- الكويت – الدوحه – باريس – الدوحه – الكويت
- عدد الأشخاص
- أنا واخوي
بسم الله الرحمن الرحيم
احب اشكر كل العضوات والاعضاء اللي افادوني بمعلوماتهم وتقاريرهم بدون ذكر اسماء لاني اخاف انسى احد واشكر المنتدى على هالمنتدى الروعه
في البدايه ماحبيت انزل موضوع لانه ماكو شي يديد في موضوعي لكن بعد موضوع الاخ طير قررت انزل موضوعي يمكن افيد البعض بالامور اللي احصلتلي هنااك
وقت الرحله
30/5 إلى 6/6/2008
خطوط الطيران
خط الرحلة
الكويت – الدوحه – باريس – الدوحه – الكويت
طبعا ماتتخيلون انا اشكثر بخاطري اروح باريس وكنت اخطط للسفره من اشهر واقرى مواضيع عشان استفيد وكل موضوع اقراه للاعضاء يزيد الشوق والرغبه لي في السفر
طبعا بحكم اني بسنه تخرج كانت السفره هديه من الوالد والوالده الله يطول بعمرهم لكن سفرتي كانت اثناء اختبارات الفاينل يعني تخيلوا انا قدمت 3 اختبارات من باجر سافرت ولما رجعت من السفر قدمت اخر اختبار وطبعا فجأه اصدفت بالوقت هذا لانه اخوي اللي بوديني ماعنده اجازه إلا هالوقت واذا مارحت ماراح اروح نهائيا فقل اهم شي السفره الاختبار مو مهم ههه وتمت السفره
عدد الأشخاص
أنا واخوي
طبعا حجزنا التذاكر عن طريق موقع القطريه وكانت التذكره رخيصه اعتقد 160 دينار للشخص ومكاتب السفريات كانت اب 230 دينار شوفو الفرق ولحسن الحظ انه سفرتي كانت بتاريخ 30 لانه اب 31 الموقع رفع سعر التذكره لي 230 دينار
الفندق
الفندق من فئه 4 نجوم
موقع الفندق
http://www.royal-elysees.com/
رايي بالفندق
من مميزاته : قريب من الشانز تقريبا 3 دقايق مشي وعند الشارل ديقول ومحطات المترو وسعره حلو 60 دينار باليله والفندق دورين ومايوصل 20 غرفه حتى
من عيوبه : الغرفه صغيره والحمام صغبر وانا هذا ماعندي مشكله فيه لكن المشكله انه الاثاث شوي لكم عليه
يعني انا برحلتي الفندق ماكان همني اقعد بفندق كشخه لانه الفندق ماني قاعده فيه بس لوقت النوم واستفيد من فلوسي بشي ثاني
انصح بالفندق للشباب من حيث الموقع واللي تفكيرهم نفس تفكيري
او ممكن يشوفون فندق ابعد شوي لكن اثاثه وايد احسن ونفس السعر مثل
Best Western Premier Elysees Bassano
وراح اجربه المره اليايه ان شاءالله
التاريخ 30/5
يوم الرحله قمنا الصبح وتريقنا وقطنا السايق المطار ودخلنا اغراضنا
وكل شي كان تمام
وتقهوينا بكافيه لحين موعد طيارتنا
كان موعد الطيران اعتقد 9:40
ركبنا الطياره وكانت صغيره وعطونا سنااك وجبه خفيفه
وصلنا الدوحه
والترانزيت كان ساعتين
بعدها ركبنا طياره اكبر وحلوه
والرحله مريحه ولكن عيبها شي واحد
الطياره كلها فرنسيين يمكن بس اثنين 4 خليجين معانا والريحه اصرعتني
والله والله ماني قادره اقعد من الريحه
وهذي كانت مشكلتنا
والريحه تخيلو طول 7 ساعات
لكن بعد ما تشبعنا من الريحه الاحساس صار اقل ;Pp
وطيران القطريه ممتااز وهذي المره الثانيه اللي اسافر على القطريه وممتازه
وصلنا على 8 بتوقيتنا على ما صفطنا ههه
