1. السلام عليكم ورحمة الله وبركاته


2. بسم الله الرحمن الرحيم


3. والحمدلله الساعه 7 وربع احنا بالرياض


4. الا نشوف فندق صلاح الدين ولا نسأل الا عندهم سويت واحد


5. ان في مملكة رجل وفيها قهوه وحلاق ومحل بيع الزقاير والتبغ على مااظن

السلام عليكم ورحمة الله وبركاته

بدايه اخواني واخواتي اعضاء منتدى العرب المسافرون وخصوصا اعضاء بوابة المملكه العربيه السعوديه احب اشكر كل اللي ساعدوني وجاوبوني على استفساراتي واخجلوني بكثرة الردود بس مو غريبه عليكم ياأهل السعوديه وهذا تقريري البسيط انزله لكم كامل حتى تستمتعون فيه وينال اعجابكم انشالله (لان عندي مشكله بالصور قلت انزل لكم التقرير اليوم والصور احاول فيهم هاليومين)

بسم الله الرحمن الرحيم

طبعا الرحله كانت مجرد يومين من يوم الاربعا 732007 الى يوم الجمعه 932007 على متن سيارتنا الخاصه
كنا ناويين نمشي من الكويت الساعه 10 الصبح ولكن انت تريد وانا اريد والله يفعل مايريد و على ماخلصنا شغلنا وصلينا جمع وقصر ورحنا صرفنا فلوس بالاضافه الى الاستعداد للرحله يعني جيكنا على السياره وعلى التواير ومرينا الجمعيه نشتري خرابيط للسفره بالاخير مشينا بحمدالله ورعايته الساعه 1 الظهر متجهين الى السالمي عبر الجهرا وخلال الطريق مرينا على قاعده علي السالم الجويه وصورتها لكم وعلى الساعه 2 الا ربع وصلنا لمنفذ الرقعي
والحمدلله المنفذ كان فاضي وماكو زحمه مجرد سيارتين واحنا الثالثه وخلصنا من منفذ الكويت وودعنا الكويت للدخول الى المملكه العربيه السعوديه نفس الشي في منفذ السعوديه ماكو زحمه والاجراءات سهله وسريعه بس طبعا نزلونا وفتشو السياره وخلال ربع ساعه طلعنا من المنفذين باتجاه حفر الباطن
بعد ماطلعنا لفت انتباهي شي منفذ القادمين للكويت كان زحمه يمكن علشان اربعا ويبون يقضون الويك اند عندنا يعني تبادل اماكن
رحنا نعبي بانزين وكانت المحطه كبيره حيل وماكو دور اي سياره تيي تصفط تعبي وتمشي
بعدين مسكنا خط حفر الباطن طبعا الخط خطر شوي لان شارع واحد وفي سايد رايح والثاني راد هذا غير الشاحنات اللي تارسه الشارع وطول الطريق قاعده اطالع في مخيمات وتجمعات للابل كنت ابي اصور لكم المنظر لكن الكاميرا طفت خلص شحنها انا اعتمدت على اختي انها تشحنها ولما شغلت الكاميرا بصور طفت ماصورت الا القاعده :112: :112: (مشكله الاعتماد على الغير)
على الساعه 3 العصر دخلنا منطقة حفر الباطن خذينا الشارع سيدا ليما وصلنا للتقاطع ومن التقاطع خذينا يسار واحنا مكملين الطريق ولا نشوف راس ارنب ويضحك بعد طبعا عرفتوه الارنب الجائع وخصوصا ان مو موجود بالكويت قلنا نتغدا فيه وبعدين نكمل الطريق
وبعد ماتغدينا ولله الحمد مشينا من الحفر على الساعه 3 ونص بإتجاه المجمعه ومن المجمعه للرياض واحنا ماشين الخط كان وايد حلو مافيه تحويلات وكبير شارعين واحد رايح والثاني راد وكل واحد في 3 حارات واول ما مسكنا الخط مشينا تقريبا ساعتين لين ماوصلنا للمجمعه ومن المجمعه للرياض ساعتين الا ربع (طبعا بسرعة 160 كم بالساعه)
ومن المناطق اللي مرينا عليها :
الارطاويه - الزلفي - ام قليب - شقرا - ام سديره شلح - ام طليحه - البرزه - الشهباء - السحيمي
وعلى فكره اهو نفس الطريق اللي يوديكم لمكه المكرمه والمدينه المنوره من خلال ظلم وللبنان من خلال عرعر والقرياات بس عاد على حسب تلف يمين ولا يسار ولا سيدا
انا لما قريت عرعر والقريات قلت لهم مو هذا الطريق اللي يودينا لبنان ولا يقولون لي امبلا اهوا نفسه عاد اقترحت عليهم اقتراح على الطاير قلتلهم اشرايكم نروح لبنان يوم ونرد الا يقولون على مانوصل لبنان نرد نركب مره ثانيه السياره علشان يمدينا نرد وتصير سفرتنا كلها قعده بالسياره

والحمدلله الساعه 7 وربع احنا بالرياض

اول ماوصلنا الرياض طرت على بالي اغنية محمد عبده آه ماارق الرياض واغنيته الثانيه لاحلي وجه الرياض (صححولي اذا غلط) صج انها زحمه بس من الوناسه ماحسيت بطول الانتظار وكان منظر المملكه والفيصليه روعه تحسفت على الكاميرا ولا حظت شي حلو عندكم بأرقام السيارات انها تتكون من 3 احرف و3 ارقام عاد في سياره شفتها مكتوب عليها السعوديه وطن والثانيه قلب وفي بعد عمر عاد اذا اسمه عمر تضبط مع السياره
قلنا مانبي ندور فندق الحين بروح ننزل بواحد من المجمعات علشان نصلي ونتعشا وبعدين نشوف لنا فندق
ووقع اختيارنا على العزيزيه مول خصوصا ان اهوا اول مجمع يواجهكم لما ادخلون الرياض وقلنا بعد نوخر عن الزحمه نزلنا تحت الجسر نبي نروح للعزيزيه ولا الزحمه مو طبيعيه بتعرفون شنو السبب ؟؟؟؟ اقولكم شنو معرض الرياض الدولي للكتاب ملاصق للعزيزيه مول (يعني الزحمه ورانا ورانا)
نزلنا بالعزيزيه وكانت الساعه 8 الا ربع يعني حزة صلاة العشا رحنا صلينا وطلعنا للمعرض بصراحه المعرض وايد حلو صج ان صاله وحده ومافي عربات نحط عليها الكتب اللي نشتريها بس كان روعه وفي وايد كتب مو موجوده عندنا بالكويت ولاحظت ان اغلبية الشباب والبنات السعوديين مثقفين ويسألون عن كتب تاريخيه وخصوصا البنات مايسألون عن كتب الطبخ ولا المكياج اغلبيتهم كانو يسألون عن كتب تاريخيه وسياسيه وهذا شي حلو طبعا احنا ماطولنا بالمعرض ساعه وطلعنا ردينا لمجمعنا العزيزيه
ورحنا نفتر بالمحلات وبعد ماشريت وخلصت رحنا لردهة المطاعم وطلبنا من هرفي + الواحات الصيني
المهم على الساعه 11 بليل طلعنا من المجمع ورحنا ندور لنا على فندق قعدنا نفتر من فندق لفندق ومن شقه لشقه رحنا بودل يقولنا فل ورحنا الشيراتون يقولنا فل والشارع زحمه وتصدقون عاد مرينا عند الفيصليه والمملكه وماندري ان داخلهم فنادق لا وبعد بالفيصليه في شقق فندقيه وتصدقون بعد ان شارع العليا اللي اغلبيته شقق كانت كلها فل واحنا دايخين وتعبانين نبي اي مكان نبي نرتاح وكل مارحنا لفندق ولا شقه ماله داعي ننزل (الكتاب باين من عنوانه) اللي يشتغل يأشر لنا ان مافيه اخر شي من التعب قلنا بنام بالسياره (طبعا هذا اقتراحي)

الا نشوف فندق صلاح الدين ولا نسأل الا عندهم سويت واحد

قلنا راضين نبي نام ويافرحه ماتمت الفندق 4 نجوم بس انا اقيمه نجمه وحده الاثاث قديم ومافي خدمة سيارات انت لازم ادور لك موقف فلا تغلطون غلطتنا وحجزو قبل لاتسافرون وسبب الزحمه ان وقتنا كان ويك اند وفي وايد من الشرقيه يايين الرياض بالاضافه للمعرض وبالاضافه للجنادريه هذا غير المؤتمر وغير مباراة الكويت مع الهلال مادري الاهلي اللي تعادلنا فيها وياكم
وبعد يوم شااق نمنا في سبات عميق الى الساعه 10 ونص الصبح كنا مفكرين نروح الصبح لغرناطه مول لكن للاسف راحت علينا نومه ومايمدي قلنا خلاص نروح للفيصليه رحنا للفيصليه بعد ماصلينا الظهر لقينا اغلبية المحلات مفتوحه ماعدا كوتش امسكر
رحنا نبي نتغدا وطبعا اقترحت عليهم نتغدا بالمطعم البرازيلي وقلت لهم اغلبية الاعضاء بالمنتدى يقولون يسوى تروحين له رحنا لردهة المطاعم ندوره ومالقيناه الا يقولون خلاص مو لازم نبي ناكل اهني ولا اقولهم بالعكس يهبل واروح اسأل وحده الا تقولي المطعم داخل الفندق ولما رحنا للفندق وسألناهم وين المطعم (اهني الصدمه) قالو لنا مايفتح الا الساعه 8 بليل والا يقولون لي الله مو كاتب لنا ناكل بالمطعم هذا المهم رحنا لردهة المطاعم (حلوه ردهة المطاعم مادري اشفيني اتكلم بلغه عربيه فصحى) وخذينا رز بخاري ربيان ورز بخاري لحم وسلطات من مطعم نسيت اسمه يم السينابون احلى شي بالرز البخاري الصحن الفخار والخبز اللي امسكرينه فيه شكله يشوق ويونس
بعد الغدا خذينا جوله بالمجمع ورحنا للهارفي نيكولز في وايد عطورات حلوه ليميتد اديشن ماتنزل الا عندهم وعند ساكس فيفث افنيو وتقريبا على الساعه 3 ونص طلعنا من الفيصليه ورحنا للعقاريه للماي فير ليدي (واهني عاد الصدمه الثانيه) المجمع امسكر ومايفتح الا الساعه 4 ونص المهم نطرنا لما فتح المجمع وبعد ماشرينا طلعنا للمملكه على الساعه 5 ونص
دخلنا للمملكه وافترينا بالمحلات ورحنا لمملكة المرأه وايد حلوه الفكره وقعدنا بقهوه ويمنا بنات سعوديات قعدنا نسولف وياهم اهما علبالهم ان احنا من الشرقيه وقلنالهم ان احنا من الكويت ورحبو فينا ومع السوالف قمنا نسولف عن السواقه الا تقولي وحده منهم البنات بالرياض والشرقيه يسوقون يغيمون السياره ويسوقون وبشرط يكون عمرها 40 وفوق طبعا انا استغربت ليش بالذات 40 ؟؟؟
بعدين نزلنا تحت للمجمع وكل ماشريت شي وديته السياره لما خلصت فلوسي ومابقى معاي الا كويتي رحت ابي اصرف ولا البنك امسكر طبعا في محلات خذو مني كويتي وفي بعضهم رفض وانا مضطره اشتري ومادري شنو اسوي وقمت افتر بالمملكه محل محل اسألهم اذا يصرفون لي واخر شي الحمدلله لقيت واحد وصرفلي الدينار الكويت = 12 ريال طبعا انا راضيه بس المهم اصرف علشان اخذ اغراضي اللي خليتهم بالمحل
والحمدلله بعد مافرينا وتسوقنا قررنا نروح لجسر المشاهده طبعا التذكره للشخص 25 ريال وممنوع ادخل الكاميرا معاي الا بتصريح من الاداره فقلت خلاص مو مشكله اخلي الكاميرا عندهم واحنا واقفين ننطر الاصنصير الا انتبه لشغله تدرون شنو ؟؟

ان في مملكة رجل وفيها قهوه وحلاق ومحل بيع الزقاير والتبغ على مااظن

المهم صعدنا بالاصنصير لطابق 77 وبعدها خذينا اصنصير ثاني لطابق 99 واول مانزلنا مشينا من خلال جسر المشاهده وطبعا تحسفت على كاميرتي عقب ماشحنتها ماأصور فيها :112: :112: واحتريت اكثر لما لقيت ناس ماخذين كاميراتهم معاهم معقوله كلهم عندهم تصريح
طبعا انا انصحكم تروحون له العصر علشان تشوفون المنظر والله يعقد احنا رحنا بليل والمنظر كان روعه شلون لو العصر اكيد احلى واحلى والمفروض بالجسر يحطون اغنية محمد عبده اه ما أرق الرياض لان اول ماتشوفون المنظر لاشعوري تطري عليكم هالاغنيه
واحنا بالجسر قاعدين نطالع الرياض اختي تقولي ان الرياض كبر الكويت وانا قاعده اقولها لا مو معقوله انتو اشرايكم ؟ توقعون ان الرياض كبر الكويت ؟
بعد ماخلصنا من جسر المشاهده نزلنا طابق 77 وكلينا بالمطعم اكل ايطالي روعه طبعا المفروض حجز بس الحمدلله لقينالنا مكان وبعد ماخلصنا رحنا السياره ولا اخوي حاط الاغراض بالسياره ومسوي جك اوت من الفندق من العصر الا يقولنا تبون شي ولا نمشي للكويت
طبعا انا مايخلص شغلي الا اقوله ابي ارد بلوزه شريتها من العزيزيه ولا يقولي ضروري واقوله عفيه ضروري واحنا طالعين بإتجاه الكويت والساعه تشير الى العاشره والنص والشارع زحمه وانا احاتي المحل لا يسكر وانا مارديت بلوزتي وطبعا الشباب عندكم الله يستر عليهم سواقتهم مو طبيعيه فجأه يلفون عليك اهما اللي مسوين الزحمه يعني الاشاره تفتح وتلاقي واحد بأقصى اليمين بلف يسار المفروض من اول تصير يسار
الحمدلله وصلنا الساعه 11 الا عشر دقايق يعني مابقى شي ويسكر المحل ولا اروحله دايركت وارد البلوزه عقبها الا اشوف بالبوك 20 ريال قلت لازم اصرفهم مايصير اخليهم (خو انا كل ماأسافر ارد ما معاي ولا فلس ايدي تحكني ماارتاح الا لما اصرفهم خ) عاد شريتلي من توتي مانجا عصير مانجو شقف حجم كبير على 9 ريال تسليه للطريق و10 ريال شريت فيهم من هرفي شوكلاته كيك وانا مستعجله وبسرعه بسرعه رحت السياره ولما ركبت ومشينا تذكرت اني دفعت الفلوس بس ماخذيت الكيك وطبعا بقى معاي ريال ومتحسفه ودي اصرفه بعد ين قلت خلاص اخلي ذكرى واكتب عليه روان بالرياض مع احلى الذكريات وللحين موجود ابوكي كل مافتحته اتذكر الرياض
طلعنا من الرياض الساعه 11 بليل وودعت الرياض مع عوده قريبه بإذن الله ومشينا بنفس الطريق من الرياض للمجمعه للحفر للكويت
احلى شي بالمشيه بليل ان مانحس بطول الطريق والشمس ماتأذينا واللي ضيق الخلق بالمشيه بليل ان الطريق اظلم ومافي استراحات وايد
واحنا قاعدين نمشي اخوي دايخ وفي النوم وينطر اي استراحه علشان يريح فيها الا اقترح عليه اني اسوق بداله واشوا ماقال شي قال سوقي واذا شفتي استراحه قبلها اوقفي
عاد سقت لما شفت استراحه ساسكو وقبلها وقفت ولا يسوق اخوي وندخل الاستراحه قلنا بنريح ساعتين وبعدين نمشي الا طلع الاستراحه مافيها الا بانزين وبقاله وتكرمون حمامات ومسجد الا نشوف سيارات واقفين وشكلهم نايمين داخل السياره ولا نوقف يمهم ونريح للساعه 2 الا ربع
بعد ما ارتحنا مشينا وعند الارطاويه وقفنا عند مطعم نبي شاي وحليب علشان نصحصح وبعدها مشينا لي الحفر ومن الحفر للكويت ووصلنا البيت تقريبا على الساعه 6 الصبح
طبعا الرحله كانت حلوه وماودي نرد بس الحمدلله استانسنا وانشالله اليايات اكثر
سامحوني على الاطاله وانشالله يعجبكم التقرير