ماهي إجراءات الفيزا ؟
أسهل منها مافي أبدا ً , بعد ما يرسل لك المكتب الساحي في روسيا الدعوة السياحية, تآخذها وتتوجه للسفارة بالرياض أو للقنصليه في جدة , خذ معاك صورتين شخصية مكشوف الرأس
إذا دخلت من بوابة القنصلية يستقبلك الموظف أو الموظفة روسيين يتكلمون اللغة العربية بشكل جيد, ويعطيك الأبلكيشن,تعبي الأبلكيشن وتكتب فيه معلوماتك كامله تنتظر دورك على الشباك.
بعد ما يأذن لك موظف الشباك بتقديم أوراقك . يطلب منك الأبلكيشن وجواز السفر والصور, ويعطيك وصل بنكي يطلب منك سدادة في بنك الرياض بقيمة 394 ريال سعودي...البنك جنب القنصلية في جدة, مسافة 2 كيلو تقريبا أو أقل ومن الافضل انك تروح للقنصليه بدري لأنهم يشتغلون من الساعه 9:30 للساعه 1 ظهرا ً. بعد ذلك وبمجرد انك تسدد الرسوم وترجع للقنصليه , تلقى جواز سفرك جاهز والفيزا ملصقه بالجواز.
هل يشترط تقديم ضمان مالي أو كشف حساب مثل طلبات بعض السفارات الاوروبية ؟
لا , ما يحتاج
هل أحتاج تأمين طبي ؟
لا , بدون طبي..بعد حصولك على الفيزا تكون جاهز للسفر.

بالنسبة للمكاتب اللي توفر الفيزا بجدة أو بالرياض ما انصحكم فيها لأسباب.
1-يطلبون مبلغ خيالي شوي على الفيزا يكون من 950 إلى 1100 ريال.
2-إنت تقدر تحصل على الفيزا بنفسك من القنصليه مباشرة بقيمة 394 ريال-عاد شوف الفرق- لكن يلزمك دعوة سياحية.
وهذا الشي اقدر اخدم اخواني اعضاء المنتدى الغالين فيه..أطلبوا وانا تحت امركم.
افضل الخطوط إلى روسيا!!!
على حسب المدينة...إذا كانت الرحلة إلى موسكو
فيه مطارين في موسكو.
الأول شيرميتيفا - شمال موسكو
والثاني دوماديدوفا - جنوب موسكو
وفيه مطار ثالث كان ياما كان من قديم الزمان تطير منه رحلات مباشرة لجدة بس من كم سنه ألغو الرحلات المتجهه للسعودية.. وإسمه فنوكوفا...خلونا فالأول والثاني.
فيه خطوط طيران تنزل على المطار الأول وفيه خطوط طيران تنزل على المطار الثاني, وفيه خطوط تنزل على المطارين.
كل المطارين داخل العاصمة ومو بعيدة وفيه أكثر من وسيلة مواصلات تآخذك من وإلى داخل المدينة ( التكاسي - الباصات - القطار)
لكن أنصح بالنظر في مكان الفندق , عشان تقدر تختار المطار الأقرب له...كلنا عارفين ان الواحد يوصل تعبان ووده يريح,وفيه كم ساعه فاليوم موسكو تكون فيها زحمة يالطيف.

جهد رائع تشكر عليه و ماهو غريب عليك
جبتها في الثمنيات ياهداف حارتهم لأني ناوي ازور موسكو في ابريل 2012
أولاً مينسك ثم موسكو و سانت بيتسبرغ لمد أسبوعين لوحدي كيف نجدولها
علماً بأن تخطيطي جدة - اسطنبول ثم الى روسيا
فضلاُ ابلاغي بكيفية ارسال دعوة لي ولو على الخاص
وبعدين مينسك تحتاج دعوة أيضاً هل تتم عن طريقهم ؟
ولو عندك أي اقتراحات للرحلة قولنا عليها
لازم نشوفك هناك اذا كنت متواجد ... تحياتي

(هداف حارتهم) و (اخر فرصة) و ننتظر عضو بإسم (قول) ههه
حياك يالغالي, اسبوعين حلوة مو شينه...نجدولها بشهر مارس إن شاء الله حتى تكون فعاليات الربيع في ابريل واضحة بشكل اكبر.
مبدأيا نقول...5 ايام موسكو 4 ايام بيتربورغ 4 ايام مينسك.
أكيد ان شاء الله موجود... بالنسبة للدعوة احتاج لصورة من جواز سفرك مو أكثر
بالعادة طيران التركية تنزل اغلب رحلاتها في موسكو على مطار شيرميتفا ... حلو جدا فيه بالجهه هذي في فنادق رخيصه وحلوة.
للأسف مااقدر ارسلك رسالة خاصه لسا عظمي طري ومشاركاتي ما تعدت ال50 ههه
انت جرب ترسل لي رسالة وانا بشوف اقدر ارد عليك او لا.
موفق خير

حيا الله هداف حارتهم بس أنا مشفتك تجيب هدف
سؤالي يا الغالي أذا سمحت أود بزياره لروسيا للمدن اللي ذكرتها بالربيع (مارس)
من وين أجيب الدعوه من غيرك مثلآ.
وكيف أحتاج لمترجم معاي طول الأيام
وكم المبلغ لمدة 7 أيام

حياك الله يابو محمد.. إذا تبي الدعوة من غيري الله المستعان ههه رح للمكاتب بالسعودية وحك جيبك
المترجم, فيه مكاتب سياحية عندها مرشدين سياحين يتكلمون العربية بس غالين شوي وحسابهم بالساعه...ويفرق السعر من مرشد ذكر لمرشده انثى.
وفيه عرب , طلاب أو مقيمين .. بس ما انصح فيهم
تحس فيهم شوي استغلال للخليجي ,احكي لك قصة واحد من ربعنا قابلته هنا ويشتكي..الاخ طاح في عربي يترجم له ويشتكي من الديره يقول غاليه ومدري شنو ,سألته وش زرت في موسكو؟قال رحت للمطعم الفلاني والمكان الفلاني...يوم قالي حطيت يدي على راسي...اماكن غاليه والاخ المترجم يآخذه على هالأماكن و يقوله هذي اماكن اسعارها ممتازة مقارنة بالبقية...فهمت على طول ان الاخ مو بس اخذ اجرة الترجمة , الا بعد زار اماكن يبي له يجمع فلوس شهر عشان يدخل ويجلس فيها ويطلب براد شاهي ههه
عموما وانا اخوك ما اشوف فيه داعي للمترجم بشكل دايم , لأن الأماكن العامه والسياحيه أغلبها تلقى ناس فيها يتكلمون بالإنقليزي..لكن اذا احتجت ممكن نلجى للمكاتب
حط بجيبك مبلغ 5000 للسكن والسياحية من درجة 4 نجوم
التذاكر لو تحجزها قبل السفر ب شهر او اكثر تطلع لك رخيصة حول 2500

تحت امرك يالغالي.
نورت الموضوع

الله يعطيك الف عافية اخوي
وفيه ناس كثير ما يعرفون عن روسيا شي , وانا اولهم ف ياليت تنورنا اكثر , آنار الله قلبك بالايمان .