- بعد كم لفة في المزرعه دخلنا جو البيت وسوينا فطور يحبه قلبكم شكشوكة
مساء الخير يا شباب
اليوم جاي احكي لكم حكايتي مع القصيم
أنا ومجموعة من الأصدقاء محمد وعبدالله اتفقنا اننا نطلع لمزرعة ابو محمد في البكيرية بالقصيم
اتفقنا تكون رحلتنا استكشافية ولأكثر من مكان في القصيم على اساس ان رحلتنا راح تكون ثلاث ايام
جهزنا السيارة بالأغراض اللي نحتاجها لأنه ممكن نكشت في البر على حسب ظروف المكان والطقس >> متعوب عليها الطقس
طلعنا بسيارة جيب لاند كروزر 2009 وتوكلنا على الله مشينا على الفجر يمكن الساعه 5 ووصلنا على الساعه 9 الصباح
رحنا على طول على المزرعة حطينا اغراضنا وقعدنا نشوف المزرعة لأنها كبيرة وفيها حضيرة أعنام وبقر وزارعين خضروات وفواكه
بعد كم لفة في المزرعه دخلنا جو البيت وسوينا فطور يحبه قلبكم شكشوكة
أفطرنا وطلعنا نتمشى في البكيرية شوي ، طبعا البكيرية أغلبها مزارع لخصوبة الأرض فيها اخذنا لنا كم لفة ورحنا شفنا مقصورة السويلم وهي معلم تراثي بالبكيرية وهي عبارة عن قصر أثري كبير وكان لها دور بارز في تاريخ البكيرية
وطلعنا شفنا سور البكيرية القديم ومسجد ومقصورة الراجحي التراثية وهي احد معالم البكيرية
بعدها رحنا لبريدة كانت الساعه يمكن 2 الظهر مهب بعيدة عن البكيرية يمكن 25 دقيقة وصلنا وأول شيء رحنا لمطعم كودو وتغدينا الحمدلله وطلعنا بعدها طلعنا نتمشى
بعدين رجعنا على المزرعة وقعدنا بعدها طلعنا رحنا على بريدة ندور شقة علشان نسكن فيها وبعد كم لفة اتفقنا اننا نسكن في فندق السلمان
وبعد ما ارتحنا شوي كان الوقت العشاء طلعنا لكوفي اشترينا قهوة وطلعنا نتمشى بشوارع بريدة الى ما لقينا مطعم واتعشينا ورجعنا على الفندق
من بكرة اليوم الثاني افطرنا في الفندق وبعدها طلعنا رحنا لمتحف بريدة وطلع ما يفتح الا على الساعه 4ونص العصر
بعدها مشينا لعنيزة وهي قريبة من بريدة طبعاً كنا سامعين عن بيت البسام المهم وصلنا وسألنا عن بيت البسام وين مكانه ورحنا له بعدها دخلنا على البيت وهو عبارة عن قصر طيني بصراحة شيء مرة خيالي القصر يتميز بطرازه المعماري القديم سقوفه عالية بصراحة القصر شيء غريب
والبيت دورين ومقسم شيء مرة خيالي وبالصدفة لقينا جنب القصر سوق المسوكف الشعبي فيه محلات حرفيين للرجال والنساء وهو سوق شعبي قديم طبعاً بس مكتب الآثار في عنيزة طوّروا السوق يبيعون المقتنيات التراثية وفيه متحف للتراث ، السوق كبير وفيه اشياء حلوة شرينا منه بساط ( الحصير )
بعدين متنا من الجوع لقينا في السوق الشعبي حرمه قاعدة تسوي أكل شعبي وطلبنا منها اكل وقلنا ما نعرف عطينا على ذوقك عطتنا شيء اسمه ( كبيبة ) هذا شيء يشبه ورق العنب بس مسوينه بطريقة ثانية وشكله مربع وأكله ثانية اسمها ( حنيني ) وكانت بصراحة لذيذة وطلبنا من عندها ( مطازيز ) وطبعاً مين اللي ما يعرف المطازيز
بصراحة كان الأكل لذيذ وكان عندها بعد أكله اسمها ( قشد ) بس ما أكلنا منها بس كان الأكل لذيذ وحلو والله شبعنا الحمدلله وهذه المأكولات تعتبر من الأكلات الشعبية والتراثية اللي مشهورة في القصيم ، المهم بعدها طلعنا ورحنا لقلعة أثرية فوق جبل اسمها قلعة الصنقر وهذه قلعة قديمة فوق جبل وباقية الى الان كان شكلها خرافي كان الوقت بعد العصر وكان الجو معتدل وحلو
كان عليها سياج بس قربنا لها شوي وكان شكلها حلو وباين انها كانت من القلاع القديمة بعدها رجعنا لبريدة ورحنا على الفندق نرتاح بعدها قررنا نطلع ونروح على المتحف اللي في بريدة ورحنا المتحف وشفنا ابرز تراث المنطقة اللي عارضينه بالمتحف وفيه قاعات علمية وثقافية وتاريخية وقعدنا نشوف مكتبة بريدة اللي في المتحف وبعدها طلعنا رحنا تعشينا في سرفت بيتزا ورجعنا دايخيين على الفندق ونمنا بعد يوم حلو وممتع
اليوم الثالث قررنا نروح لحصاة النصلة وهي حصاة كبيرة يقولون انها المكان اللي يلتقي فيه عنترة بعبلة ويقولون انه المكان اللي يربط فيه الفرس لما يجي يقابل عبلة >> عاد ما صدقنا قلنا خلنا نروح نشوف ههه الصخرة على الطريق السريع بين بريدة وحائل وعلى الصخرة هذه كتابات ونقوشات قديمة ( ثمودية ) وعليها رسوم لحيوانات متنوعة
بعدها طلعنا للرس رحنا نشوف برج الشنانة اللي كثير سمعنا عنه ووصلنا للرس بعد يمكن نص ساعه وعلى طول سألنا عن مكان البرج طلع بعد 7 كم من الرس ورحنا شفناه بصراحة من الأشياء اللي لفتت نظري وأعجبني جاي شكله على شكل مخروطي ومبني من الطين ويتكون من عسرة أدوار وسقفه من الخشب والبرج كان برج حربي للمراقبة بصراحة من أجمل الأشياء التراثية اللي شفناها
وبعدها اتصل فينا واحد من الجماعه وسألنا رحتوا للمذنب قلت له لا ... قال روحو لبلدة المذنب التراثية وبعدها سألت الشباب نروح قالوا ايه وتوكلنا على الله ومشينا للمذنب ومرينا محطة واشترينا كم غرض وطلعنا ووصلنا للمذنب وسألنا عن البلدة التراثية ورحنا لها بصراحة وش ذيك البلدة عبارة عن سوق بشكل بلدة كبير بلدة تراثية متكاملة تحتوي على سوق المجلس التراثي وتعرف باسم حي الديرة تحتوي البلدة على أكثر من 350 منزل أحجامها مختلفة ومسجد قصر باهلة نقطة بداية الحي ومركزه الرئيسي .
وفي هذا السوق تصير الفعاليات والمهرجانات مثل فعاليات الصيف والمزادات الشهرية اللي يسوونها وألعاب شعبية وأشياء كثيرة بصراحة أخذ وقتنا هذا السوق لأنه كبير بالمرة طبعاً يومها من كثر ما لفينا بالسوق تعبنا رجعنا على بريدة يمكن بعد العصر ورحنا على الفندق وكانت اخر ليلة لنا اتفقنا نختم رحلتنا بشوي في البر
طلعنا على السوبر ماركت اشترينا اغراض الشوي دجاج متبل وكباب وكاتشب >> وهذا الأهم بعدها طلعنا وادي الرمة والوادي من اكبر وأشهر الوديان في المملكة وقعدنا هناك وبسطنا مع البيبسي والفصفص والشوي والسوالف وقعدنا الى الساعه 11 بالليل طبعاً ما طولنا لأنه تعرفون اهل بريدة ناس محافظين وهذا من الأشياء اللي ما خلتنا ندخل سوق في رحلتنا لأنه ما معنا أهلنا
تعشينا الحمدلله ورجعنا على الفندق وقال واحد من الشباب خل نمسك الخط ونمشي .. وبعدها توكلنا على الله ورجعنا الرياض وكانت الرحلة من أجمل الرحلات اللي طلعتها أنا وأخوياي واتفقنا على رحلة ثانية بس ما بعد اتفقنا على وين بالضبط وان شاء الله نشوفكم في رحلة ثانية
ونخليكم مع الصور وان شاء الله تعجبكم
- بعض الصور أخذتها من بعض المواقع زميلنا محمد معاه باقي الصور وسافر وما أخذتها منه
المشب في مقصورة السويلم
بئر ماء في المقصورة
سوق المسوكف
قلعة الصنقر
تحياتي لكم ولأهل القصيم
تسلم على التقرير