أختي المتأملة
أولا : الحمد لله على سلامة الوصول
ننتظر الحلقة الأولى من التقرير ، رحلة القدوم إلى مكة بالتفصيل ثم بعد ذلك بقية التقرير فيما بعد
نحن بالانتظار0000000000000

الحمد لله على السلامة
تقبل الله منا ومنك صالح الأعمال
بانتظار التقرير
أخوك

الحمد لله
على سلامتكم وتقبل الله منا ومنكم ...
ومافي أحلى من مكة المكرمة بيت الله والكعبة المشرفة ..
ننتظرك وننتظر تقريرك عزيزتي المتأملة ..
تقبلوا تحياتي ..

1. أولا الله يعينكم على قراءة تقرير المتأملة التي تحب التفاصيل

أولا الله يعينكم على قراءة تقرير المتأملة التي تحب التفاصيل

ثانييا:ربما لايكون في تقريري ذلك الشيء الجديد على الكثير منكم لكن ربما يقرأ التقرير عضو أو عضوة ليس من هذه البلاد ولم يسبق له السفر لمكة أو له وقت طويل منذ أن زارها آخر مرة.
ثالثا:مهما كانت الأحداث متشابهة في كثير من الأحيان فكل تقرير له طعمه ويحمل سمات الشخص الذي كتبه فأحيانا تجد أكثر من شخص زاروا نفس المكان في نفس الوقت وكل واحد منهم يكتب تقريرا مختلفا.وأحيانا يستفيد الشخص حتى من معلومة بسيطة أو شيء لم يخطر له على البال قبل السفر.
رابعا:أتمنى أن يستفيد الجميع من تقريري هذا وأن لايكون مملا للبعض منكم ،ومن أحس بالملل فرجاء أن لايكمل قراءة التقرير
أشكرك أخي أبو ناصر 25 لمبادرتك بالرد على موضوعي، وبإذن الله سأوافيكم بما أقدر عليه ،وشكرا أخي مسمار وهذه بداية تقريري حتى لايطول الانتظار،وشكرا أخي أبو أحمد111وشكرا للدعوات.
قررنا السفر في هذا الوقت نظرا لأن زوجي لم تحصل له إجازة إلا بهذا الوقت مع أني كنت أفضل أن أذهب قبل هذا الوقت لأن مكة في هذا الشهر (رجب )تكون مليئة جدا بإحدى الجاليات التي لاأرتاح لها أبدا ومكة زحمة جدا بالطبع من جميع الجنسيات الأخرى فالبعض لديه اعتقاد بفضل العمرة في رجب ولم يرد عن النبي صلى الله عليه وسلم شيء في ذلك وإنما ورد عنه فضل العمرة في رمضان فقال صلى الله عليه وسلم : (عمرة في رمضان تعدل حجة )،وكنا في بداية الأمر نبحث عن حجوزات في عدد من الفنادق مثل دار التوحيد ومريديان وهيلتون وبعضها لم نجد فيه حجز لأنها مؤجرة لشركات أخرى وبعضها لم يناسبنا من ناحية السعر والموقع وبعد بحث ومشاورات استقر رأينا على فندق شيراتون مكة ووجدناه مناسب لنا من ناحية السعر والموقع وحجز زوجي فيه ببطاقة الفيزا قبل ذهابنا بثلاث أسابيع تقريبا جناح عبارة عن غرفتين وحمامين الغرفة ب460 وبما إنها غرفتين 460+460=920ريال ،وهذا السعر لأن فيه خصم للشركة الي يشتغل فيها زوجي .
فندق شيراتون مكة هو من فئة الخمس نجوم يقع على شارع الغزة والمسافة للحرم قريبة جدا (خمس دقائق مشي) تقريبا والدخول للحرم من باب المروة الي مقابله صوالين الحلاقة التي لاتهدأ أبدا في جميع الأوقات
كنت قبل السفر مجهزة ثلاث شناط وسط لي ولبناتي وزوجي وبعدين اختصرتها لشنطتين الي تسحب بالعجلات لأن المدة قصيرة والواحد يخفف من الأغراض أحسن وأريح ولأننا قررنا إننا ماندخل الأغراض العفش عشان ماننتظر في مطار جدة ونكون خفيفين أحسن فزوجي معاه شنطة وأنا شنطة والشغالة شنطة وكيس صغير فيه أغراض خفيفة مثل مويه وعصير وبسكويت للطريق لأن الواحد ساعات مايكفيه الوقت يشتري وعصفور في اليد خير من عشرة على الشجرة ومع إني مو دايم في السفرآخذ الشغالة معاي حتى لو معاي البنات لكن عشان مسكينة تكرف طول السنة وهي مسلمة وحابة تروح مكة فقلت آخذها معانا نكسب فيها ثواب .
كانت الرحلة يوم الأثنين الساعة 8صباحا على الخطوط السعودية ،ووصلنا المطار على الساعة 7وربع ونادوا على الطيارة الساعة 7ونص واستغربت بنتي وقالت لي :بهالسرعة قلت لها :لأن مامعانا عفش .ركبنا وأقلعت الساعة 8و10دقايق تقريبا ،وقدموا لنا مع الرحلة فطور وكان عبارة عن بيض أو فول مع جبن وأنا عن نفسي ماأكلت ليس لأن الأكل به شيء لكن عشان مايجيني غثيان فأنا لاأحب أن آكل البيض بالذات يوم السفر لأنه يغث شوي والفول ثقيل على المعدة في الأرض فكيف في السماء وزيادة على كذا الطيارة كان فيها اهتزازات خفيفة وأنا مو ناقصة أنغث زود لكني للمعلومية أكلت فطور خفيف في البيت قبل مانمشي لأني ماأقدر أقعد على لحم بطني طول الرحلة لازم أكون ماكله شي قبل وأنا عارفة نفسي غالبا أكل الطيارة مايصلح لي دايم يكون ثقيل أو ماله طعم الله يزيد النعمة ،وماخذه معاي في شنطتي اليدوية بنادول وحبوب الدوخة ،وأول ماركبنا قالت لي الشغالة معاك حبوب الدوخة أنا دايخة وعطيتها حبة وقبل السفر كانت تشتكي لي وتقول أنا من النوع الي أدوخ بسرعة في الطيارة وارتاحت لها لكن المشكلة في بنتي الكبيرة ماأدري وش الي جاها من ركبت الطيارة وهي كل شوي يمغصها بطنها وتحس بغثيان ماأدري هو من الخوف ولامن الأكل والمشكلة ماتقدر تاكل حبوب لأنها للحين تاخذ الأدوية على شكل شراب لأن وزنها مو ذاك الزود بالنسبة لعمرها وصرنا كل شوي مسفطين الطاولات وشايلين الصياني حقت الفطور ورايحة بنتي مع الشغالة للحمام -أعزكم الله -ومايجيها شي بس كذا إحساس ماأدري عشان الطيارة تهز ولالاعت كبدها من الفول لأنه أول مرة تصير معاها مثل هالحالة وإلا كان أخذت احتياطي من البيت ،وعموما الطيارة كانت عادية جدا وكنا في الخمس كراسي الي بالنص جنب بعض،وعشان نعرف شناطنا بسهولة حطيت عليها ستيكرات وجوه باسمة فسفورية من البيت،ولما جاوقت النزول رحت مع بنتي للحمام ولما رجعت للكرسي قال لي زوجي :وين شنطتك؟ قلت له :مو أنا سلمتك إياها بيدك عشان تحطها في الأدراج الي فوقنا ،قال ماأدري وينها وخفت بصراحة عاد كل أغراضي فيها ومابعد نزل أحد من الطيارة عشان نقول أحد غلط فيها المهم بعدين الي صار إن زوجي وهو يحط الشنط بالأول لقى درج مفتوح قريب من كراسينا وحط شنطتي فيه ونسى وين حطها ولقيناها الحمدلله ،وكان الوصول الساعة 9و50دقيقة تقريبا ونزلنا مطار جدة وركبنا مع سائق سعودي يشتغل لحسابه لقيناه أول مادخلنا المطار لأني أكدت على زوجي من البيت مية تأكيد إني ماأركب قدر الإمكان مع الجنسية الشرق آسيوية خاصة البنغالية ليس تكبرا مني ولكن لأني العام كنا محرمين برمضان وركبنا ليموزين
والسائق شكله الظاهر ماسبح من شهر والوقت ظهر ومانقدر نحط عطر لأننا محرمين ،وتركت الدريشة مفتوحة ،قال السائق:أشغل لكم المكيف ليه فاتحين الدريشة ،نقول له :مانبي مكيف وأنا في نفسي أقول نبي الفكة من هالريحة أعوذ بالله ريحة تصرع الطيرعسانا نوصل بسرعة بس،وقبلها بسنة بعد كنت رايحة مع بناتي مع سائق بنغالي وانقرفوا بناتي منه كل شوي وأنتم بكرامة يبصق ويلوع كبودنا:yuk::yuk:
كان السائق السعودي الي وصلنامهذب جدا وأخذ الشنطة من زوجي ووصلها لمواقف السيارات وركب شناطنا وكانت السيارة جمس جديدة نظيفة ومكيفة ووصلنا الفندق على الساعة 11ووربع تقريبا وأخذ السائق منا تقريبا 190ريال وعطاه زوجي 200 ريال والباقي بقشيش(ياحب زوجي للبقشيش) لأنه يقول السيارة نظيفة ومكيفة وواسعة ويستاهل .
وللتقرير بقية فانتظروني .

عمره مقبوله
والحمدلله على سلامتكم
وسلامة بنتك

عمره مقبوله
والحمدلله على سلامتكم

هلا وغلا بالمتاملة
الحمد لله على السلامة
عمره مقبولة
نحن بانتظارج لا تطولي
دمتي بكل الود

الحمدلله على السلامه وعمره مقبوله