وصلنا المطار صغير جدا
مكان استلام الأمتعة صغير....
وأصلا الناس اللي كانوا معنا على الطيارة عددهم قليل جدا....
معلومة : معظم أهل الأزور لم تسنح لهم الفرصة بزيارة كل الجزر...
بالرغم من أنهم يعيشون في نفس المنطقة...
وذلك لأن التنقل بواسطة الطائرة مكلف جدا للفرد....
حيث يصل سعر التذكرة ل 300 يورو للشخص
والأزوريين مستوى دخلهم محدود ..فصعب عليهم السفر لباقي الجزر
استلمنا الشنط...
طبعا أحلى مافي الطيران المروحي هو إن العفش يوصل بسرعة البرق
وصلنا ...انتظرنا...عادة يوجد شخص لاستقبالنا...
مافي حد !!!!!!!!!!!!!
لا لحظة قلت لزوجي شوف هذا ميني باص الفندق اللي بنسكن فيه
عليه الإسم
قلت له اسأل الحرمة اللي واقفة جنبه
قال لا خلينا ننتظر..
بعد شوي جت الحرمة نفسها وكلمتنا..
وطلعت فعلا هي من الفندق
ضحكني اسلوبها قالت انتوا رايحين فندق بهذا الإسم
قلنا نعم..قالت انا خبروني إن في حد جاي بس ماعرف اسمه
قلنا هذي أولها الله يعينا على تاليها خ
المهم زوجي هو اللي صعد الشنط في الميني باص..ليش؟؟
لأن الحرمة هي اللي تسوق الميني باص
كانت معنا عائلة أخرى....فقعدنا في المقعد الأمامي
طبعا أنا كنت محشورة بالنص
وصلنا الفندق في ثواني...
ثواني
الفندق قريب من المطار جدا...
انا ماشفت شي غير دوار صغير وبعده وصلنا
الفندق اسمه Hotel Ocidental
كلمة Ocidental
أوسيدنتال بالبرتغالي تعني الغربي...
ووصلنا الفندق الغربي ...
الفندق ن ج م ت ي ن
نعم نجمتين فقط
شوفوا النجمتين شحلاتهم
معلومة : العمل قائم على إنشاء فندق 4 نجوم في الجزيرة
زوجي أصيب بحالة من الذعر والقلق
أول مرة نسكن فندق نجمتين
ههه...
قلت لزوجي ليش خايف... مو انت اللي اخترته؟؟؟!!!!!!
دخلنا وشوي نشوف الحرمة اللي استقبلتنا في المطار واللي تسوق الميني باص..
هي نفسها موظفة الإستقبال
طبعا احنا مش مستوعبين...
ههه
وعن نفسي ماقدرت اخفي ابتسامتي اللي طلعت غصب عني ....
وانا احاول اخفيها كردة فعل على اللي شفته.....
اخذت الحرمة كل المعلومات...وخبرتنا إن غرفتنا في الطابق الثاني...
طيب جميل...وين اللفت؟؟؟
عفوا مافي لفت استعملوا السلم
زوجي:36_1_25:
مسكين أنا هالمرة ماخليت شي ماحملته معي في الشنط
عندنا شنطتين كبار...وشنطتين صغار
المسكين طبعا حملهم...
بس طلع الطابق الثاني يعني نصعد السلم طابق واحد ونكون في الطابق الثاني
الحمد لله بعد...
دخلنا الغرفة ..واهني زوجي ما استحمل
الفندق مافيه تكييف
قال مستحيل اقعد..
زوجي أبداً مايقدر ينام بدون مكيف....
أما أنا فتأقلمت مع الوضع
حتى إن زوجي دايما يقول عني ...لو زوجتي يخلوها في جزيرة لحالها
بتعرف تدبر روحها وبتصنع شي من لا شيئ....
شكرا على الإطراء خ
ولكن هذا واقع....أنا تقبلت الوضع وقلت له انا ما أبي أغير المكان
يود مينونك لا اييك اللي أين منه
هذي الجملة اللي قلتها
قلت له انت مفكر إن في فندق ثاني أحسن يعني؟؟؟
الجزيرة خالية أنا ماشفت فيها حد...
المهم هو يروح ويرجع ويتفحص المكان..
أما انا خلاص حطيت أغراضي ورتبتهم خ
عادي متقبله الوضع...
هذا شكل الغرفة ...بصراحة هي نظيفة يعني يمكن اعتبارها غرفة شاليه...
الشراشف نظيفة وريحتها حلوة..
مع إن الحمام الله يعزكم قديم شوي ومستهلك...
لكن ...عديها....المهم فيه قليل من النظافة
هو كل شوي يسألني متأكده ماتبين تغيرين الفندق
اقوله أكيد ما بغيره.... بنفتح باب البلكونه وبيدخل علينا الهوا
فتحنا الباب وشفنا المنظر
الفندق كموقع ...ماعليه كلام
مقابل البحر بالضبط
معلومة: درجات الحرارة في فلوريس معتدلة في النهار وباردة في الليل
مدة إقامتنا كانت 3 ليالي...يعني ماكانت فترة طويلة الواحد مايقدر يتحملها...
طبعا لما سألنا عن فنادق ثانية قالوا لنا في فندق ثاني بس هذا أحسن واحد
خ
لاحظوا ....هذا أحسن واحد؟؟!!!!!!
بعدها قرر زوجي يشتري لنا ماي ومشروبات ;)
يتبع....

وراح زوجي يستكشف المكان رجع وهو متضايق...
قال لو تعرفين من وين اشتريت الأغراض
قال مكان مثل المستودعات والناس هناك شكلهم مجرمين
عاد أنا زوجي أعرفه هو متضايق على الفندق
وسوى الناس مجرمين
خ
طبعا العكس هو الصحيح الناس في قمة الطيبة
المهم الغرفة مافيها ثلاجة
وين نحط الماي والمشروبات الغازية علشان تبرد
وين؟؟
في البلكونه خ
نعم البكلونه كانت ثلاجتنا
طبعا لحد الآن مافي شي يجذب في جزيرة فلوريس أكيد بالنسبة للقارئ
لكن...وفي الليل....فتحنا باب البلكونه ....
طبعا الباب مهيأ انه يدخل الهوا بدون ماتدخل علينا الحشرات
يا الله يا الله شو أقول وكيف أوصف
برد والله أنه أحلى وأبرد من عشرين مكيف
الغريب إن في النهار كان الجو عادي
بس من غربت الشمس ...صار الجو بارد
ومن هنا جاءت فكرة الثلاجة البلكوناوية
المهم احنا خلينا المشروبات بره وبعض المأكولات اللي تتأثر بالحرارة
وجنينا على نفسنا
طول الليل كان في طير صوته غريب
والله كأنه واحد قاعد يستهزئ بحد خ
واعو واعو واعو واعو
هذا صوته خ
والله جذي بالضبط بالضبط
غريب صوته ..خبرونا بعدين أنه هذا هو طير الأزور ...اللي اشتقوا اسم الأزور منه
ويشبه النورس ...لونه رمادي شوي
هم شافوا الأكل بره وكانت في محاولات حثيثة للوصول للأكل
خ
شو هالثلاجة المكشوفة في العراء
ههه
المهم أنا نمت أحلى نومة كنت وايد تعبانة
وكنت أصحى بين فترة وفترة واسمع صوت البحر ..
وابتسم وارجع أنام..
وصحيت الفجر على صوت أمواج البحر وهي تصدم بالصخور....
ما أروعه من شعور...
بالنسبة لفلوريس أهم شي يكون عند الإنسان تقبل إنه يضحي بالتكنولوجيا...
وبحياته المرفهة
ليجرب ولو لمرة الحياة البسيطة الطبيعية.....
عن نفسي عشقت المكان ...وحبيت البدائية والبساطه اللي هو فيها...
بالأخص بعد آخر تجربة سويتها في الجزيرة واللي باذكرها في نهاية هذا التقرير.
صليت الفجر ...
وقعدت اشوف الشروق.....منظر في غاية الجمال
أضف إلى ذلك المنظر.....الجو البارد
ماشاء الله ...مازلت أذكر تلك اللحظات
وأول شي سويته هو ....
هو
غسيل الملابس
خ
حطيت الملابس اللي بنفس اللون مع بعض...
سديت البانيو
وغسلت..
عقدتي أنا النظافة...مسحوق الغسيل مرافقي الدائم في كل رحلاتي ...
ونشرت الغسيل
شفتوا إن الحريم مفيدات في السفر
يتبع ...

المهم طبعا كل هذا وزوجي نايم
بعد ماصحى واشتكى ستين مليون شكوى عن المكيف...
توجهنا للمطعم علشان نتريق
الريوق بسيط...نوع من الأجبان...خبز....عصائر....وكورن فليكس
والخدمة ممتازة ...حرمة وحدة بس تخدم كل الطاولات
وماشاء الله عليها كبيرة في السن
لكنها أنشط مني ماشاء الله....
بعد الريوق نزلنا ننتظر سايقنا علشان الجولة....
ولقيينا شخص واقف يتكلم مع موظفة الإستقبال وكان يضحك
هذا هو سيلفيو..وماذا أقول عن سيلفيو
قال لنا صباح الخير وبوجهه البشوش ...أنا سايقكم وبنتظركم في السيارة....
ركبنا نجيب الكاميرا وقال لي زوجي السايق شكله طيب
والإنطباع كان صحيح...
أول نقطة انطلقنا لها هي اني ادور مصلح لكاميرتي
طبعا مش معقولة واصلة هالمكان وما اقدر اصور
وسيلفيو تعاطف مع مشكلتي وماقصر معنا
أخذنا على محلات بيع الكاميرات.....
طبعا آخر شي كنت أتوقعه إن يكون في الجزيرة حد يبيع كاميرات
الجزيرة هادية وهي من أكثر الجزر انعزالا
المهم وصلنا المحل ...والكل نصحني اني آخذ الكاميرا لوكيل النيكون عندنا
أحسن طبعا
فما كان عندي خيار ثاني غير إني اشتري كاميرا جديدة
وكان ذلك...كاميرتي الحبيبة الجديدة السوني سايبر شوت
من فلوريس وهالشي ماراح انساه
اني اشتريت الكاميرا من هالمكان
ونوعها للي سأل عنها Cyber-Shot W130
طبعا الأسعار نار
يعني يمكن فرق السعر لنفس الكاميرا اهني 800 درهم تقريبا
لكن لم تكن هذي المشكلة...الطامة الكبرى كانت انها بدون ميموري كارد
والميموري كارد مختلف عن اللي استعمله للنيكون
طيب بكم الميموري كارد....ال 1 GBب 420 درهم
تخيلوا واحنا يبيعوها عندنا ب 15 درهم
المهم سيلفيو ماقصر ودانا على محل ثاني ...وتمينا نتنقل بين المحلين كذا مرة
وفي المحل الثاني الميموري كارد كان ب 180 درهم
واخذت آخر 2 عندهم
والمسكين ولا تضايق ولا قال شي بالعكس دوم يضحك
ودمه خفيف ويعلق طول الوقت
المهم اشترينا الكاميرا ك Back Up
لو تفاقم وضع نيكونتي الحبيبة.....
بعدها على طول انطلقنا في جولتنا....
ومن ابتدينا بدا سيلفيو يتكلم معنا عن الإمارات وكان يسأل عن نمط الحياة فيها
وطبعا هو سامع عن دبي من قبل..وشايف برنامج عن برج دبي
لكن...بعد شوي تحول الموضوع.....
وبدا يسأل عن نمط حياتنا
والله ياجماعه إنه كان يسأل بكل اهتمام...
خلوني اقول لكم ليش حبيت هالجزيرة وايد بالرغم من بساطتها
لأننا في الواقع 90 % من حواراتنا طول اليومين اللي خرجنا فيهم مع سيلفيو كانت عن الإسلام..
والله وبدون مبالغة...الريال كان مهتم بصورة غريبة ...
وحتى لو نسكت شوي ....يرجع يسأل سؤال جديد....
وأسألته تدل على ذكاء وحب للمعرفة...
وفي نفس الوقت البحث عن اجابات مفقوده عنده في دينه الحالي
هو طبعا مسيحي بس مش متدين....
أما بقية الحوارات فكانت مزح وضحك...سيلفيو يتمتع بروح مرحة
ابيكم تتخيلون معي الشعور
انتوا في جزيرة كلها خضرة وزهور ...في منتصف المحيط....
وعظمة الخالق تتجلى لكم في كل بقعة منها
أضيفوا إلى ذلك إنكم تتكلمون عن الإسلام
عن الله سبحانه وتعالى وعظيم قدرته.....
عن الرسول صلى الله عليه وسلم ومكارم أخلاقه...
عن القرآن والقصص التي وردت فيه...
والله إني كنت أصاب بالقشعريرة في بعض المواقف بالأخص عندما كنا نتكلم عن دلائل الإعجاز القرآني...
عيناي ترى صنع الخالق ...وقلبي يهفو بذكره
سبحان الله
توقفنا عند نقطة للمشاهدة...وسيلفيو مهتم كل الإهتمام بعاداتنا وتقاليدنا
الحين لما أشوف المناظر والصور أتذكر كل الحوارات اللي درات بينا في هذي المواقع
ولذلك لما بحط الصور ألحين مابقولكم وين هالمكان...
بقول لكم الحوارات اللي درات مع سيلفيو...وكيف كان مهتم بشكل مش طبيعي بنمط حياتنا وثقافتنا وديننا....
شعور لا يوصف والله انا نذكر الله في كل وقت من رحلتنا هذي
وهذا اللي خلاني احب هالجزيرة حتى لو كانت ماتحوي على كل شي
رجل واحد من فلوريس ..
خلاني أغير نظرتي في الجزيرة رغم بساطتها
وأتأكد من مدى طيبة الأزوريين
ملاحظة: بالرغم من عدد السكان القليل في فلوريس ...وبالرغم من أنهم معزولون عن العالم والتطور
إلا انهم لم يرمقوني بنظرات الإستغراب اللي شفتها في سان ميغيل
على العكس تماما...
الناس هناك ...على طبيعتهم...كجزيرتهم
نقاوة النفوس تقابل نقاوة المكان والطبيعة
بصراحة أطيب الناس هم على هذه الجزيرة
هذي اول نقطة وشاهدنا سهول الزهور الصفراء...
شوفوا كيف اللون أصفر من لون الزهور...
شارع في فلوريس
بعدها توقفنا عن هذي النقطة...
والحوار مستمر ....
يتبع...لكن بعد حين .....

اتشرف بالرد اول وحده
الصراحة ذكرتيني بنفسي بوايد اشياء انا مثلج اذا شي صار و مانقدر نغيره اتقبل الوضع و اتاقلم معاه عكس زوجي مثل زوجج
ذكرتيني في رحلتنا لوندرمير Lake District في بريطانيا ... على روعة و جمال الطبيعة هناك بس اب هاذي انا عكسج كلش ما استانسنا المكان ما فيه سياحة و المطاعم تنعد على الاصابع و نفس الشي فندقنا كان بيت بسيط بس نظيف و احنا كنا حاجزين غرفة بلطابق العلوي بس يوم دشينا و شافوا جناطنا اهم بروحهم حطونا باقرب غرفة بالطابق الارضي و كانت اغلى من اللي فوق بس ما دفعونا شي يحليلهم.. من تجربة ودنرمير قلت خلاص مستحيل اروح اكتشف مكان يديد طقة الجزر اللي قاعد تروحينلها !!

حب المغامره اللي فيج هي اللي ميزة الرحله .. على ما قريت من رحلتج هذي .. فلوريس هي الجزيره اللي خضتي فيها المغامره الحقيقه .. حلو الانسان يبتعد عن التكنولوجيا شوي يعيش حياه البساطه والنقاوه..
سيلفيو كانت حوارتكم معاه حلوه وبالاخص انكم ما شاء الله مثقفيين من الناحيه الدينيه .. على فكره ترى يوم شفت صورته في المنتدى الثاني حسيت ويهه فيه رحمه ونور الله يهديه ويصلحه يا رب ...
نتريا رحلة الالف ميل ترى هذي احلى شي انا استبق الاحداث واايد ادري
في الانتظار ريشوه

الاخت/ ريشه
السلام عليكم ورحمة الله وبركاته ،،
اذكر هذا الاسم جيداً ، نعم اذكره .. ولا زلت احفظه .. اذكر منذ اشهر كنت اتصفح الانترنت من اللاب توب الخاص بي على المكتب ، وزوجتي كانت هناك في صالة المنزل واضعه المركى وفوقه اللاب توب الخاص بها .. فجأه صاحت بي ..!! الحق ..!! تعال ..!! بسرعه ..!!
خرجت من مكتبي واتجهت اليها مسرعاً خوفاً من ان يكون هناك مكروه قد حصل ..
فلما وصلت عندها قالت لي اقرأ هذا الموضوع ..
قرأت الموضوع ولم ارفع رأسي الا وأنا منتهي منه ..!!
رفعت رأسي .. وانا اشعر بأن الكره الارضيه توقفت عن الدوار وأن رأسي هو من قام بالدوار بدلا عنها .
الاخت/ ريشه ..
لم اعلم انك موجوده في منتدى العرب المسافرون الا اليوم ..
هنيئاً بالعرب المسافرون بك .
هنيئاً بالاعضاء بك .
هنيئاً للابداع أن بكون متعلق باسم ريشه ..
اختي ريشه ،، واصلي .. بارك الله فيك .
اخوك/
رجل شرقي
قطر

يعطيك العافية ريشة ... جزء جديد ممتع ...
متشوقة أقرا أحاديثكم حول الاسلام مع السايق
ومتشوقة لاتعرف من خلالك على هذه الجزيرة الجميلة
بالانتظار

ماشاء الله عليج يا ريشه
أولا تقبل الله طاعتج وينعاد عليج يارب
ثانيا الحمدلله إني لحقت على الموضوع من أوله
ثالثا تبارك الله لا قوة إلا بالله
الطبيعه رهيبه
ذبحتيني من الضحك على اللي استقبلتكم وما تعرف أسمكم وبعد هي اللي تشتغل في الفندق " طلعت بتاع كله "
وبصراحه السكن في فندق نجمتين مجازفه
بس شكلج استمتعتي
متابعين معاج يابدعه التشويق والاثاره
وربي يمتعج بنعيمه في الدارين

ريشه انتي مبدعه في تقاريرك تسلم يمينك