت الدبابات نقول هذا هو جا ههه والحمد لله عدت على خير
في اليوم الاخير قررنا ننزل ونسكن في جاكرتا وكنا نبي زيارة انشول ايضاً فاخترت فندقي المفضل والي دائماً ماانصح به المغادرين إلى جاكرتا بالسكن فيه (استون مارينا) حجزنا عن طريق موقع بوكنق وذهبنا في يوم الاحد والحمد لله ماكان الطريق مزحوم زياده خذا الطريق وقت ساعتين فقط ومن نزلنا الشناط وادينا الصلاة ذهبنا إلى انشول وكانت الفكره الغداء في مطعم بندر جاكرتا بس كان جداً جداً جداً زحمه وطلبوا منا الانتظار ساعه فقط عشان يحجزون لنا طاوله غيرنا الفكره واتجهنا إلى مطعم البيتزا الي بجواره ناسي لأي شركه يتبع بس اعتقد بيتزا هت وملينا الكريشات ولله الحمد طبعاً انا عندي فلسفه مع السائقين طبعاً مو الكل الي ارتاح له انزله معي المطعم واخليه ياكل معي في نفس الطاوله ويطلب الاكل الي يعجبه وكان معنا سائق جداً جداً جداً محترم وخجول واحببته صراحه اسمه يوكي هذا رقم جواله (085770295596) وجداً امين كنت دائماً اضع اغراضي الثمينه فلوس جوالات معاه في السياره وانزل وانا مطمئن بس كنت حذر شوي اني اعد الفلوس قبل انزل وبعد ماارجع اعدها وماحصلها ناقصه في كل مره بس مانصح في هذي الطريقه يمكن يلعب في عبه الشيطان هع
المهم توجهنا بعد الاكل إلى مدينة الالعاب المائية صراحه كانت جداً جميله واستمتعنا فيها كثير وجلسنا مايقارب الاربع ساعات فيها ولم نمل بس خيم الليل وقلنا خلاص بنروح نستريح في الفندق

فندق استون مارينا

دائماً ماكنت انصح المتوجهين إلى جاكرتا بالسكن فيه بحكم تجربتي بالسكن فيه في عام (2010م) وكان وقتها الاستقبال والخدمات فيه جيده اما الان مانصح فيه وذلك للأسباب التاليه اول عمل الدخول يستغرق عندهم قرابة الثلث ساعه الخروج عشان يجيبون شناطنا ساعه ونصف رحنا تسوقنا في مجمع مانقا دوا ورجعنا ومابعد نزلوا الشناط الاستقبال في السابق كان هناك مترجمين عرب الان لا يوجد والنفس خايسه الي مسؤول عن إحضار التكسي لحظة ان هو الي يحدد السعر وياخذ عموله بس حنا نسفهه ونتفق مع السائق او العداد الافطار ماجربته النظافه لحظة في احد الفرش ولم اكتشفه إلى بعدين وجود اثار دم غير كذا نسبياً نظيف اللوبي تبي تجلس فيه لازم تطلب دورة المياه يوجد به شطاف وانتم بالكرامه الغسيل والكي تعطيهم ملابسك العصر يجيبونها لك الصبح وبمقابل مادي خذوا علي (100 الف على خمس قطع)

حجز الفندق كان في مكتب بافقيه ب 280 ريال وعن طريق البوكنق ب 250 ريال

قبل الختام

عندي ملاحظة عند شراء التيوس هناك صحيح انها صغيرة الحجم ولكنها كبيره في العمر وايضاً السعر تضاعف إلى الدبل كنت اخذ التيس ب 360 الف قبل سنتين الان اغلبهم يبيعونه ب 750 الف بس تحصل ب 520 الف ونصيحتي لكم ترى محد ميت من الجوع اذا ما اكل تيس

في الختام

احببت ان اشارك معكم ولو بجزء بسيط مع العلم باني اعرف اني كنت بخيل عليكم جداً في التقرير ولكن لانشغالي مع الاهل والعمل لا استطيع كتابة تقرير مفصل وبالصور فارجوا منكم مسامحتي على تقصيري واشكر اخوي ابو خالد عمدتنا الي ماقصر والذي تواصل معي اثنا سفري وعرض خدماته علي رجل احترمه واقدره بكل ماتعنيه الكلمه واضعه تاج على راسي