حياك الله في بلادك قطر
ويشرفنا وجودك انت والاسرة الكريمه وان شاء الله تستمتع في زيارتك في بلادك قطر
بخصوص الفندق هاذا يعتبر فندق جديد بس شكله ممتاز ونضيف واتوكل على الله يذا السعر مناسب لك
وهاذا تقرير راح يفيدك في جميع الاماكن السياحيه و المطاعم والفنادق
https://artravelers.com/p/re/235965
واي خدمه احنا حاضرين

يسلمك ربي يالغالي وبالفعل انا اللي لفت نظري للفندق انه جديدي جدا
وتصميمه الفريد وسعره المناسب بالنسبه لفنادق قطر
وراح ازور الروابط اللي اضفت
ولك مني كل تقدير مشرفنا العزيز
ولازلت اتطلع لمزيد من الاراء
لإثراء الموضوع ولتعم الفائده

الفندق توه يديد بس محد جربه
ولاتغرك الصور اللي في الموقع
يمكن الفندق يطلع مب زين
خاصة انه اقتصادي
وبالنسبة للاماكن السياحيه اللي انت اخترتها فهي المشهورة في قطر واللي ننصح الجميع بزيارتها
أما بالنسبة للمطاعم عندك خيارات كثيرة بس قول لي ايش تفضل وأنا بارشح لك
وأحلى سينما عندنا هي سينما السيتي سنتر وعقبها فيلاجيو
وبالنسبة لسينما ال vip اللي في السيتي سنتر أحلى من ال vip اللي في فيلاجيو
وأي استفسار أنا حاضره

اذا تحب الفي اي بي روح السيتي سنتر
اما الفخامه فيلاجيو احلى لانها اجدد
تبي تجرب تجربة الثري دي هناك سينما واحده فقط مخصصه للثري دي الحقيقي الي هي iMax وهذي مو موجود في العالم العربي في قطر ودبي والكويت جربها تجربه ممتعه جدا

ولا تنسى تزور دريم بارك مدينة ملاهي في حديقة الحيوان روعه جديده
ولاتنسى تودي اطفالك ل جنغل زون في حياة بلازا مول جمب فيلاجيو مول بالضبط

ممكن استفسار معنه مالي شغل بالموضوع
بس ادري بطيبتكم ماراح اتردوني
انا نفس الاخ ودي ايي قطر
بس بغيت اعرف اسعار التكاسي هل هي غاليه او لا
مثلا من المطار الى سيتي سنتر جم ياخذ التاكسي تقريبا ..
وشكرا لتعاونكم
واسف على الازعاج بموضوع مو موضوعي

kuwait85
أخوي أعتقد لازم تسأل أحد السواح اللي جربوا تكاسينا لانه احنا ماجربناها
لكن على العموم لاتحاتي التكاسي لانه أسعارها بتكون عادية مثل اسعار أي تكاسي ثانية في الخليج

أخوي عالم من الخيال،،
أتمنى أن الشباب كفوا ووفوا في الرد عليك،،
أنا عندي تعقيب بسيط على الفندق، شوف بهل السعر ممكن تلاقي فنادق ثانية وقريبة من الكورنيش والمتحف الاسلامي وسوق واقف كلها مشي خمس دقايق او أقل،، فهي فنادق الموفنبيك (القديم) فندق مروب الجديد (منطقة الاسواق) وفندق سيف الدوحه وجديد بعد،، انزين بعد عندك أنك لو زد شوي على المبلغ فممكن تقعد في الشيرااتون والريتز وحيث الفخامة والراحة فأسعارها تبدأ من 850 وطالع،، وبعد عندك فندق فيلا هوليدي تقريباً لو ما كنت غلطان وهو يقع في منطقة المنتزه وحلو وكبير وأسعاره تبدأ تقريباً من 600..
بخصوص المطاعم عندك خيارات كثيرة ومطاعم حلووه شوف مطاعم اقتصادية وحلوه عندك (باندروزا وهي فروعها في عند اشارات رمادا، طريق سلوى، منطقة الدفنه).. (مطعم نجمة الهند منطقة المرخيه) (مطعم أشيانا شارع المطار القديم عند المكتب الرئيسي لخطوط الجوية القطرية) (مطعم كارفان عند اشارات رمادا) (هذي المطاعم الي ذكرتها لك كلها بوفيهات غدا وعشا وأسعارها مش أكثر من 45 ريال للشخص الواحد وأغلبها أكلها هندي باستثناء باندروزا حيث معظمها سلطات ومعكرونه).. (وعندك مطعم البيت الشامي عند منطقة السد وفي طريق سلوى وهذوله بوفيهم شامي وحلو سعره تقريباً 75 ريال للشخص)..
هذا كل الي عندي وأي سؤال آخر حاضرين لك طال عمرك وتشرفنا بزيارتك،،

يسلمكم ربي على هالردود والمشاركات اللي توقعتها من امثالكم في هالبوابه
المتميزه
اثريتو الموضوع
وبصراحه ردتوني في الفندق كثير
ولي صديق قطري مدح لي فندق اسمه
(((ليميراج الشرق ))) على ما اعتقد هذا اسمه
فوش رايكم فيه من حيث الفخامه والموقع والسعر ؟؟؟