زيارتنا للبنان هي بمثابة تجربة السياحة العربية في بلاد العرب ..
هي اول سفرة لنا لبلد عربي لم تكن لدينا أي خلفية عن السياحة في البلدان العربية وما هي مقوماتها إلا الوالد يعرف بس سفراته كانت أيام الصبا يعني من زمان ..
خبرتنا أكثر مع البلدان الأجنبية والآسيوية والخليجية ..

• - - - - - - - - - - - - - - - - - - - - - - - - - -

كالعادة بعد رجوعنا من سفر الصيف ,, نرجع للحر والرطوبة :36_1_47:
وبطبيعة الحال الحر يخلينا نسترجع الجو البارد والممطر والطبيعة الخلابة للدولة اللي كنا فيها
فكنت من باب الدعابة وهذا نحن ما وصلنا البلاد .. يوم نكون في الطيارة اروح اهجم على أبوية اقوله يالله نخطط لسنة الياية وين بنسافر .. وبطبيعة الحال .. يطردوني ويقولون لي .. هذا انتي بعدج في الطيارة ما وصلتي البلاد تفكرين في السنة الياية لو وصلنا شو بتسوين .. المهم .. انا قلتله اللي عندي وشردت .. قلتله: شو رايك نروح لبنان فيه وقت الشتوية وما عطاني مجال أكمل
نسيت السالفة وبدت الدراسة :36_13_3:
ويوم قربنا على نهاية رمضان قلت لأبوية شو رايك في عيد الفطر نروح لبنان نشوف كيف شتاهم ..
لكن .. ما عطاني ويه ..
وشآءت الظروف وتوفى بابا زايد الله يرحمه .. طبعا العيد ما كان له طعم ..
صحيح كانت إجازة العيد طويلة بس النفوس كانت حزينة :36_1_48:
رجعنا للدراسة مرة ثانية :36_13_3:
وهذي المرة كنت مصممة انه في إجازة عيد الأضحى اللي تكون مشبوكة مع عطلة الربيع نروح مكان
في بدأ البحث :36_1_37:
عن الفنادق .. والأماكن اللي ممكن الواحد يزورها في الشتا في لبنان
.. الطيران .. درجات الحرارة ..
لو تشوفون المواقع والصور والفولدرز اللي جمعتهم عن لبنان بتقولون هذي بتكتب كتاب عنها ..
تعرفون اول مرة نسافر لبلد عربي لازم تكون هناك خلفية عن كل شي ..
بس على كل هالتعب آخر شي أبويه ما كان متحمس وايد ومتكاسل ف فقدت الأمل..
بس قبل عيد الأضحى باسبوع تقريبا قالي ابويه وين تبون تسافرون تايلند ولا لبنان ..
او
وأخيرا اقتنع .. طبعا على طول قلتله لبنان .. لبنان فيها ثلج :36_15_17:
لبنان اقرب من تايلندا ,,
تايلندا يبالها 6 -7 ساعات عشان توصلها اما لبنان 3 ونص وبعدين سفرتنا بس لمدة 10 ايام ,,
ف قالي ابويه شوفي في النت عن اسامي الفنادق وعددي لي إياهم وقالي سوي سيرج
وشوفي الطيران المهم .. طلعت له اسامي فنادق وايد في بيروت ..
بس ابويه الله يهديه ما سمع كلامي .. سمع كلام صديقه اللي كان موجود في لبنان وعنده شقة ,,
وشار عليه بفندق في برمانا .. ما اعرف ليش سمع كلام هذا الصديق وليته ما سمع كلامه ..
بعدين بقولكم ليش ..
باليوم الثاني .. سويت سيرج على طيران الإمارات الحجوزات كلها فوول ..
استغربت كل اهل الامارات بيسيرون لبنان ولا شو السالفه ..
بس بعدين اتذكرت انه ما شاء الله حتى الجاليات اللبنانية يردون عند اهلهم يسلمون عليهم