حياك اخو ابو سالم
مدري هل تقصد انت شهر 2 السنة الجاية ؟؟
لان حنا الحين شهر ثلاثة هجري .. وخمسة ميلادي
لكن حسب ما فهمت ان الاسعار في شهر 7 8 9 ميلادي تكون مرتفعة شوي
لكن الاسعار في اجازة الحج يقولون انها منخفضة شوي
ما عندي فكرة كم سعر الرنجت مقابل الدينار
لكن الرنجت مثل الريال السعودي تقريبا
وسعر الصرف ما بين الدولار الامريكي والرنجت تقريبا 3.76
لو كنت بتسافر لماليزيا اسبوع واحد فقط
فانا اشوف انه ابدا ما يكفيها
ومسالة انك تروح للعاصمة وجزيرة فقط ايضا ما ينفع
لان المسافة لماليزيا بعيدة وتذاكرها ماهي رخيصة فلازم تحللون الرحلة
غير كذا ماليزيا فيها على الاقل خمس مناطق مشهورة وصعب انك ما تروحها ( على الاقل اول مرة )
وهذه المناطق هي
كوالا
لانكاوي
بيننغ
كاميرون
جنتنج
وانا اقترح عليك تخليها على الاقل اسبوعين
ولو تبي تتمشى وانت مرتاح وتعطي كل مدينة حقها خلها 17 يوم
اخاف اقولك اكثر وتقول تراك مسختها
بالنسبة للاسواق
فيه اسواق كثيرة لكن اتوقع الاسواق اللي تنفع للشراء هي
سوقو في كوالا
سوانق وانق في كوالا
والسوق الصيني في كوالا ( طبعاً هذه يبيله توصيات خاصة )
وبرضه انا اشوف سوق مركز كومتار في بيننغ
اتمنى اخوي لو عندك اسئلة ثانية لاتحرمني من شرف خدمتك

من سفرتي وجدت أن الاسعار في دول الخليج أحسن والنوعيات أجمل

حياك الله ابو سالم عزيز وغالي بعد قلبي
بالنسبه لسعر الريجنت الماليزي فهو سعره مشابه للريال السعودي تقريباً
على سبيل المثال 1 دك يعادل ماليزي 12 ريجنت وشوي وحسب صرف اليوم
و ال 10 دك يعادل 120 ريجنت وشوي وهكذا
بالنسبه للطيران وهي كالتالي وهذي اسعار تاريخ اليوم 2/5/2005
تنبيه (لا يوجد خط مباشر من الكويت الى ماليزيا والله يعينك بالترانزيت )
الخطوط الجوية الكويتية وسعرها 240 دك
الخطوط الجوية القطرية سعرها 214 دك
الخطوط الجوية الاماراتية سعرها210 دك
الخطوط الجوية الخليجية سعرها 206 دك
وهذي تفاصيل نظام سير الرحلات على النحو التالي
الخطوط الجوية الكويتية نظام سير الرحلة : كويت / بانكوك / كولالمبور ( وتقعد في مطار بانكوك ساعتين فقطً )
(لان هناك رحلات كل ساعتين من بانكوك لي كوالالمبور والعكس بحكم قرب المسافه بينهم والاتفاقيه الاسيوية)
الخطوط الجوية القطرية نظام سير الرحلة : كويت / دوحه / كوالالمبور (وتقعد في مطار الدوحه تقريباً من ساعتين واكثر)
(اجباري تطب مطار الدوحه في البدايه وتنطر شوي لين تبدا رحله كوالالمبور وما تطول انشالله وحسب الايام)
الخطوط الجوية الاماراتية نظام سير الرحلة : كويت / دبي / كوالالمبور ( وتقعد في مطار دبي من ساعتين واكثر)
(هماً نفس الشغله لازم تطب مطار دبي وما تطول انشالله رحلتها الى كوالالمبور بس بيني وبينك بتقزرها في مطار دبي
الخطوط الجوية الخليجية نظام سير الرحلة : كويت / دبي / كوالالمبور ( وتقعد في مطار دبي من ساعتين واكثر )
(الخليجية من راي الشخصي وانيت الخليج مثل ما يقولون الربع رخيص بس مو مضمون رحلاته بسبب الغاء الحجوزات لان سعرها رخيص والناس هابين فيها)
وبالنسبه للحجوزات فا بصراحه بالنسبه لراي الشخصي أفضل مكتب حجوزات عندنا بالكويت سفريات دناتا كافي لهم فرع بالمطار 24 ساعه واسعاره رخيصه وحجوزاته مضمونه ومكتبهم الرئيسي بالامارات وله أفرع في الخليج
يعني أرقد وامن
وهذا موقع الشركة
http://www.dnata.com
بالنسبه للتسوق ما عندي علم فيها
اي شي انا حاضر

السلام عليكم
اعتقد الاخ nbk رد بالاجوبه الكافيه
لاكن عندي اضافه بالنسبه للتسوق انا طبعا ما أيد اللي يقول انها دولة رخيصه للتسوق تعتبر نفس الاسعار بدول الخليج ومعقوله نسبيا
بالنسبه لافضل الاماكن للتسوق انا برايي التايم سكوير والبي بي بلازا
واعتقد انه افضل شي عندهم تكرمون الاحذيه والشنط النسائيه طبعا صناعتهم مو ماركات هذا اللي لاحظت فرق فيه بالاسعار
واذا كان السفر بس لمدة اسبوع الافضل انك ماتطلع من كوالامبور الا لجنتنق فقط

الف شكر اخواني
بس اقدر اخلي السفره 10 ايام
بس احترت شلون البرنامج

الاخ // أبو سالم السلام عليكم .. بالنسبة لماليزيا رحت لها تقريبا 3مرات والبرنامج ل 10 أيام اقترح يكون كالتالي ::تطلع من الكويت الى كوالا بعدين تروح مباشرة الى جينتنج مدينة مرتفعة وباردة وفيها مدينة ألعاب يومين وبعدين تطلع بالطيارة الى بينيغ تقريبا 3 أيام مدينة ساحلية وحلوة وخاصة فنادقها حلوة وعلى البحر وجةها معتدل وغير الألعاب المائية ومثلك عارف...وبعدين تطلع الى لانكاوي بالباخرة لمدة يومين استرخاء واستجمام ومنتجعاتهم حلوةوخاصة اذا جاها مطر وانت فيها ""ما ودك تفارقها""وبعدها تطير الى كوالا تجلس فيها الباقي والتسوق فيها ما يحتاج وناسة زوجتك على اسواقها ويا كثرها وأقل سوق 3أدوار هذا اذا ماجاك اكثر ....ونتمنى لكم سفرا سعيدا .. أخوك............. المتلهف,,,, السعودية ,,,,, الرياض.,,,,,, وبالتوفيق.

الأخوان كفوا و وفوا
بس ما أنصحك التسوق بالعاصمة كوالالمبور
اذا تبي تتسوق تسوق في بننج الأسواق روعه ومثل بضاعه العاصمة لكنها أرخص وعلى فكرة بضاعتهم وماركتهم ماتفرق عن الخليج بشىء يعني كأنك تتسوق بسوق شرق بالكويت وله بالراشد بالخبر وله بالمملكة و الفصيلية بالرياض

اسف لأني بطول بالسؤال بس
تنصحوني انزل اول فبنج!
لأني ماعرف شنو مميزات ماليزيا
واشكرج اختي عاشقة السفر على ردج

السلام عليكم ...
حياك الله أخوي أبو سالم ...
0أيام أشوفها قليلة على ماليزيا ...
ولو إنك تاخذ لفه شوي في المنتدى وتتطلع على رحلات الشباب و تشوف الموضوع المثبت دليل ماليزيا عشان تعرف المدن والأماكن المشهورة وبعدين تقرر حسب ذوقك ...
لكن في البداية راح أذكر لك المدن والجزر والمرتفعات المشهورة هناك واللي متعودين ربعنا يروحون لها وهي ...
كوالالمبور طبعاً
جزيرة لنكاوي ( جزيرة في البحر تتميز بالشواطئ الجميلة والخضرة الساحرة )
جزيرة بينانق ( وهي تعتبر مدينة لأنها ترتبط باليابسة بجسر وفيها مدينة كبيرة ومشهورة اللي هي جورج تاون وفيها منتجعات بعيدة عن المدينة في شاطئ كبير ومشهور إسمه ( باتو فرنجي ) وهذي المنتجعات هي وجهت ربعنا دائماً )
مرتفعات جنتنق ( وهذي مدينة ألعاب كبيرة إضافة إلا فنادق فوق قمة جبل و قريبة من كوالا ويمكن تروحلها من كوالا يوم وترجع )
إقرأ في المنتدى شوي وكون فكره بنفسك ... وحنا حاضرين بالمشورة أخوي
بالتوفيق إن شاء الله ...