السلام عليكم ورحمة الله وبركاته
اعزائى مشرفين واعضاء ورواد منتدى المسافرون العرب وبالاخص بوابه بريطانيا
النشيطين جدا والمميزين دون عن جميع اقسام المنتدى
اسمحوا لى بالتعبير عن انبهارى بهذا الصرح الكبير الذى عثرت عليه بالصدفه عن طريق جوجل
كم استمتعت فى التنقل من مواضيع وتقارير رواد البوابه البريطانيه
واخص بالذكر اخونا نديم (( انت معايا )) وتقريره الرائع (( الطريق الى لندن ))
واخونا (( محبوبتى لندن )) وتقريره الرائع (( فى رحاب الضباب والمطر - رحله ستبقى فى ذاكرة العمر ))
واخونا (( ملبورن )) وتقريره الرائع (( دعونى ابكى فمن يبكى معى ))
الذى وجدت حماسا شديدا مع قرأتى لتقريره بسبب انى رأيت نفسى فى اخونا ريان
من حيث الاشتياق الشديد الى الذهاب الى بريطانيا للسياحه ودراسة اللغه الانجليزيه
وايضا لانى لاحظت من تقريره انه من اهل المدينه المنوره وهيا المدينه التى عشت بها
ثلاث سنوات متصله من عمرى مع اهلى فترة الثانويه العامه والا الان لى تقريبا شهرين سنويا
اقضيهم بالمدينه المنوره لزيارة اهلى
انا اسف على المقدمه الطويله ولكن انا كنت اتابع تلك التقارير وتقارير اخرى منذ شهور
ولكنى كنت اعانى من انى مش عارف اشترك فى المنتدى لانى عمرى ما عملت اكونت
فى منتدى من منتديات مكتوب قبل كده فبالتالى عايز ادى بس كل ذى حق حقه
اعرفكم على نفسى قبل الدخول فى الموضوع
اخوكم اسلام احمد عبد العزيز انا مصرى عمرى 19 سنه
طالب فى سنه تانيه كلية تجاره جامعه عين شمس ومقيم فى القاهره
اهلى مقيمين بالمملكه العربيه السعوديه فى المدينه المنوره كما ذكرت سابقا
انا كان السفر الى اوروبا إما للاقامه او للسياحه او الدراسه هى حلم يراودنى منذ الصغر
ولكن لم يكن فى بالى اى دوله ساذهب كانت فكره عامه فقط للسفر الى اى دوله من دول اوروبا
لم يكن التحديد والاصرار على انجلترا الا بعد قرأة تقارير الاعضاء عن هذه الدوله
التى تحترم كل من تطأ قدمه ارضها هذه الدوله التى تحترم الدين الاسلامى
احترام لم اجد له مثيل فى باقى دول اوروبا او حتى امريكا وبقية الدول المجاوره لها
لقد ذهلت عندما علمت ان بريطانيا تخصص ميدان كامل للمسلمين وتفرشه وتجهزه تجهيزا كاملا
لاقامة المسلمين شعائرهم فى عيد الفطر وعيد الاضحى المبارك
وتصريح وزير الخارجيه البريطانى معلقا على قرار منع ساركوزى المرأه المسلمه
من ارتداء الحجاب داخل الاراضى الفرنسيه بان انجلترا دوله تحترم الحريه الشخصيه لجميع مواطنيها والمقيمين فيها
كم انت رائعه يا بريطانيا !!!!!
قد تستغربون من كلامى وحبى الشديد لهذه البلد بالرغم من انها احتلت بلدى فى يوم من الايام
وانا لا اعرف اسباب الاحتلال الانجليزى لمصر ولكن انا واثق تماما ان لكل زمن اعتباراته
كل الكلام الكتير والرغى الكتير ده لم يكن الا طلب منى ان تعيشوا معى حلمى
كما عشت معكم احلامكم فى تقرير كل عضو فى هذا الصرح العظيم
قد يكون حلمى لم يخرج الى النور حتى الان لعدم وجود مصدر مالى ثابت ومستقر حتى الان
ولكن انا نفسى اسافر الصيف القادم ان شاء الله وانا اسعى بكل جهدى
لتدبير تكاليف السفر والدراسه والمعيشه خلال هذه المده ان شاء الله
وعلى رأى عمنا صلاح جاهين
انا اللى بالأمر المحال اغتوى
شفت القمر نطيت فى الهوا
طلته ما طلتوش ... ايه انا يهمنى
وليه ما دام بالنشوى قلبى ارتوى ... وعجبى
وانا والله قلبى بالنشوه ارتوى من المنتدى ومن القسم الاكثر من رائع ده
نيجى بقى لاستفساراتى واتمنى ان لا تكونوا قد مليتوا منى ومن كلامى
ولكن كما ذكرت لكم هذا فقط من عشمى فى ان تعيشوا معى حلمى وان اجد من يدلنى الى الطريق
ومن عشقى لهذا الصرح الرائع واعضاءه ورواده الكرام
انا عايز استفسر عن كل حاجه تخص رحلتى المستقبليه الى بلاد الانجليز
طبعا بدايتها تأشيرة دخول بريطانيا
طبعا انا قريت فى الموضوع ده كتير واعرف انى لو هروح للدراسه يفضل انى اخد فيزا دراسه
ولكن هناك من يقول انه لو ان مدة الدراسه اقل من سنه من الممكن اخذ فيزا سياحيه
وهذا الرائ الذى افضله بصراحه حتى لا تقيضنى المعاهد واستطيع الاستمتاع بالبلد بجانب الدراسه
ولكن المشكله فى موضوع التأشيره انه فى مصر اعتقد ان احنا ما عندناش مكاتب لتخليص امور الفيزا
كما الحال فى المملكه العربيه السعوديه ومكتب الفيفا او دولة الكويت فى مركز التأشيرات البريطانيه
فهل مثلا الفيزا لو حبيت اخدها من مصر هل السفاره البريطانيه فى مصر فيها مكتب للتأشيرات بداخله
وهل تكون مفتوحه للجمهور فى اى وقت ولا بمعاد سابق زى سفارة الولايات المتحده ؟؟؟؟؟
طبعا ممكن واحد يقولى يا اخى سهلها على نفسك وخذها الكترونيا عن طريق موقع السفاره على النت
واملا الاستماره وكده لكن بخصوص موضوع النت انا بعد اما املى الاستماره مش عارف هاعمل ايه
هل هابعت جواز السفر الى السفاره ومعاه تكاليف التأشيره ولا هاطبع الاستماره بعد ما املاها
واروح بيها مكتب التأشيرات اللى من المفترض انه يكون فى السفاره ومعاه جواز السفر وتكاليف الفيزا
وطبعا باقى الورق المطلوب ومن ضمن الورق ده ورقه غريبه عجيبه انا مش عارف هاجيبها ازاى
اللى هيا خطاب من الشركه اللى بشتغل فيها او خطاب من صاحب العمل
طيب دلوقتى انا شغلى مستقل يعنى مش تابع لاى هيئه سواء حكوميه او خاصه
انا شغال فى حاجه زى البورصه كده ولكن لا يتم تداول الاسهم فيها وانما العملات
اسمها فوركس تريدنج سيستم ... منين بقى هاجيب الخطاب ده ؟؟؟؟؟؟؟
تانى سؤال بقى بخصوص الفيزا انا بحكم ان تأشيرة دخولى اراضى المملكه العربيه السعوديه
هيا اقامه على كفالة الوالد لذا فأنا لا افقه شئ فى فيزة السياحه او الدراسه
انا اسمع ان فى فيز 3 شهور وفى 6 شهور وفى سنه وفى حاجه اسمها مالتى
انا سؤال بقى هل المدد دى كلها هيا المده المسموح الدخول خلالها الى اراضى المملكه المتحده
ام انها هيا المده المسموح لى البقاء بها داخل الاراضى البريطانيه
بمعنى لو انا اخدت تأشيره ست شهور هل ده معناه انى لازم اسافر وادخل انجلترا خلال ست شهور
ام ده معناه انى مسموحلى البقاء فى انجلترا لمدة ست شهور
ويعنى ايه تأشيره مالتى يعنى اقدر ادخل بيها انجلترا مده الحياه او وقت ما احب ؟؟؟؟؟؟
كل هذه الاسئله بخصوص تأشيرة الدخول
لو افترضنا انى ان شاء الله اخذت التأشيره سواء سياحيه او دراسه
وحجزت التذاكر ومعايا التكاليف اللى تغطى مدة بقائى وكل حاجه تمام
يبقى السؤال الخاص بالمعهد الذى انوى الدراسه فيه
انا قريت عن معاهد كتيره جدا انا طبعا نيتى فى دراسه اللغه الانجليزيه
هيا الاستمتاع بهذه اللغه الاكثر من رائعه فانا مولع بها بسبب ثقافة تلك البلد
من افلامها من تراثها من ثقافتها حتى من اغانيها
لذلك فالسبب الاول فى رغبتى دراسة اللغه الانجليزيه هيا الاستمتاع والقدره على التواصل مع تلك البلد
ومع ثقافتها وشعبها والسبب الثانى انها بالتأكيد ستكون شيئا يميزنى فى الجانب العملى من حياتى
لذلك انا عايز اروح ادرس فى معهد له مواصفات لم اجدها حتى الان فى معهد الا فى معهد واحد
اللى هو اسمه تقريبا bell اعتقد فى بورتسموث تلك المواصفات هى كالاتى :-
1 - ان يكون معهد يضمن لى دراسة جديه ممتعه تفيدنى فى حياتى الخاصه والعمليه
2 - ان يكون معتمد و تشكر فيه الناس فى جديته ونظامه وشهادته
3 - ان يكون ضخم من حيث عدد الطلاب لكى يضمن التواصل مع اكبر عدد ممكن من الطلاب واحس فيه بروح الحياه الجامعيه
4 - ان يكون فى مدينه بعيده نسبيا عن العاصمه لندن (( 100 - 150 كيلو )) حتى لا يلهينى شئ عن الدراسه اثناء اوقاتها .
5 - ان يكون المعهد فى مركز تلك البلد وليس فى منطقه نائيه او متطرفه عنها
6 - ان تكون هناك وسيله مواصلات سريعه وممتعه وأمنه بين تلك المدينه والعاصمه لندن للترويح عن النفس فى الاجازات الاسبوعيه (( اعتقد افضل وسيله القطار ))
7 - اتمنى لو تكون تلك المدينه ساحليه تطل على المحيط
مش عارف هل جميع تلك الشروط تنطبق على معهد بيل ام لا
لا اعرف كم المسافه بين بورتسموث ولندن ولا اعرف هل هناك محطه للقطار بها
ولا اعرف هل تطل على المحيط ام لا
ان كانت كذلك فستكون وجهتى ان شاء الله ان لم تكن ارجو منكم ان تدلونى على ما افضل منها
ومعهد افضل من معهدها بخبرتكم السابقه وكرمكم الامتناهى فى مساعدة الاعضاء الجدد
اعتقد ان استفساراتى قد انتهت ارجو انى لم ازعجبكم بموضوعى
واتمنى ان يكون الموضوع فى مكانه الصحيح ولم اضعه فى قسم الاستفسارات
لان الاستفسار ليس هو اساس موضوعى ولكن اتمنى ان اجد مش يعيش معى حلمى
ويشجعنى على تحقيقه
السلام ختام واتمنى ان تتقبلونى ضيفا بينكم