:smile002:

في البدايه طبعا وقبل كل شي هذا التقرير هو المشاركه الاولى لي في هذا المنتدى الرائع
طبعا انا ما كنت مسجله في المنتدى ومكتفيه اني اتطالع تقارير الاخوان الي وبكل صراحه شي عجيب
لدرجة اني خجلانه انزل تقريري هذا , والسبب اني احسه صغير بين هالعمالقه الموجودين في هالمنتدى الفنان.
طبعا ما اخفي عليكم اني تعرفت على هالمنتدى عقب بحث كنت اقوم فيه للحصول على معلومات من الشبكه العنكبوتيه لسفرتنا لتايلاند
والي غدا عقبها ادمان يومي ... يعني لازم ادخل واشوف اخبار العربان فيه وشو هي اخر سوالفهم.
وللامانه كان هو السبب في نجاح سفرتنا الي كانت من احلى السفرات في حياتي
وعشان عيونكم ... ولاني لاحظت ان اخواني واخواتي ايحبون الصور وايد قررت اني اشارك بها معاكم
اخواني وخواتي الكرام عاد تقريري على قدي
فاذا شفتوا اي خطأ عشمانه فيكم ولاساتذتي الكبار ( الحوسني وبو بدر) والبقيه من الاعضاء الكرام بتنيهي له
وان شاء الله ربي انه ينول على رضاكم:36_3_11:
في البدايه مدة السفره كانت تقريبا 12 يوم
والي كانت من تاريخ 13/ 7 / 2007
حتى 24 / 7/2007
ومثل ما عرفتوا انها كانت بس لبانكوك وفوكيت
وترتيب الرحله كان كالاتي:
3 ايام في بانكوك في فندق الماجستك جراند وكانت مخصصه للعلاج
4 ايام في فوكيت في فندق الباتونق بيتش وكانت مخصصه للتمشي والوناسه
5 ايام في فندق زنث وكانت طبعا للتسوق
خلونا اول شي اندردش عن الاسعار
طبعا ابو الشباب اتعود دايما انه يحجز عن طريق المكاتب السياحيه
وانا بعد افضل وارتاح اكثر لانه بالمختصر احس الحجز من النت حوسه وصدعت راس
او باحرى ما نبغي نتعبل
الانطلاقه كانت من مطار دبي وعلى طيران الامارات
يعني حجزنا كان 2 كبار وكانت معاي بنوتي الصغيره وكان عمرها بهذاك الوقت مو مكمله السنه
وعلى ترتيب الفنادق الي شفتوه فوق
+ الطيران الداخلي الي كان بطيران التاي
المهم مالكم بالطويله البكج طلع علينا سلمكم الله 9800 درهم اماراتي
لااتقولون اكيد السعر وايد اوكي
خاصة اني دخلت على مواقع الفنادق وحسبت التكلفه + موقع طيران الامارات
ولقيت ان السعر وايد اوكي
والا شو رايكم؟؟
.............................
المهم يا جماعه رحلتنا كانت الساعه 3 بالليل
واحنا طبعا اتعمدنا نختار هالوقت عشان البنوته الصغيره اتنام في الطياره وما تزعجنا وتزعج الركاب
ولكنها ناامت من اول ما وصلنا المطار
وهاي جوله في سوق الحره في مطار دبي
طبعا الصور مب ذاك الزود لاني ماخذتنها من كاميرت الفيديو

وهذا الخان وحليله من ضحايا الترانزيت

وهذي كانت الطياره مالنا

طبعا داخل الطياره ما قدرت اخذ صور لان الصدمه الي صارت لي
انهم قالولي ان بنتج خليها على رجولج طول الوقت لان مالها كرسي ولا الها سرير
لانها صغيره على الكرسي
وكبيره على السرير
والله وكيلكم انها تمت على رجولي 6 ساعات
بغيت اموت فيها
خلونا انوقف لين اهني وانشالله لي عوده قريبه
وانتوا عاد لا اتفشلوني طيبوا خاطري لو تقريري مب ذاك الزود********> تبغي يمدحونها بالقوه