- السلام عليكم و رحمة الله و بركاته
- أولا بخصوص الطيران :
السلام عليكم و رحمة الله و بركاته
أخواني مشرفي بوابة تركيا جزاكم الله خير على جهودكم المبذولة في خدمة هذا المنتدى الأكثر من رائع و خدمة أعضائه و جعله الله في ميزان حسناتكم
يمكن تكون هاذي أول مشاركة لي في بوابة تركيا لأني السنتين اللي طافن كنت أسافر ماليزيا و تايلاند و دول الخليج في الإجازات القصيرة بس السنة قلت أغير فإن شاء الله ناويه أسير تركيا السنه في إجازة الفصل الثاني في شهر 3 يعني من 22/3إلى 7/4 و السفرة لمدة 11ليلة إن شاء الله فعندي كم سؤال لو تكرمتو
أولا بخصوص الطيران :
قبل 2 يوم كانت التذكرة عالإماراتية(1290) درهم فقط و من يومين صارت(1660) درهم و اليوم صارت(2030) درهم مع استمرار التذاكر اللي ب(1660) بس بتواريخ ثانية فسؤالي هل أحجز التذاكر اللي ب1660 ولا أتريا يمكن تنزل الأسعار مرة ثانية لأني اتصلت الصراحه بالطيران قالولي يعتمد يمكن اتزيد و يمكن اتقل فقلت أسأل أهل الخبرة أحسن عسب ما اتظيع عليه التذاكر الأرخص و خصوصا إن عددنا كبير نوعاما( 4 كبار + 4 أطفال + رضيع ).
و البارحه بعد شيكت على الطيران التركي قلت خلني أشوف مب خسرانه شي طلعت التذكرة ب(1169) درهم فقط !!! بعد قلت خل أسأل خبراء تركيا أكيد بحصل عندهم الحل الأفضل
فشو اتشورون عليه ؟؟؟
يعني هل الطيران التركي جيد طبعا عارفين من ناحية النظافة و الخدمة و الأكل ووسع الكراسي و المسافة بينها و ....و بالتالي أتوكل على الله و أحجز عالطيران التركي (طبعا أوفر مثل ما قلت لكم عن عددنا )
ولا أحجز عالإماراتية أحسن لو إنها أغلى ؟؟؟ لأني بصراحة بعد تجربة الطيران الماليزي أخاف أجازف و أجرب أي طيران ثاني غير طيران الإمارات .
ثانيا بخصوص المناطق :بحكم إن هذي أول سفرة لنا لتركيا و بصراحة ما أعرف وايد تركيا و مناطقها بس إذا تسمحون أنا بقول لكم شو اللي اباه من سفرتي هذي و أدريبكم ما بتقصرون معايه
أنا في بالي امقسمة الأيام كالتالي :2ليلة : أسطنبول
3 ليالي : منطقة في الخضرة و الطبيعة الحلوة
3 ليالي : منطقة الثلوج
3 ليالي :أسطنبول
ما أعرف إذا برنامجي هذا زين ولا بس هذا اللي أبا (1: الطبيعة و الخضرة ،2: الثلوج ،
3:أسطنبول بمافيها من حدايق و سناتر ) فشو المناطق اللي أقدر أزورها و تحققلي الهدف من سفرتي
ثالثا : الفنادق :ممكن أسماء لبعض الفنادق أو الشقق النظيفة (اللي اتناسب عددنا بس ما بتكون مكلفة ) في كل منطقة ، و الأماكن اللي أقدر أزورها في كل منطقة و الأنشطة
إذا ممكن تقارير معينة تنصحوني بقرايتها و اللي فيها أهم المعلومات اللي لازم أعرفها قبل لا أسير تركيا أنا بقرأ تقارير و ببحث عن معلومات بس مثل ما عارفين اللي سألت عنه أمور أساسية لازم أعرفها الحينه عسب أحجز و التقارير تحتاج وقت لجمع المعلومات
و السموحه أدري ثجلت عليكم وايد بالأسئلة بس أدريبكم ما بتقصرون
شورو عليه يزاكم الله خير أتريا ردكم
بالنسبه لميعاد السفره تذكري أن ميعاد السفره في فترة شتاء و ثلوج فألخضار راح يتحول لأبيض من الثلوج وبالتالي لاتتوقعي تشوفي المناظر الي في التقارير الصيفيه و الربيعيه.
و أرسلك شوية تقارير لأعضاء رائعيين قامو برحلاتهم شتاء و أستمتعو بها حتى يمكنكي معرفة ما ستشاهديه بالظبط في هذه الفتره