السلام عليكم
عدت لكم مره ثانيه بعد انقطاع ثلاث ايام والسبب انو الفندق اللي انا فيه ماعندهم وايرلس مجانا الربع ساعه ب80 بات وهذا اول شي صدمني في شنغ ماي ورويال برنسس
رايي في شنغ ماي ماعجبتني بالنسبه لي فوكيت احلى لكنها مو سيئه اكثر شي عجبني فيها (ام رقاب طويله)كنت اتمنى اشوفهم والحمدلله شفتهم
وهذي صور لهم واللي طالعه بالصوره هذي المرشده السياحيه وتتكلم عربي
اول يوم رحنا لم مزرعه الفيله تركب على الفيل ويدور فيك لمدة بصراحه مدري كم لني ماركبت الفيل اولا لريحته ثانيا اخاف يطيح فيني ويقبرني ولاني سبق وركبته في فوكيت بس عموما حلوه مره
والثانيه تركب في عربه ويجرها ثيران لمدة ربع ساعه شي غريب يعني ماقد جربناه
والثالثه واللي عجبتني هي الالواح اللي تطفوا على الماء ومدتها ساعه الا ربع هذا المكان اسمه حسب البروشور maetaman elefhant camp &bamboo rafting
وهذي بعض الصور له
المكان الثاني كان مصنع الحرير واخيرا ولاول مره اشوف دودة القز سبحان الله
عارضين طيقة انتاج الحرير حاطين زي الصحن خوص فيه دود ياكل ورق والصحن اللي بعده الدود يطلع الحرير بعدين الحرير مكور بعدين يطبخون هذا اللي كنه بيض ويطلع الحرير بصراحه هذا عجبني لاني ماكنت اصدق بقصه دودة القز
وهذي الصور
هذا الاصفر هو الحرير
وهذي وحده تسوي قماش بخيوط الحرير
بعدها رحنا لمصنع المظلات والمراوح لكن مالتقطت اي صور له لانه عادي مافيه شي غريب فيه ناس يرسمون على ملابسك او شنطك او اي شي
بعدها رحنا لمصنع الجلود بعد عادي مافيه شي غريب بس تلاقون عندهم المنتوجات الجلديه الاصليه والطبيعيه
بعدها رحنا للمنطقه الجبليه اللي فيها البنات اللي رقابهم طويله
وفيه عجز حريم مخوقين اذانهم بحلق مدري كم بوصه كنه ماصوره
هذي صور لهم
وهذي بنت صغيره من الرقاب الطويله تسوي شالات واللي بالصوره هذي المرشده السياحيه
في اليوم الثاني رحنا في النهار للسوق مثل روبن سن واللوتس وواحد ماذكر اسمه بالاضافه للسوق الليلي القريب للفندق وبالليل رحنا لنايت سفاري يها ثلالث اشياء اول حاجه الساعه 8 فيه عرض نوافير مره حلو هو احلا شي بعدها الساعه 8ونص تركب الباص وجوله على الحيوانات والساعه 9ونص بعد جوله ثانيه بباص ثاني ومكان ثاني
بالنسبه لرحلا اليوم الاول اخذناها من مكتب اسماعيل مو جود في السوق الليلي فيه اعضاء ذكرو وليد خان انا شفت محله بس قلنا نغير ونشوف اسماعيل بصراحه اسعاره رخيصه وانسان طيب لابعد حد وفيه اخواته يشتغلون مرشدات سياحيات يتكلمون عربي وحده جت معنا اليوم الاول ووحده جت معنا لنايت سفاري مع انو احنا ماطلبنها رحلات اليوم الاول كلها ب200 بات بس ورحلة النايت سفاري ب100 بات يجي باص كبير تبع نايت سفاري ويركب معكم ناس يعني مو خاص لاحد معين
اليوم الثالث كانت رحلتنا لبانكوك اخذنا باص من اسماعيل ب150بات وانا حاليا اكلمكم من مطار شنغماي رحلتنا بعد ساعتين الله يهديهم رويل برنسس ماعندهم نت
بالنسبه للمطاعم ماشفت عنهم شي يفتح النفس سالنا عن مطاعم عربيه قالو لنا المطعم العربي في سوق الليل يوم رحنا بصراحه ماشتهينا المكان طلعنا لقينا اللي جنبه في خليجيين قلنا اكيد زين مامدانا ندخل الا البراصي على الجدران والصراصير انا انقرفت وطلعت
رحت لزوجة اسماعيل واخذنا من عندها مطبق مدري ايش هي تسويه واليوم اللي بعده من ماكدونالدز والحمدلله على النعمه
واحب اقول لكل من سكن في رويال برنسيس اذا كان الفندق عاجبهم وناوين يروحون لفوكيت احجزوا في بوراساري لانه افضل من رويال بكثير و النت عندهم بلاش