هلا اخوي .. انا من رايي اذا كنتوا شخصين فقط لا تأجرون سيارة .. وبالنسبة لثلاث الاف تراه سعر جدا معقوول .. بالنسبة لفيينا انصحج تاخذ تاكسي من المطار للفندق وبعدين تستخدم الباصات والاندر غراوند .. ما يباله شيء وخذ معلومات كفاية من الفندق ومن مواضيع الاخوان والاخوات في المنتدى .. وبالنسبة لسالزبورغ وزيلامسي نفس الشيء .. تنقل بالباصات اوفر بوايد .. وعلى فكرة في كل منطقة من مناطق النمسا اذا حاب تزور المناطق السياحية . تقدر تطلب من الريسيبشن في الفندق يعطونك البروشورات للرحلات .. ينضمونلك رحلات لاهم المناطق السياحية في المدينة بأسعار واايد حلوة .. يعني لليوم من الصبح لين العصر على 25 يورو تقريبا للشخص .. ويكون معك مرشد ..
بالنسبة للتنقل بين المدن .. فالقطارت احلى شيء واوفر ..يعني من فيينا لين زيلامسي تكون التذكرة تقريبا ال 30 يورو .. بس اهم شيء لاتاخذ شنط كثيرة .. شنطة وحده تكفي لانه لو خذت كثير بتتعبون في التنقلات ..
بالنسبة للفنادق الي اخترتها في فيينا وسالزبورغ فهي جيدة وعن السوق .. اما لاتيني ف أنصحك تغيره لو في مجال .. سعره اغلى من الفنادق الثانية وبعيد عن السيتي سنتر والبحيرة .. ولازم تسيرله بالباص .. في فنادق احسن واقل سعرا منه وقريب السنتر ..
اتمنى اني قدرت افيدك ورحلة موفقة

مرحبا اختي بنت دار زايد .. مشكورة على الرد ..
للاسف ماقدر اغيره لانه يوم دورنا فنادق كانت كلها فل ولا فيه امكانية حجز
اضطريت على الرغم من اللي قريته سابقاً بالمنتدى عن لاتيني .. اني احجز فيه و دفعت برضوو ..!!
يله ماعليه ...
بس اختي انا يوم شفت براسي الحسبة لقيت ان السيارة بتكلفنا باليوم حوالي ثلاثمية ريال ..
و القطارات من مدينة لمدينة للشخصين ثلاثمية ريال تقريباً ... يعني مو اني استأجر سيارة افضل ؟
و يكون فيها حرية اكثر ؟
والله مادري لسه محتارين .. يمكن انتم عندكم فكرة اكثر ..
و لاني اخذت في فندق لاتيني فكرت بقوة استأجر سيارة .. لانه بعيد عن السنتر و البحيرة ..

اهليين اخوي .. العفو .. بالنسبة لفندق لاتيني .. مع الاسف انه اغلب السفريات يقولون انه ما فيه حجز بس يطلع فيه في النهاية .. بس يالله ماعليه .. بالنسبة لفندق لاتيني فهو يبعد عن السنتر بين 20-30 دقيقة مشي .. واذا تبي تسير بالباصات .. موقف الباصات قريب من الفندق ومكتوب فيه الاوقات الي يمر عندها الباص .. يعني في السعة تقريبا مرتيين .. وبالباص تاخذ حوالي 5 دقايق .. تكون التكلفة للشخص حوالي 2 يورو .. واذا تريد تقدر تشتري بطايق من عندهم لاكثر من رحلة .. على ما اعتقد ب 11 او 14 يورو والله مب متذكرة .. وبس تركب تراويهم البطاقة مب لازم تدفع .. يعني ما في مشكلة ابدا .. بالنسبة للمناطق السياحية الي عدال زيلامسي فهي مب كثيرة .. مثل كابرون .. والشلالات .. والزحليقة وحديقة الحيوانات .. طبعا تقدر تسيرلها بالباصات او بالتاكسي يكلف حوالي 15-20 يورو ..
انا وعائلتي ما ستأجرنا سيارة الا في المانيا لاننا سرنا مناطق كثيرة غير ميونخ .. ف اذا حاب انك تستأجر سيارة اهم شيء يكون فيها navigation system لانه بتضيع اذا مافيه .. خاصة انه مب كل الشوارع فيها لافتات .. صح انه بتاخذ حرية اكثر بس وايد بتتعب خاصة في التنقل بين المدن (هذا من كلام بعض الناس الي تنقلوا بسيارة) خاصة انه في بعضها تاخذ ساعات سيااقه..
طبعا في الاول والاخير الراي رايك اخوي .. بس اهم شيء ال naviagtion system
ورربي يوفقك واذا عندك اي سؤال انا حاضرة

الف شكر اختي بنت دار زايد .. ماقصرتي والله

السلام عليكم
رحلتك اخوي نفس رحلتي العام الماضي تماما مع اختلاف عدد الايام بس
بالنسبة لفينا ما تحتاج سيارة بتستخدم الاندر قراند والباصات وهي افضل وسيلة تنقلات
اخر يوم لك في فينا تاجر سيارة وتطلع فيها الى سالزبورق وتخليها معاك وتروح فيها الى زيلامسي وترجع الى سالزبورق وتوقف السيارة وتاخذ القطار الى ميونخ احسن لك
العام الماضي اخذت سيارة فورد فوكس من شركة بدجت طلع اليوم علي 32 يورو وعليك الحساب سعرك غالي مرة
وصدقني ماراح تندم لانك اخذت سيارة
انا احس بدون سيارة كيف بتروح في زيلامسي والقرى اللي حول سالزبورق تراها متعة حقيقية
فندق لاتيني ممتاز بالنسبة لي بس اهم شي يكون معاك سيارة
طبعا النفيقيشن شي اساسي لانه بيسر لك كل شي
احنا العام الماضي للاسف كنت جايب معاي وخرب فمشيت الرحلة كلها خرايط والحمد لله ماكان عندي مشكلة لاني اعرف استخدمها
اتمنى لك رحلة سعيدة وموفقة
ابوعبدالرحمن

سلالالالالالالالام يا اخوان اذا كان الافضل للاخ انه ما يستاجر لانهم بس اثنين....
طيب احنا بالنسبة لنا اكثر من عايلة حوالي 20 شخص ونبي ناجر سيارة بس ما احنا عارفين من وين يا ليت الاخوان يفيدوني؟؟؟؟؟

اذا يمديك تغير او تقلب الرحله وتصير ميونخ والرجعه من فيينا يكون احسن لان السيارات في ميونخ مره ارخص وفيها نفيقيشن وهو ضروري
المهم اذا ما يمديك روح لموقع بدجت بصراحه ارخص ما لقيت في مطار فيينا هم بس حاول تحجز من النت لانك لو جيت السعر مره غالي وعالعموم السيارات لو حجزتها معضم الشركات ما تدفع لين تاخذ السياره
واي مكتب يحجزللك من الموقع وياخذ عليك رسوم فرح انت لموقع الشركه واحجز بنفسك واذا تبي مساعده ابشر بسعدك
ارى انك تستأجر سياره اذا خلصت من فيينا وبكيفك عاد تبي تسلمها في سالزبرغ او ميونخ ( وللمعلوميه ترا يحسبون عليك حوالي 100 يورو اذا سلمت السياره في بلد ثاني )

allabban
هلااخوي ابو عبدالرحمن
لاحظت ان خط السير هذا الجميع ماشي عليه ههه
حتى و انا في مكتب السفريات بجنبنا واحد جالس يحجز برضو على نفس خط السير ..
شكله مثلي ماخذه من المنتدى ... يازين هالمنتدى اللي لو الله ثم هو كان خلينا رحلتنا في ربوع بلادي الساخنة
بخصوص فينا .. اجل شوركم و هداية الله .. اخلي تأجير السيارة لما اجي اطلع منها يعني بدل ماروح بالقطار لسالزبرغ اروح بسيارتي احسن ...
الله يعطيك العافية ماقصرت بردك ..
و بردت قلبي بخصوص لاتيني ... كنا مرة متضايقين و خايفين بس عاد بسبب عدم توافر حجز بنفس وقت دخولنا المدينة اضطرينا ناخذ فيه ..

بن سيف
هلا اخوي بن سيف
للاسف ما يمدي .. لاني قريت برضو ان ايجار السيارات ارخص من ميونخ في واحد من المواضيع
بس للاسف بعد ما حجزنا و دفعنا ..
و بخصوص الحجز ..
انت وش رايك . اقدر احجز من مكاتب بدجت و هرتز اللي في الرياض ؟
لاني شفت مكتب لهرتز على طريق خريص .. و فكرت اروح له احجز سيارة
ماعتقد ياخذون عمولة كبيرة صح ؟