1. ميناهاسا منطقه تبعد حوالي أربعين دقيقه جبليه وجميله


2. قالت ماهو بتذاكر هاي واى ,, تول أنجا


3. وش ألقصه يا سواق


4. الهندوسية


5. البوذية


6. بعدين ضفينا أنفسنا وركبنا سيارتنا ,,, وجينا معودين

السلام عليكم
التبشير للنصرانية لأول مره ,, كان بواسطة البرتغاليين
سيارة وعلي مينا هاسا
طلبنا من الفندق سيارة فاتصل بمكتب تأجير سيارات قريب ,, بكم؟؟ قالوا مايتين وخمسين لليوم شامله لكل شئ ,, وسائق يتكلم أنجليزي بشكل جيد ومفهوم
خلاص ,, بكره الساعة تسعه ونصف يكون عند الباب
بعد الفطور بالفندق بالبوفيه ,, انطلقنا علي بركه الله ,
أخذنا سلاحنا ,, الكاميرا والنشرات . وين بتودينا ,, قال ميناهاسا

ميناهاسا منطقه تبعد حوالي أربعين دقيقه جبليه وجميله

بدأ الخروج من ألمدينه ولم يأخذ وقتا طويلا عشان منادو ماهي كبيره مره ,, وبدا الطلوع علي الجبال اللي محاوطه ألمدينه مخترقا مناظر غاية بالروعة ..
وبغيت أقول وقف عشان نشوف ونستمتع ,, ولين شفت بقاله قلت خلاص وقف نأخذ مويه وأنا قصدي بالحقيقة أخذ لكم هالصوره ,,, ياقو قلوبهم ,, ترا البركان حي ويطلع أبخره ,,, بس منظره ومنظر القرية والمساكن والطبيعة يستحق الوقوف ,,,
مشينا بعد كذا تاركين القرية الأولي في طريقنا مخترقين مزارع الرز الممتدة ثم ثاني قرية بكنائسها وأتحداكم إذا لقيتم مسجد !
لون بشره الناس ابيض يميل للون الصينيين الناصع ولكن شكل الوجه يميل نوعا ما إلي شكل سكان الأرض الأصليين أقصد زى اللي في أيريان جايا أو سكان استراليا الاصليين ,, يعني باختصار وبلا تطويل عليكم ,,,, ها للي قلته وهالشكل الموجود بهالمنطقه مينا هاسا هو ملخص لما حصل قبل ستمائة سنه
جاء الصينيين لهذه ألمنطقه وكانت غابات فاستصلحوا الأرض وقطعوا الأشجار الضخمة حتي يمكنهم زراعه الرز صيني ,,, ومافيه رز ما يصير!!
وتزاوجوا مع السكان الأصليين اللي شبه بدائيين مثل حقين أيريان جايا يطارد الخنزير ويصيده ويأكله ويربيه إلي أن جاء التبشير البرتغالي مصاحبا للحملات التجارية ومحميا بالنفوذ السياسي ,,, ولذلك صارت المناطق الشمالية لسلاويسي تعج بالمبشرين !!
الجاويين ,, هم بس دروا باللي قاعدين يسوونه الأوربيين ,, قاموا , وهوا ,, علي مناطق الوسط قبل ما يلحق عليها المبشرين ,,,
ولذلك تجد مكاسار غالبيتها مسلمون,,,
واستمرت أللعبه والتسابق ,,
المبشرين دروا إن دعاه جاوا وصلوا ,, وباشروا الدعوة بالوسط ,, قاموا طمروا علي الجنوب بس علي مين تلعبها ؟؟
هالمره ,, وجدوا الدعاة المسلمون إمامهم ,, وكل قرية راحوا لها وجدوا إن داعيا مار عليها قبل أسبوع والموضوع منتهي ,, الحق اسبق ,, ومن سبق أكل النبق !!
وين ألقرية اللي مامر عليها الدعاة المسلمون ؟؟ إيه هاذي ,, شف الخنازير لازالت موجودة في الحظيرة ,,, العلامة الفارقة !!!
ولذلك ,, الجنوب قري مسلمه وقرى مسيحية ,, بينما الشمال غالبيته مسيحية ,, والوسط غالبيته مسلمه ..
أقول لكم هذه المعلومات تمهيد للي أبا أقوله لكم بعد شوى لا ,, وأوريه لكم
تمشي السيارة وهو ترتفع كل قريه ارفع من اللي قبلها وكل القرى محاطة بالمزارع الممتدة علي مرمي البصر لجميع المحاصيل وفي مقدمتها الرز والسيسبان ,,,, نعم السيسبان
لا ,,, وبنوعيه جيده اللي لا فكيته تلقا الحبوب حمرا مثل الدم
ويباع بالمحلات اللي علي الطريق وبرخص التراب
يا زينه يا طعمه خذ ياخويى وملينا السيارة بالقشور تيدا مساله ماس ,,, ومبسوطين
أيش هاذا ,, حاجز علي الطريق ,, مافيه مباني ولا شئ
سطو مسلح ,, بس وين السلاح ؟
إلا بنت جت وعليها برنيطة كاوبوى ورفعت بوجيهنا بوك وهي تبتسم
تذاكر,,, تذاكر!!!؟؟؟
هذا ماهوب هاي واى

قالت ماهو بتذاكر هاي واى ,, تول أنجا

وش ألقصه يا سواق

قال حنا الحين بندخل البارك الوطني ( ألمنتزه ألوطني ) ,, وش بارك ,, اندونيسيا كلها بارك والله وندفع الريبو علي الساتو أورانج ياغليها اغلي من منتزه الحكير وتعطيني التذاكر وتعطي خويي ابتسامه وتروح ترفع الماسورة
وندلف بمركبتنا نحو منتزه مينا هاسا بوكيت كاسي
وتلاحظ النظافة لا أوراق أشجار أو عودان لكن كله طبيعه لا منشآت ولاشي
يا سواق هاذي نصبه ,, حتي نقرقش ؟؟ قال خويي نقرقش نص ريال !!!؟؟ علي هالجمال والطبيعة أبقرقش كل يوم قلت إيه ولا تنسي ألابتسامه !!!
الطريق كأنه ينحر بنا جبلا أمامنا ..قربنا بالسيارة ولبقنا في مواقف "عمود الأديان" في مينا هاسا بوكيت كاسي
حولنا واتجهت للعمود أبي أقرا اللي مكتوب عليه ,, أكيد لوحه ألملكيه لعصويد
و أنا أصعد الدرج ,, اسمع صوت واحد بميكرفون كنه يحرج وأثره علي اليسار في رفعه فوق
سلامات داتنق ماي فرند دوا أورانج دارى إمارات أراب أورانج أراب سلامات جالان
سلامات داتنق الحمد لله علي ألسلامه
قلت لخويي وشذا يقول قال يرحب بناس من الأمارات جايين
قلت حبيبي هاذا يحرج علينا ,, شفه يشر علينا قال ايوالله ,,
ماري سني ,, ماري سني تعالوا هنا يا أصدقاء وصارت الناس تناظرنا وحنا واقفين علي الدرج ودالعين أثامينا لاحنا رقينا للعمود ولا نزلنا
قال خويي لا يهمك قلت ماهمني بس بربرته خلت الناس تناظرنا والحريم والزوار حتي بياعات السيسبان والبيض المسلوق وجهوا علينا
الأمارات ,, , داري أمارات ,, جايين من الأمارات, دارى أراب
صار لنا جمهور وصدقنا أنفسنا وهو بالميكرفون
, داري أمارات ,, فيها بترول واندونيسيين يشتغلون هناك ,, تعالوا عندي
أووا الله الورطه ,, وشذا يقول ,, سكتوه تكفون
والمشكلة انه يشر علينا
وين السواق تعال وش ألهرجه ,, قال ما درى هاذا المذيع الداخلي في المكان ,, ويعطي أخبار ونكت ودردشة ,,,
قلت خلنا نروح علي الأقل نوقف هالاحراج والعيون ألمركزه علينا
هو فوق في كشك ولازم ترقا له رقينا
هالو هالو سلامات داتنق أول مره نشوف زوار من الأمارات سلامات داتنق هذا سجل المميزين تفضلوا سجلوا فيه وفتح سجل الشرف وسجلنا ,, حنا مميزين ثري مقاسي ثري مقاسي وجينا نازلين ,,,
وأناظر,, يا عيني كل بياعات البيض و بياعات السيسبان والطواقي متجمعين ,, يحتروننا أسفل الدرج
إماراتيين وبتروليين بعد
وأترككم تتخيلون المنظر والموقف في نهاية الدرج ووش حصل لنا ووش سووا بنا .....
يللا تخيّلوه
تلميح
" أنا جيت علي راسي برنيطة زرقاء بس لما رجعت للفندق تيدا آدا برنيطة "
وأترككم تتخيلون ,,,
بينما أنتم تتخيلون ,,, أتذكر بعض المعلومات عن هذا المكان ..
المكان اختير لأنه كان يوجد كوخ لأول مبشر برتغالي وصل هنا وحول أهالي ألمنطقه إلي الديانة المسيحية قبل حوالي أربعمائة سنه تقريبا..
وهو يوجد في حضن جبل ويوجد حفر وفتحات بركانيه يطلع منه أبخره ومويه حارة لدرجه انك تسلق فيه البيض
فجاءت فكره بناء نصب في هذا المكان وعند هالا بخره كتذكار لهذه المناسبة ,, وهو مجهود محلي ولكن عند نشرها وتصعيدها علي مستوى اندونيسيا صار لها ما يشبه النقد ,,
يعني ,, مثل هذا العمود يفهم منه أن ديانة اندونيسيا هي المسيحية أو حتي سالاويسي , وهذا غير صحيح ,, لان الوسط غالبيته مسلمون
فتدخلت الحكومة ألمركزيه وعدلت ألفكره كالتالي :
أقامه نصب تذكاري لكل الأديان بجوانب خمسه ,, ويثبت علي كل جانب احد الأديان ألخمسه رسما وكتابتة وهي :
الإسلام
المسيحية الكاثوليك
المسيحية البروتستنت

الهندوسية

البوذية

الملاحظ ان الرموز المسيحية كثيره ,, وصور للمسيح بأوضاع مختلفة وكذلك البوذية والهندوسية تشاهد مجسمات كبيره وصغيره لبوذا ولكن في الوسط الاعلي المخصص للإسلام لا تجد شيئا ذي بال فكأن أصحاب الديانة المسيحية هم فقط المتواجدون بقوه يليهم البوذية والهندوسية ,, والمسلمين كأنهم غير معنيين بالأمر
هل لان بداية ألفكره كانت مسيحية,, ممكن
لم أكمل صعود الدرج فهو طويل ومتعب فرجعت من ثلث المسافة مكتفيا من الغنيمة بالإياب مثل ما يقوله النحويين ورجال الأدب
بائعات البيض وأكواز ألذره والمسلوقة بماء الحار جدا ويقعدون يطامرون وراء السياح
أخذنا منهم ذره مسلوقة بماء البركان ,,, حلو ,,, ذره بنكهة الكبريت
النصب أو العمود معمول بطريقه ممتازة وبارتفاع كبير حوالي ثلاثين متر وبخمسه جوانب وكل جانب منقوش عليه رموز احدي الديانات الخمس
ولما تكون بهذا المكان ترى التسامح الاندونيسي بأجلي وأروع صوره
لا يوجد حراس ,,, ومع ذلك لا تجد تخريب اوأحراج من قول أو فعل من فئة لفئة أخرى

بعدين ضفينا أنفسنا وركبنا سيارتنا ,,, وجينا معودين

لاحظت اختلاف طريق العوده عن الطريق اللي جينا منه ,, قلت للسواق قال أبيكم تشوفون مناظر مختلفة عن الأول وما يفرق كثير ,, وبعدين أبي أوريكم بحيره جميله
قلت ممتاز ,,, وفعلا فكرته جميله ,,, راينا مناطق جميله جدا بالطريق وشوى حوالي ثلاثين إلي أربعين دقيفه ,, إلا والله أشوف البحيرة علي جانب الطريق ,, بحيره هائلة , تقول بحر من كبرها ,,, وعاد تعرفون خويكم ما يسمع بشي اسمه بحر
ومشتقاته بحيره بحار حتي بحّار .. قولد ليف ,,,,, كله
قال فيه علي البحيرة مطاعم محليه نظيفه تقدم السمك مشوى أو مقلي او مطبوخ مع التوابع قلنا بس اربط حميرك قصدى وقف سيارتك عند واحد مطعم ,, صديق
دخلنا, استقبلونا , علي اليسار حاطين سمك بشبك معلق بالماء ,,, علشان تختار سميكاتك ما هيب طازه ,, الا أطزز من الطازه ,, حيه ,,
تخير اللي تبي بنفسك
وجابو لي شبكه بعود علشان أتخير ,, وأقوم أسوى فيها صياد !!!
يالله ياخويى ,, وين اللي تبي أصيدها لك ؟؟
والقط ذيك السمكه الحلوه المليانه وشكلها حلو ,, أحمر علي برتقالي
اثر راعي المطعم شافنا ,, وجاك راكض , صافط طبلونه
بوكان ,, تيدا ادا ,, بوكان
ما أ درى وش يقصد ,,, وش فيه ياخويى ؟؟؟؟
وأخذ مني السمك ويرميه بالماء ,, ليه ؟؟ قال هذا مو سمك الأكل ,, ماهو هاذا
هاذا سمك للزينة والتربية ,,, هاذا ياباني غالي ,, الجوز بخمسمائة ألف !!!!
أهلا ! ,,, يعني أنا وإياك ياخويى بنزرط بميه وعشرين دولار!!!
تخيروا من هاذا ,, هذا حق الأكل
أنا قلت ,, تخير ياخويى ,,, أنا تخيرت الملكي الياباني الامبراطورى ,, عيتو علي ,,
أبا أروح اجلس علي البحيرة ,,, وأخلصوا علينا ,,, جوعانين
قعده رايقه واكل لذيذ ,, ومناظر روعه ,,
للأسف سوف نتركها بعد قليل ,, عائدين للفندق,,
وشمس الأصيل تدنو من الأفق ,,, حمراء قانية تريد أن تغطس بالبحر ,, الذي أصبح لونه برتقاليا ,,, يتلألأ بمهرجان الغروب الجميل.