أول شي أحب أشكر أعضاء المنتدى على هذا الجهد المبذول و اليوم باكتب لكم أول تقرير لي في هذا المنتدى عن فرانكفورت.
ليش فرانكفورت؟
لكثرة روحات لأمريكا عن طريق فرانكفورت بخطوط اللفتهانزا, قررت هذه المرة أني ازور فرانكفورت. وطبعا
ما كان عندي خلفية عن المدينة الا من قراءة لموضوع احد الاعضاء الكرام عن فرانكفورت.
البداية كانت مع الفيزا, طلباتهم كانت كثيرة الحقيقة علي بما أني اول مرة اقدم على الفيزا الاوروبية وكان التقديم من احد القنصليات في امريكا القريبة من ولايتي, و بصفتي طالب سعودي عطوني فيزا متعدد الزيارات و لمدة 6 أيام فقط للدخول و الاقامة! بعد متعدد الدخول ليش ما أدري!!؟
عموما, جا الوقت و هبطت في مطار فرانكفورت و كان الوقت في الصباح الباكر تقريبا 6 و نص, وصلت محل الجوازات و كان فاضي, أنا توقعت انه بيسألني أسئلة واجد بما أني سعودي, و لكن بس طالع في الجواز و ختم عليه, مشيت شوي ألا واحد و قفتني بعد ما شاف عند الجواز الاخضر بس قال لي وين رايح؟ قلت له فرانكفورت لمدة يومين, قال لي تفضل! معاملتهم كانت افضل بكثير مما توقعت, يعني حتى تجربتي مع اليابان لما رحت لها للمرة الثانية استقبلتني بنفس مسدودة وحدة يابانية و س و ج زي ما صار حق الاخ الاماراتي مع انه كان رايح للمرة الثانية بعد!:112:
على أية حال, وصلت للمحل اللي كان لازم اقرر فيه اذا باخذ تاكسي و لا قطار و لا ايش بالضبط, كان ودي اجرب القطار علشان اقل شي اعرف استخدمه في السفرات الجاية وارخص بس قلت خلني اخذ لي تاكسي و بلا وجع راس! رحت محل التكاسي و اذا بي ألقى تكاسي كثيرة صافة و لا احد معبرها و المشكلة كلها مرسدسات!! خفت انها تكون اغلى من التكاسي العادية بس اكتشفت ان التكاسي العادية كلها مرسدسات!! دورت لي سايق مش عربي بنصيحة من أحد الاقارب, و لكن ما عرفت أفرق من العربي و اللي مش عربي! بس اخترت واحد اقرب لانه يكون مش عربي!! جاني و اخذ الشناط و فتح الشنطة و اذا بالصدمة!! سجادة مزخرفة!! اكيد عربي!!:112: ركبت و عطيته اسم الفندق و لا كلمته لفترة
مشى فيني في وسط الاشجار و كان المحل مظلم جدا و هذا محل بين المطار و المدينة, كلمني شوي و قال لي انت من وين؟ قلت له أنا من السعودية و قلت خلني أساله نفس السؤال و قال لي أنا من أيران! قلت زين ,”ما ادري ليش كثير نصحوني ان ما اتعامل مع العرب في الخارج بس يمكن كان عندهم تجارب سيئة معاهم و اللي عنده خبر يقول لنا" عموما وصلت الفندق و كانت حاجز في الميريديان و لكن غيرت الحجز الى فندق فرانكفورتر هوف بنصيحة قريتها من احد الاعضاء الكرام بالمنتدى.
دخلت الفندق, و كان الفندق فخم, كل الناس كاشخة حدها!! اكثرهم لبس رسمي! رحت الاستقبال و انا كنت حاجز حق ليلتين بس جاي بدري شوي و لا ابي ادفع حق ليلة ثالثة و كنت خايف انه يقول لي تعال الساعة 3 العصر لانه الليلة تبدا من 3 العصر, و لكن رحب فيني و قال لي روح افطر و بعد ساعة تعال استلم الغرفة. رحت فطرت دفعت حق الفطور 28 يورو :112:و لكن كان محل فخم و لاحظت انه اللافتة مكتوبة بعدة لغات منها اليابانية و استغربت!! حتى في الطريق الى الفندق لاحظت عدة مطاعم يابانية, فتوقعت انه هناك كثير يابانيين و فعلا الطاولة اللي جلست عليها كان قدامي 2 يابانيين.
البوفيه كان جيد, فيه محل للاجبان و الزيتون و محل لليابانيين اسماك نية و ربيان من الصباح"بس أنا اعز الاكل الياباني و لا كان عندي مانع اكل سمك من الصباح الباكر" و عصيرات طازجة و فواكه و وحدة تسوي لك بيض, و طبعا شاي و كوفي يقدمونه لك على الطاولة
خلصت فطور و كنت تعبان لاني ما نمت في الطيارة بس كنت قاعد اطالع افلام!! فقلت خلني اشوف الرجال يمكن الغرفة جهزت مع انه مرت ساعة الا ربع, و رحت له و قال لي غرفتك جاهزة قلت يا سلام
رحت فوق مع احد الموظفين و لفت نظري شغلتين, شنب الموظف طويل و موقفه يمكن بجل او شي, و الاسنسير ما كان فيه عداد رقمي عداد الادوار اللي برة الاسنسير كان مثل الساعة زي اللي نشوفه في الافلام!! وراني الغرفة و جاب الشنط و مالقيت صرف يورو اعطيه بقشيش قلت عطه دولارين, عطيته دولارين و حسيت ان فيه شي غلط مش عاجبه يمكن هذا كبير الموظفين ما يتبقشش بس انه بعدين شكرني و راح. بس يمكن ان علشان الدولار طايح هاليومين و الله اعلم
بعد ما شفت الغرفة حطيت راسي و نمت
هذي صور من الفندق
"كيف اضيف الصور يا جماعة الخير؟؟؟"
و صاح الديك و سكت ميشو المغامر عن الكلام
نكمل في الحلقة المقبلة