السلام عليكم ورحمة الله
كنت وكثير ممن هم على شاكلتي عندما نسمع ان شخص سيسافر الى لبنان اول مايتبادر الى اذهاننا الغلاء الفاحش ,
لدرجة اننا ننسى الدعاء له بالعودة سالماً ونردد عبارات :
(الله يعينك على الصرفيه) او (بتنق لين تقول بس) , وغيرها من العبارات.
طبعاً اتحدث عني وعن ممن هم على شاكلتي الي على الله ثم على الراتب ,,, والسفر يبيلك قبلها بأربع شهور تبدأ
تحوش مبلغ تستمتع فيه بسفرة متكاملة.
انا ناوي بإذن الله السفر الى بيروت هذه الصيفية وقرأت كثير عن بيروت في هذا المنتدى الرائع , بصراحه الاوضاع تشجع
وبشكل كبير على السفر.
يعني اذا بحثت عن سكن لك ولعائلتك فالاسعار معقوله جدا...
العام الماضي سافرت ماليزيا 15يوم كلفني السكن فقط 7500ريال , بواقع 500ريال يومياً , وكانت الاسعار اغلبها على
هالمستوى الا اذا بغيت تسكن بفندق مش ولابد .
في بيروت حصلت سكن لمدة ثمانية ايام بمبلغ 2600 ريال تقريبا . فندق اربع نجوم وحصلت اقل واكثر وفي مواقع جميله.
بخصوص الاكل تقريبا اسعاره منطقيه , يعني بحدود 300ريال يومياً لشخصين , قابلة للزيادة والنقص حسب الطلب .
الغلاء الذي لاحظت الكثير يتكلم عنه هو السوليدير , يعني الجلسه تعتمد على عدد الاشخاص والمنيمم تشارج والموقع .
وبخصوصي انا بما اني بروح مع عائلتي فما راح اكون متواجد كثير بالسوليدير لاني بزور المعالم السياحية والمدن والخ
الخ .وهذا تقريبا بيكلفني يوميا 300 ريال كحد اقصى.
بقي السيارة , لاحظت الكثير ينصح بسيارة مع السائق وهذا الي ناوي عليه ان شاء الله , والسعر تقريبا 300ريال باليوم كحد
اقصى.
الخلاصة : التوتل العام لليوميه 1225 ريال يومياً تزيد او تنقص حسب ترتيبك للرحله.
بماليزيا العام الماضي كانت اليوميه تقريبا 1300ريال .
قد يكون الغلاء الذي يقولون في شيء اخر لم اتطرق له .. الله اعلم !!.
في النهاية قد اكون بالغت بنظر البعض وقد اكون واقعي بنظر البعض لكن هذا ما لاحظته .
واتمنى من الله ثم منكم تصحيح وتعديل وابداء أي ملاحظات على ماكتبت خصوصاً وان موعد السفر لم يحن حتى الان كما
ان هذا الموضوع هو اول موضوع لي
كلمة حق لابد ان تقال :تصفح موقع العرب المسافرون يضاهي متعة السفر .