1. المهم ركبت التاكسي وفي الطريق حدث اللي ماعملت حسابه..................


2. المهم مكثنا في كازبلانكا يومين زرنا في معالم المدينة واسواقها وقلاعها


3. تم التعديل بواسطة المغترب


4. رجعنا لاغادير ونمنا


5. المهم رجعنا من الصويرة لاغادير وروح للكورنيش كالعادة.

السلام عليكم
من خلال بحثي على النت و جدت هذا الموضوع لسائح سعودي فآثرت أن أشارككم به .
موضوع السائح السعودي بتصرف :
ورجعت من المغرب منكسر الفؤادي من بعد ماشفت اللي ماينشاف صراحة رحلة مابعدها رحلة ولن اروح بعدها لاي رحلة مرتحلة الا الى المغرب فقط ((((الولد مسحور))))))
المهم راح احكيلكم رحلتي الى بلاد المغرب من طقطق الى السلام عليكم وتحملوني وياليت اقدر اوصفلكم اللي شفته في هذه الرحلة الخيالية.
وصلت الى كازبلانكا في الصباح حوالي الساعة 6 المهم بعد الجوازات طلعت من بوابة المطار ووقفت حوالي ساعة وربي منبهر بالجو والبراد والفله والوجيه الحسنة والله ساعة كذا مبلم وماكلني البرد ومتحسف اني ماجبت هدومي الشتوية اشتيبها قبل الشتاء.
المهم رحت نزلت لمتروا الانفاق وقطعت التيكيت متوجه الى منطقة الميناء حيث انها قريبة من الاوتيل اللي ساكنين فيه الشباب اللي هو فندق رياض السلام في منطقة عين ذيابوصلت بالقطار وهذي اول مرة اركب قطار ركبت درجة اولى ب 40 درهم يعني حوالي 16 ريال سعودي المهم وصلت الى الميناء ومنها ركبت تاكسي يوديني للاوتيل.

المهم ركبت التاكسي وفي الطريق حدث اللي ماعملت حسابه..................

وحنا ماشين قام الشوفير يدور في جيب بابه على شي وشوي الا مطلع ذيك السكين والله كنت بفتح الباب وبفقع لاكن صبرت شوي ورجعها وانا ساكت شوي رجع وخذاها وانا دمي في رجليني وانشلت حركتي وفي الاخير........ حسبي الله عليه اثره يبي يطلع الشريط من المسجل وانا رحت فيها
ومن جد نزلني للاوتيل والله خليت الباقي له ولا خذيت ولا هللة.
المهم وصلت الاوتيل وادخل ذاك السويت اللي مابعد شفت مثله صراحة فندق روعة وعلى المحيط الاطلسي على طول وطل مع التراس وشوف الناس والمسبح والرياضة الصباحية التمساحية وسبحان الخالق.

المهم مكثنا في كازبلانكا يومين زرنا في معالم المدينة واسواقها وقلاعها

تم التعديل بواسطة المغترب

المهم معنا سيارتنا الخاصة وانطلقنا بها الى أغادير وجهة السياح وتبعد حوالي 500 وحبتين كلم من كازا والطريق خط واحد لاكنه ممتع مو مثل خطوطنا صحراوية وعج لا لا خضرة وبراد وقرى ملونه وسدود وانهار وكل الطبيعة تشوفها في الطريق .
ومن المدن اللي مرينها واعجبتنا مدينة الجديدة وصراحة حليوه وتغدينا فيها على مااعتقد(((لاتفهمون غلط دايخ من النوم))) المهم ونطلع الجبال والطرق الوعرة اليين ومن خلف الجبال والسحب طلعنا لاغادير درة المدن.....
المهم وصلنا بعد غيبة الشمس ورحنا لفندق شيراتون اغادير وصراحة من جد ماينفع للشباب لاكن كنا دايخين وهو اول فندق يواجه للي داخل لاغادير من الشمال.
المهم سكنا في الفندق ثلاث ليالي وهو قريب من الشاطئ والكورنيش وكل المطاعم والملاهي قريبة منا وكل يوم في الكورنيش اللين حفظوا وجهي وصاروا يسلمون علي........
بعد الثلاث الايام اللي تعتبر مقبلات الرحلة جاء الدسم واستاجرنا ذيك الفله في مساكن ابن خلدون فله راقية وسعرها رخيص بالنسبة لابها ومصايفنا الامينة.
وصار اللي صار وقلنا خلونا نروح نكتشف المناطق اللي حولنا ورحنا لنطقة اسمها اموزار او كلمة حولها وفيها شلالات على كيفك لاكن طريقها وعر وكله غابات والبنزين يعبونه بالتنك عند البقالات .
وصلنا لها وشفنا بقايا الشلال لان الشلال يقولون يظهر في أواخر شهر مارس وبعدها يقل.

رجعنا لاغادير ونمنا

في اغادير وكل المدن المغربية الكبيرة سوبرماركت كبير تلقى عنده كل احتياجاتك اسمه مرجان وصراحة روعه ويوسع الصدر وتلقى فيه كل الضروريات .
جاء يوم من الايام وقلنا بنروح مدينة اسمها الصويرة وهذي في الشمال ورحنا لها وصراحة حلوه وفيها قلعة على البحر قديمة وفيها البضائع ومن ابرز منتجاتها الاصواف وزيت الزيتون والاسماك والسمك تاكله من البحر للمائدة وعلى كيفك اسماك صراحة ماقد شفتها وعلى الطاري واحد من الشباب مسوي ولد نعمة يوم شاف السمك قال مافيه ماكدونالدز قريب.

المهم رجعنا من الصويرة لاغادير وروح للكورنيش كالعادة.

جاء يوم وانطلقنا لمدينة في الجنوب على البحر اسمها سيدي موسى وفيها قبر موسى ذا على البحر وفيها اوتيل وفندق وهي قرية مش ولا بد واحلى مافيها طريقة حفر الجبال على البحر لتكون سكن للصيادين.
المهم بعض الايام الشباب يكونون نايمين واستغل الفرصة وافاخت لحالي المهم واركب تاكسي لوحدي ودرى اني سعودي وقال انت ساكن في فندق صحارى قلت لا قال اها اجل تروح هناك قلت لا قال غريب؟؟؟؟؟؟؟؟؟؟ المهم كثرت الاسئلة وقلت بروح صحارى وش قصته ورحت صراحة كني في السعودية كل الشباب هناك .
المهم اغادير مدينة رائعة وحلوه ويميزها اسواقها القديمة او سوق الاحد على قولتهم وفي كل مدينة مثل هالسوق الاثري الرائع الموجود داخل قلعة قديمة.
ورجعت من المغرب على امل الرجعة اليها في اقرب فرصة وافكر اني اذا تقاعدت بعد 50 سنة ان شاء الله ان اسكن هناك وبكيفكم
على العموم رجعت من اغادير لكازبلانكا عن طريق الجو وبسعر حوالي 300 ريال مع التخفيض لاني تحت 26 سنة حسب قانونهم واحتريت الرحلة المتجهه للسعودية ورجعت اجر خطاي محمل بالهدايا والهموم واحلى الذكريات التي لاتنسى.
(((((يقولون ان المغاربة يسحررون لاكن اقول اللي يشوف البلد وخضرتها وبحرها وجوها وناسها صدقوني ينسحر من غير ان يسحره بشر.)))))
انتهى كلام الأخ السعودي .