السلام عليكم ورحمة الله وبركاته
فى البداية احب اشكركم على المجهود الرائع اللى بتقدموه بجد اكتر من رائع ومجهوود جبار ربنا يكرمكم .
انا محتاجة مساعدتكم ،، انا من مصر وان شاء الله ناوية انا وجوزى نسافر تركيا ( اسطنبول)
اخر اسبوع من شهر فبراير وبصراحة احنا مش رايحيين سياحة بس لكن كمان تجارة مبتدئة بس على صغير اوى يعنى ناوية اشترى حاجات فى حدود 2500 دولار واجى ابيعها فى مصر فى اوبن داى فى البيت عندى يا ترى تنصحونى بايه واشترى منين حاجات حلوة وسعرها رخيص ،،
وهل لازم ناخد فواتير عشان التاكس فرى فى المطار ؟؟ وهل الفترة دى فيها اوكازيون؟؟
سؤال تانى لو سمحتم احنا عاوزين نوفر فى المصاريف ففكرت ننزل فى اوتيل 3 نجوم ياترى هيكون مناسب والا هنبقى مضايقين مع العلم ان احنا عاوزين نتبسط يعنى ممكن ندفع زيادة شوية بس نبقى مرتاحيين احنا مش هنقضى وقت طويل فى الاوتيل لأن اغلب الوقت هيكون فسح وشوبنج عشان نلحق نخلص كل حاجة ونستفيد بكل دقيقة خصوصا انهم 8 ايام فقط
ايهما افضل ننزل فى اوتيل فى تقسيم والا منطقة بيازيت وياريت لو فيه اقتراحات لاوتيلات كويسة بسعر كويس ،، انا دخلت على بوكينج ولقيت بعض الاوتيلات بسعر كويس بس محتاجة رأيكم
كمان محتاجة اعرف هندفع كام تقريبا كل يوم فسح ومواصلات فى حدود كام دولار تقريبا؟؟
اخر سؤال هل التلفريك بيكون مغلق فى الوقت دا من السنة لأن كان نفسى اوى اركبه بقيت بحبه من ساعة ما ركبته فى ماليزيا
انا اسفة اوى على الاطالة بس طمعانة بقى فى كرمكم عشان انا اللى برتب الرحلة وجوزى سايبلى الموضوع كله قالى عاوزة تسافرى اتعبى انتى بقى وظبطى الدنيا يعنى لو السفرية باظت هيفضل يتريق عليا العمر كله
ساعدونى بلييز ربنا يخليكم