ناطرينك
بس إذا سمحت صغري الخط
ترى أعضاء المنتدى شباب مو شياب

جيد الى الان...............قولي لنا كيفية تعاملهم بالاخص مسلمين وعرب من جميع النواحي.

أختي fw_kw
بداية فيها جذب و فيها تشويق و ما زال الفضول يسبقني للتعرف على فصول هذه الرحلة ،،،
ليتك تذكرين لنا التاريخ او الوقت لان مبين عليها قديمة شوي
و ياليت ما تنسيننا من الصور اذا أمكن و من التفاصيل المملة
وتقبلي تحيات
أخوك
كبيان

اشكر لكم تواصلكم معاي وانا فخوره جدا بهذا
المنتدي الراقي وباعضائه الراقين في تعاملهم
يابو عزيز انا كبرت الخط عشان ماتتعبون بالقراءه . لكن لاجل عينك اصغره
نسيت اقولكم سفرتي هذي كانت سنه 1997 كانت الفيزا تطلع بعد 3 ايام من تاريخ التقديم موالحين
اول ماوصلت امريكا . طبعا ماكنت اعرف ولا احد ولاكان احد باستقبالي وهذي اللحظه اللي انا كنت احاتيها
من لما كانو اهلي يودعوني بالمطار هم يبكون على فراقي وانا ابكي علي هذي اللحظه المهم نزلنا من
الطياره في مطار شيكاغو مطار تميت امشي مع اللي كانو معاي بالطياره والحمد الله كان في طلبه وايد معاي على الرحله والحمد الله مشت الامور علي كاونتر الجوازات ورحت لسير الحقائب واخذت اغراضي طبعا هذي اول مصيبه شلون بشيل الشنط من السير ومثل ما انتو عارفين ان احنا متعودين احد من عمال المطار هم اللي يشيلون الشنطه مو احنا . تميت اشوف شنطي تلف وتلف وتلف والله وماني قادره استوعب اني لازم اشيلها بنفسي وانا عين على شنطي وعين على الطلبه اللي كانو معاي في الطيار كنت اشوفهم عشان كنت بلحقهم على مطار الطيران الداخلي طبعا الشنط اللي معاي كانو 4 اربعه بعين العدو .....
وياريتهم كانو وحده . تمت الشنط تلف ومن بعدها نزلوهم من السير وحت اخذ العربانه وحاولت احطهم عليها والحمد الله وبعد عناء طويل قدرت احطهم وامشي رحت المطار ركبت الطياره اللي بتوديني لاوهايو طبعا انا بالطياره الحين وكلمت طايحه من التعب علي شويه اول ماقعدت علي الكرسي قلت الحمد الله يالله انام شويه الحين لين نوصل لاني ليما الحين ماغفت عيني من قبل ما اسافر من الكويت المهم توني بحط راسي علي جنب والا بذاك الامريكي اللي يقعد جنبي وليه لاحول ولاقوة الابالله وتقريبا كان عمره بين 25-30 سنه وشكله اعوذ بالله ايدز يمشي على وجه الارض قبل ماتقلع الطياره ولا واحد جاني من اول الطياره وشكله كان خليجي جا جنبي ان كان يقولي تبين تغيرين كانك قلت ليش قالي تروحين جنب زوجتي وانا اقعد مكانك انا كان التفت على مكانه وشفت زوجته وشكلهم توهم متزوجين وانحرجت افرقهم من جنب بعض طلع الرجال كويتي الله يعطيه العافيه لكن انا مارحت خوفا من الاحراج
وصلنا المنطقه الموعوده الساعه 10.45 بتوقيتهم وكان الوقت ليل طبعا انا من الطياره قاعده اشوف المطار والله ماصدقت انه مطار من حجمه الصغير انا الصوره اللي في بالي اني بنزل الحين مطار مثل مطارات و حيات اوربا في عيني وماني قادره اتخيل امريكا نزلت من الطياره ومشيت ولا انصدم بالمطار الصغير وقفت افكر والله ان جاني شك ان مايكون هذا المطار المقصود والله اني تميت واقفه والناس كلهم مشو وراحو وانا واقفه استوعب الوضع طبعا المطار من كثر ماهو داثر مااعتقد له صور بالدنيا لان محد يشتهي يصوره المهم وانا واقفه جاني واحد من عمال النضافه وقالي بصوت عالي يالله روحي اخذي اغراضك احنا بنسكر المطار (بنقفل المطار) اول مره انا اسمع انا في مطار يقفل بعد الساعه 11 ليلا
مشيت طبعا مشيت شوي مو وايد وطبعا انا تعودت علي الشيل والحط شفت شنطي يلفون ولكن الحمد الله مالفوالالفه وحده ونزلوهم من السير جيت احطهم على العربانه ولا بذاك الكويتي مره ثانيه اللي مع وزجته جا وشالهم عني وحطهم علي العربان وقالي في احد بياخذك من المطار طبعا من الاحراج قلتله اي وانا بالصدق محد بيجيني ولا ادري وين بسكن المهم راحو الناس اللي معاي وانا بقيت بروحي في المطار والمنطقه مقطوعه ولا فيه خدمات ولا تكاسي ولا شي شفت واحد من الي يشتغلون في المطار وقلتله ابي تاكسي كان يقولي روحي علي البي فون يعني كبينة التلفون رحت عندها ولا من سوء حظي المكينه تاخذ كواتر عمله معدنيه وانا اللي معاي شيكات سياحيه وكرديت كارد الوالد ودولارات ولا عمله معدنيه كانت معاي تميت اتلفت يمين وشمال ماكو احد بر خالي ورب عالي كان اشوف نفس العامل واحد ماكو غير في هالمطار ويكمن يكون بعد اهو اللي سايق فينا الطياره سئلته شلون استخدم التلفون كان يقولي ليش انتي اول مره تستخدمين التلفون قلت له انا اول مره فيها اسافر لامريكا وماعرف ولاشي
طلعت له 20 $ وقلت له اتصلي علي تاكسي شاف 20$ انثول وكانه شايف جني اتصل من فلوسه وطلبلي تاكسي وجا التاكسي وركب شنطي اعطيت العامل 40$ من فرحتي اني لقيت احد يركب شنطي سئلت التاكسي عن اقرب فندق للجامعه وداني Day inn هذا نوع من الفنادق تكون ممرات و غرفه الفندق تطل
على الشارع يمكن يكون نجمتين شفت الفندق انصدمت وقلت له ودني اي فندق ارقي من هذا ومايكون بالداون تاون والحمد الله وداني هوليد إن ونزلت وحجزت لي غرفه وطلعت للغرفه وطبعا والتاكسي وهو يلف بالديره وانا قاعده اشوف الشوارع وألعن الساعه اللي فكرة اسافر لامريكا والله احس ان روحي بتطلع من الهم اللي قاعده اشوفه والله كلمة المنطقه قفيره وبدائيه شويه وطبعا ظلما وماكو اناره في الشوارع والله واشارات المرور معلقه بخيط بين الشارعين والله العظيم ابوي ماسوي فيني خير يوم ارسلني بروحي لهذي الديره
خليكم معاي في الحلقه الجايه عشان اقولكم وش صار في اول ايام الغربه
وراح احطلكم صور بيتي هناك

السلام عليكم ورحمة الله وبركاته ماقدرت اتأخر عنكم ورجعت لكم باسرع من البرق احب استعرض معاكم ايام غربتي
بعد مانزلت للفندق ودخلت غرفتي دقيت على اهلي ابيهم يردون علي ماكو احد وتميت ادق عليهم ولما رد على ابوي واول ماكلمني قعدت ابكي واعاتبه على قراره ومشورته اللي ودتني ورا الشمس
وقال كلمه والله انها ليومكم هذا ترن في اذني قالي:" يبا الدنيا صعبه ولازم الواحد يحفر بالصخر عشان يقدر عيش عزيز فيها واذا انا ماسويت فيك جذي باكر الدنيا تسوي فيك اكثر تحملي وصبري والله كريم "
سكرت التلفون منه وقمت صليتلي ركعتين شكرت لله على اني وصلت لبر الامان بعد هذي الرحله الطويله والصعبه
قمت ثاني يوم من النوم من الساعه 7 الصبح ليش ما ادري معني مانمت الا الساعه 2
كلمت الفندق تحت عن الجامعه وين تكون واقرب شقق للايجار هناك وقالولي شوفي اليلو بيج دفتر العناوين
والحمد الله شفته ولا في اكثر من مجمع سكني راقي قريب من الجامعه طلبت تاكسي ورحت اشوفهم شفت اول واحد وكان اسمه كانتري كلب country club ووايد عجبني واهم شي كان فيه انه منور طبعا كان في النهار انا رايحه لكن شيكت عل اعمدت الاناره هناك كان المجمع وايد راقي وحلو واجاراته مناسبه
الشقه غرفه وحدا صاله وحمام ومطبخ 600$
الشقه 2غرفه 2 حمام وصاله ومطبخ 750$
جم .حمام سباحه ..........الخ
لكن للاسف ماكان عندهم شقق فاضيه
رحت للمجمع الثاني وكان جنبه اسمه انفر وست وهم المجمع الثاني كان راقي وايد واجدد من الاول
واسعاره كانت اغلي طبعا من الاول
وكان ليما الحين ماخلص من البنيان (كانو يبنونه)
سئلتهم عن اجار شقه قالولي ماعندنا غير وحده وكان اجارها 950$ +ديبوزت 950$
2 غرفة نوم 2 حمام صاله ومطبخ وغرفت غسيل ملابس وكراج سياره قالت واوكي
يالله ااجر قدمت ابليكيشن وردو علي ثاني يوم بالموافقه
طبعا هذا كلا كان قبل الاعمال الاهرابيه وتشويه صورة العرب كانو قمه بالمعامله الانسانيه الراقيه و ردا علي الاخ الفاضل مهاجر 3553 راح اقولك بكل تفصيل عن معاملتهم معانا قبل وبعد الاعمال الاهرابيه
اتركم مع الصور

هذي صورة المجمع من الخارج

هذا كراج السياره
المطبخ

الصاله

وان شاء الله تحوز على اعجابكم وخلوني اقولكم عن اول ايامي في الغربه بالحلقه الجايه