- السلام عليكم ورحمة الله وبركاته
- ولقيت لي خوي بالروحة وصارت عائلية
- بس جاني حرق برقبتي ويدي أحس بحرارتها يوم كامل عجزت أنام !!
- عاد خويي يقاله يبي يفهمه إننا مضيعين وقاله من الحبلة
- طبخة لذيذة تأكل صوبعك وأنت مش حاسس
السلام عليكم ورحمة الله وبركاته
الذهاب لأبها ما جاء على البال أبداً إني أروح لوحدي لأبها لخطورة طريقها الجبلي 400 كم صعود وإنحدار على الجبال وخبري بها أول مرة ذهبت إليها إنه ما فيه حواجز على طريق الجبال يعني تسهى ولا تسرع ولا تلتهي بأي شي وطلعت عن مسار الطريق سلم لي على روحك أنت وسيارتك تبي تتقلب بالجبال وتصير تقطيع ثلاجة
ولقيت لي خوي بالروحة وصارت عائلية
وكانت الإنطلاقة يوم الجمعة التاسعة صباحاً من مكة إلى الطائف ومن الطائف نمسك طريق الباحة
الطريق من الطائف للباحة خط رايح جاي لا بأس به وقبل الباحة تقريباً ب 150 كم بدأنا بالصعود والنزول بسرعة بين 60 و 90 كم لأن الطريق راقي نازل ومنعطفات ومسلي من المناظر والهواء الجميل وصلنا الباحة الساعة 2 ظهراً وأخذنا غدانا وتغدينا في غابة رغدان وبعد الغداء انطلقنا الساعة 4 عصراً إلى أبها وكان باقي عليها 400 كم
وصلنا النماص مع آذان المغرب وكان باقي على أبها 150 كم بس السواقة بالليل خطر لخطورة الطريق بالنهار وعسانا نعبر وشلون بالليل ، هذا غير أن المسافة يالله تقطعها يعني ال 150 كم يبي لك 3 ساعات حتى تقطعها لأنك ما تقدر تسرع وسرعتك ما تتجاوز 90 كم وأكثر شي تكون السرعة 80 كم والطريق يدوخ من الصعود والنزول والهواء والتركيز على الطريق .
المهم وقفنا في النماص وأخذ شقة مفتخرة على قوله المصريين
اسمها الواحة
غرفة النوم
المجلس
شقة على كيف كيفك الليلة ب 250 ريال
بس النماص كمحافظة تجيب المرض ما فيها شي دخلنا سوق ملابس نبي نتشتري للمبزرة
ما أدري وشلون أذواقهم باللبس اللي كنا نلبسه عام 1404 توه يوصلهم بس وش نسوي مضطرين عشان ما يمرض خلوود من البرد ، وبعد ملابس شينة وأسعار غالية. ودريت أننا بنعمة بالقصيم عندنا أسواق صح بالنسبة لهم .
طلعنا من المحل ورحنا للشقة ضربناها نومة الساعة 12 وصحينا الساعة 7 صباحاً وانطلقنا الساعة 9 لنكمل المسيرة
ومشينا وفي طريقنا وقفنا في هذا المكان لروعته ومأخذين الطريق تمشي ووناسة ماهنا عجلة
وأخذت صورة للحبيب
وحنا نشمي في الطريق أخذت الصورة على الماشي
ووصلنا أبها الساعة 12 ظهراً وقعدنا ندور شقق ساعة اللي شينة واللي زين بس أسعار غالية أو ما نلقى كله مليان
أخيراً حصلنا شقة ثلاث غرف ومجلس ودوتين مياه ومطبخ ب 350 ريال الليلة شي زين بشارع الخشع شارع مخدوم من كل شي أي شي تبيه على لا يردك إلا رجلك
علطول نزلنا قشنا وريحنا ساعة وطلعنا للسودة عجلين
وحنا رايحين للسودة وقفنا عند المحل بطريق السودة
برشوم يا راعي البرشوم
عاد أنا ما أحب البرشوم لأني ما تشرفت بمعرفته قالي مقشر ب 15 ريال قلت عطن مب مقشر حنا نقشره ههه
وأنا أشوف مع ملقاط شعر أقول بقلبي وش يقشع ذا ؟؟؟؟ قالي خذه مقشر ازين لك قلت ليش قالي يلعب بك الشوك ما تشوفني اقشعه حتى من ذراعي يتطاير الشوق قلت وش شوكه ما أشوف شي وأجي بمسك البرشومي يوم صرخ بوجهي لا تمسكه ترى تصير جلستك بالسودة كل تقشيع بالشوق ثم وراني إنه شوك صغير
قلت وش الله حادك تبيعه لا صار يبي يحوسك
يا راعي العنب والمشمش
ثم كلمنا خطنا
ووقفنا عند المهبل
ثم رحنا عاد ندور لنا مكان زين بالسودة
ودخلنا مكان مخصص للعائلات وعنا غدانا جاهز من معطم ( شوايتي ) شفنا عنده زبائن قلنا أكيد أنه زين
وفرشنا وتغدينا
صورة للمكان ومعها خلودي وصديقه ولد عمته مبسوطين ههه
ثم رحنا لمكان ثاني وضبطنا الشاهي لأن دائماً بعد الغداء أصاب بخرمة شديدة للشاهي
وقبل المغرب رحنا للشقة مسطلين جايين من طريق ثم دورنا شقة وغثاء البحث ثم طلعنا للسودة أكيد نبي نسطل
وفي اليوم التالي يوم صباح مشرق أسدلت الستار عن النافذة أبي الغيوم والأمطار وأصبت بخيبة يوم شلت الستارة ولسعتني الشمس الحارقة ههه حتى الشمس عندهم حليلة بس عندنا لو تبي تزين عليها مضغوط زينت
بس جاني حرق برقبتي ويدي أحس بحرارتها يوم كامل عجزت أنام !!
ثم طلعنا للحبلة قلنا نبي نشوف وش عندهم عاد قبل سألنا عنها قالوا السودة ازين منها ولا فيها شي بس حنا جايين نتمشي ونستطلع ولا ورانا شي ولا ندل الحلبة زين سألنا وحد يدلنا الطريق ووصف لنا شي بسيط بس غلط بأحد الدورات بدال ما يقول رح يسار قال رح يمين وأمسك اليمين ومسرع ماشي 120 وأشوف يساري بيت زين وكشخة وجنبه أرض مشبكة ودايس ثم صار بوجهي بوابة وعليها عسكري وبين وبين البوابة تقريباً 500م واضرب فرامل رحنا وطي وأشوف العسكري يطلع من غرفته ويوقف على البوابة قلت رحنا وطي أكيد يبي يقولون إرهابين
عاد خويي يقاله يبي يفهمه إننا مضيعين وقاله من الحبلة
رحنا للحبلة ما فيها شي يسوى وأكثرها مخيمات شباب والشباب غريبين مره يعني تشوف 60 خيمة كلها شباب جنب بعض الخيمة لزقة بالخيمة ما أدري وشلون يرتاحون كذا إزعاج وغثاء ما كبر الله إلا الإراضي ولا يعجبهم إلا يلزقون ببعض
صور من سياراتهم شوفوا وش مسوين فيها
هذا كاتب على سيارته يعلمنا إنه ولد القحطاني
هذا يقول إني ولد الرياض وكاتب رقم جواله للمساعدة ههه !!
هذه الصورة تصلح دعاية لتويوتا
كملنا مشورانا وحسنا بالحلبة ما لقينا مكان زين ثم رجعنا لمكان جميل جنب منتزة دلغان
وجلسنا نضبط الغداء على الكاتم
وهذولا الشيوخ حنا نشتغل وهم يتقهون
وهذا مكان جنبنا يميين عندهم خلايا نحل داخل الصناديق
ثم يوم تغدينا وتقهوينا رحنا لمنتزه الحبلة فيه التلفزيك ركبناه طول المسافة 500م والعمق تحت الجبال 350 م تمشي فيه وتحتك هويه وفيه حق السوده طوله 3 كم بس يمشي على مستوى واحد والمسافة تحتك قصيرة جداً
هذا مأخذ عربة خاصة وهو زوجته سعره 320 ريال شكله عريس ويبي يستنانس ( الله يوفقه ويستر عليه )
هذا خط السير
يوم وصلنا المحطة الثانية نزلنا وتمشينا
وفي اليوم التالي كان الجو مغيم ومتوقع هطول أمطار
ذهبنا إلى السودة بعد الظهر وحصلنا لنا مكان طيب
جلسنا فيه وجلسنا نسوي الغداء
ونقطع السلطة
المحتويات :خيار + طماطم + فلفل أخضر بارد + بصل + جزر + ملح + ليمون
ثم بدأ ينزل علينا مطر خفيف يالله من فضلك
عاد يوم خلص الغداء حطيناه
طبخة لذيذة تأكل صوبعك وأنت مش حاسس
ثم قبل المغرب رجعنا وحنا في الطريق نشوف زحمة سيارات شديدة أول كان الخط رايح جاي الحين ثلاث مسارات كلها رايح قلت يمكن حادث ولا حريق الله يستر آخر شي طلع نازل مطر قوي وبرد ! وحنا بنفس المكان جاينا مطر خفيف
قناة المجد جايه تغطي
ثم طلعنا من السودة رحنا لمهرجان أبها السياحي
وأول ما دخلنا شف هذا مسوي فيها طويل لابس حديد قلت لخويي دفه عشان نتأكد هو طويل خلقه ولا لابس شي إذا لابس شي يبي يطيح على وجهه على طول
ثم دخلنا صالة التزلج
وفيها معارض تجارية بس ما صورتها كتمة وحر بس الواحد يدور الباب يبي يطلع
صور منوعة من أبها
من السودة
المطر مصوره من الشقة
أبها وحنا رايحين لخميس مشيط
هذي العربة اللي تسوقت فيها من العثيم
مطعم السنارة أكلات بحرية في خميس مشيط
اكله زين بس بارد والعصير حار
وهذا منتزه الأمير سلطان الحضاري بخميس مشيط جينا له الظهر وفيه مهرجان بعد العصر بس رحنا وتركناه لأن الدخول ممنوع الظهر ولا بعد خلصوا منه يشتغلون فيه
خط الرجعة كان من الطريق الساحلي هرباً من الجبال
الخط سريع بس التحويلات كثيرة ومطبات ومره يصير خط مزدوج ومره رايح جاي والطريق كله غبار إلى البقالة تدخل تشتري منها كل البضاعة مغبرة
بداية النزول من الجبال 20 كم تقريباً حتى نمسك الخط الساحلي
الخط السريع
وبهذا تكون الرحلة انتهت
والحمد لله كانت رحلة ممتعة وانبسطنا فيها
شكرا لك اخي صاحب المشاركة