::الوضيحي::
22-03-2022 - 12:33 pm
السلام عليكم ورحمة الله وبركاته
انا حبيت هذا المنتدى وايد.. ومن زمان مسجله فيه .. واستفد منه كثير .. واتمنى اني بعد استفيد منه اكثر .. ومنحرجه منكم لان مشاركاتي قليله جدا .. وذلك لاني مب من النوع اللي ادخل النت واجد
فاتمنى انكم تعذروني
انا بإذن الله مسافره هالصيف لندن .. وميونخ .. وباريس
بس هالمره سفرتنا غير عن كل مره .. كل مره نطلع من دوله اوروبيه لدوله اوروبيه ثانيه بالطياره ... لان في نظر الوالد انه امان اكثر
بس هالمره غيرنا
هالمره راح ننتقل بين الدول عبر القطار ... لكن المشكله .. و لاحد منا عنده خلفيه عن قطارات لندن
احنا بإذن الله راح نقعد في لندن . هي محطتنا الاولى في السفره .. ونبي نطلع من لندن على ميونخ بالقطار.. ومن ميونخ الى باريس بالقطار
ف انا عندي خمس اسأله .. واتمنى ان حد يجاوبني عليها كلها نقطه نقطه :1a6cb:
1- اي محطة قطار نروح لها ؟؟
2- ومتى لازم نحجز؟ نفس يوم السفر ولا قبل ؟
3- وكم سعر التذكره للشخص بالجنيه ( حق بريطانيا) وباليورو ( حق ميونخ)؟ ... وتذكرة الدرجه الاولى بكم للشخص؟؟
4- وشلون نحمل شناطنا للقطار؟. ومن بينزلها لنا من القطار؟؟ لان احنا عايله كبيره؟
5- وكم ساعه من لندن لين المانيا؟؟
اتمنى ان اسألتي واضحه ... واتمنى اني استفيد قد ما اقدر منكم ..
وشكراً لانكم خصصتوا من وقتكم لقراءة ما كتبته هنا
يعطيكم العافيه على هذا المنتدى الرائع
وجزاكم الله خير
تحياتي
اختكم
الوضيحي
هلا اختي..
اسمحي لي بهالمداخلة..
بالنسبة للقطارات في اوروبا جداً ممتعة وماتحسين بالوقت ..عشان المناظر الطبيعية راح تجذبك وتلهيك..وفي القطارات لازم تكوني سريعة يعني لاززم تروحون قبل ساعة من انطلاق القطار وتعرفون القيت الصحيحة وتتأكدون منها..اذا بغيتوا افضل شي الحجز يكونمن بدري اذا تبون حتى من الان أو قبل السفرة بيوم عشان تروحون للمحطة وتتعرفون على البوابة ..
كمان لازم تستعجلون بنقل اغرااضكم وشنطكم الى القطار ...وخصوصاً اذا صارت رحلتكم فيها تغيير قطارات ..
الشي الثاني ..اسمحي لي اسألك..لندن قريبة من باريس وتبعد ساعتين الى ساعتين ونص بالقطار "يورو ستار" اللي يربط لندن و باريس
السؤال هو كيف تروحون الى ميونخ علماً انها بعيدة وتبعد اكثر من ست ساعات عن لندن ومن ثم ترجعون ست ساعات الى باريس..لأن باريس اقرب الى لندن ؟والله العالم كم محطة راح تغيرون..
ليه ماتكون الرحلة من لندن الى باريس الى ميونخ!!
الله ييسرها لكم ..
عموماً..
القطار اللي يروح من لندن للدول الاوروبية Eurostar
ويطلع من محطة St Pancras International في لندن..
وبالنسبة لشنطكم طبعاً أنتم راح تنزلوها وتشيلوها..
الله يعينكم على الحوسة وعلى الركض
والدرجة الاولى مو ذاك الزود كبينه فيها مقعدين متقابلينميزتها فقط فيها نوع من الخصوصية ..
على فكرة تراني أبداً مو متأكدة من المسافة بين ميونيخ و لندن لأن عادة سفراتي الى لندن تكون مع باريس او بركسل و دوسلدورف لحالهم ..وميونيخ ومدن النمسا مع بعض..
تمنياتي لكم بسفرة موفقة