أكتشف العالم بين يديك
المسافرون العرب أكبر موقع سياحي في الخليج و الوطن العربي ، يحتوى على أكبر محتوى سياحي 350 ألف استفسار و نصائح عن السفر و السياحة, 50 ألف تقرير سياحي للمسافرون العرب حول العالم و أكثر من 50 ألف من الاماكن السياحية و انشطة وفعاليات سياحية ومراكز تسوق وفنادق، المسافرون العرب هو دليل المسافر العربي قبل السفر و اثناء الرحلة.
artravelers.com ..
بسم الله الرحمن الرحيم
أولاً وقبل كل شي أتوجه بالشكر الجزيل والتقدير والعرفان لكل من ساهم وساعد
في إنجاح رحلتنا ( العام الماضي والصيف هذا )ومدنّا بالمعلومات المفيده والقيّمه عن
أم الدنيا مصر
كما وعدتكم احبتي بكتابة تقرير متواضع لرحلتنا إلى مصر ب ( سمر 2007 )..
مع أجمل تحياتي
أختكم
ليا لي
السلام عليكم ورحمة الله وبركاته إعذروني إخواني على تأخيري ، نظراً لصعوبة تحميل الصور ، وفرزها لكثرتها .. وإعذروني أيضاً لسردي الطويل للمقدمه ، وخلطي بين الفصحى والعاميه بالكتابه ،، وذلك لعدم إلمامي بكتابة التقارير .. لن آتي بالجديد ،، لإن معظم المعلومات التي سأذكرها هنا عن رحلتي قد سبقني بها غالبية أعضاء البوابه الغاليه ، ومنهم من هم أعلى وأكفأ جدارة ومهارة مني في طرح تقاريرهم ، وحبهم لمّد يد العّون ومساعده كل من يحتاج لمعلومات سياحيه عن مصر أو غيرها .. ولكني حبيت أن أرد ولو بعض الجميل والديّن لِمن ساعدني .. وأيضاً هي مشاركه متواضعه جداً من إبنة هذا الصرح العملاق والبيت الكبير ( العرب المسافرون ) له أفضال علينا لاتعد ولاتحصى .. حفظه الله لنا من كل مكروه .. ووفق كل من يسعى ويتعب في سبيل إنجاحه حتى وصل الى هذا التقدم والرقي .. هذه المرة الثانية على التوالي التي زرنا بها مصر .. وللمعلوميه : انا لست من النوع التي تحبذ تكرار زيارتها لنفس البلد مهما كانت ، فأنا بطبيعتي أحب التغيير والتجديد وكسب معلومات متنوعه عن السياحه ،
ولكن زيارتنا هذه السنه لمصر كانت بِمحض الصدفه ولم نخطط لها إطلاقاً ،،
( ليس معنى هذا إنها لم تعجبني أو لا أُحبها ، بل العكس ، فهذا البلد بالذات يُناسب جميع الأعمار والفئات والطبقات ،وبالإخص العوائل التي معها أطفال صِغار مثلنا). لقد زرتها العام الماضي مع أفراد عائلتي دون زوجي ، فكنا ( ماشاء الله عددنا كبير ) والداي وأخوتي وأطفالي وخادمتي ، ولم أفكر لحظه أنني سوف أرجع لها بهذه السرعه ، ( يمكن نرجع لها بعد خمس سنوات أو أكثر) وذلك لسببين : الأول : كما ذكرت سابقاً حبي للتغيير والبحث عن الجديد .. والثاني : الأُستاذ لايفكر إطلاقاً في زيارة مصر في يومآ من الأيام . وكل مدة زواجنا ال ثمان سنوات وأنا أُحاول إقناعه بها وأتمنى زيارة أم الدنيا ( سبق لي زيارتها وانا طفله صغيره مع والداي و لاأتذكرها ) ولكن لاحياة لمن تنادي ، ولا مُجيب ،، لم يقتنع بها البته ، يقول : أطلبي أي دوله ( إن شاءالله في المريخ ) إلا مصر ، فقمنا بالسفر الى دول عديده في أوروبا وشرق آسيا وبعض دول الخليج ، وهو أيضآ قبل زواجنا راح لعدة دول بعيده، ولم يفكر بهذه الدوله القريبه !!! ( أخيه الأكبر منه وصديقه بنفس الوقت لم يقدر على إقناعه في زيارة مصر قبلي ،فكيف أنا ؟؟؟ ففقدت الأمل معه في زيارتي لأم الدنيا الظريفه .. كانوا أهلي وقتها يخططون على زيارتها ، وأنا ماصدقت خبر عالطول رحت معاهم انا وصغيراتي فقط ، ووافق زوجي فوراً ( علشان يفتك ويرتاح من إلحاحي ) ورحنا لها لمده أسبوعين فقط للقاهره ، وكانت رحله جميله مع الأهل . أما إختيارنا ل مصر هذه السنه مرة أخرى ، كما قلت لكم سابقاً لم يأتي بسابق تخطيط .. كنا مخططين على أي دوله أوروبيه ، أنا وزوجي فقط بدون عصافيرنا .. ( وجهة نظر زوجي إن أوروبا والدول البعيده لاتصلح للأطفال ) وخاصة اللي مايفهمون ولا يستمتعون بالسفرولا يفرقون .. طبعآ تحمست وفرحت ..بس قلت بشرط ، نأخذ الصغار وهو رفض ,, بحجة انه تعب عليهم التنقلات وزمن الرحله الطويل .. ( في سفراتنا السابقه كنا نخليهم عند اهلي ) وانا الشكوى لله رضخت له ، وذلك لعشقي وحبي الكبيير جدآ ل أوروبا .. وكانت أمنيتي أشوف فرنسا وبالتحديد باريس ( عاصمة النور والجمال ) لإني سبق ورحت لعدة دول أوروبيه أخرى .. ف جينا للتخطيط وإختلاف وجهات النظر : هو يقول هولندا أو النمسا وأنا أقول فرنسا ، ( النمسا سبق وزرناها قبل ست سنوات مع سويسرا ،، ورغم انها فاتنه وأعجبتني كثير ، وهو أيضآ ,إلا اني ودي بالتغير لدوله أخرى لم يسبق لنا زيارتها ، وزوجي كان زاير فرنسا قبل زواجنا ولا يبيها ،، وهولندا صغيره ولاتسوى الروحه لها لوحدها لازم معها دوله ثانيه ،، وكل زمن الرحله أسبوعين او اقل .. صعب نخلي أطفالنا مده طويله
وتحت إلحاحي الشديد وافق لفرنسا وموناكو ..
وبدينا بالتخطيط وإختيار الفنادق .. رابطت أنا عند البوابه الفرنسيه بالمنتدى وهات ياأسئله وإستفسارات والجميع ماقصروا ( مثلكم تماماً ) وسئلنا عن فيزة الشنقن ( الإتحاد الأوروبي ) وجمعنا الأوراق المطلوبه ، وقدم زوجي إجازه من عمله ،، وعملنا حجز طيران من الإمارات على باريس ( بس ماقصينا التذاكر ) و و و سبحان الله !!!!! وعلشان الإنسان مسّير ولاهو مخّير!!!!!! قبل وأثناء عمل الإجراءات كنت قلقه جدآ من هالسفره وماودي أترك صغيراتي وأفكر فيهم كثير ( كيف أتركهم وهم بادين يفهمون ويفرحون والعام الماضي بالقاهره كانوا مبسوطين وحنا إنبسطنا معهم يمكن علشان أهلي وخادمتي كانوا معنا ولاحسيت بالتعب معهم ؟؟؟ يمكن !!! او علشان مصر دوله بسيطه وآمنه وواضحه ،وقريبه ومافيها تنقلات زي أوروبا ؟؟؟ يمكن !!! وأحاول أقنع زوجي اننا ناخذهم ، ولازال عند رأيه ، يقول نأخذ بنت وحده بس ، صعب نأخذهم كلهم ومع الخادمه ، اوروبا غاليه وبارده عليهم ولا يتوفر شقق فندقيه بسهوله !!! .. المهم انا عدلت عن رأيي لعدم راحتي بالسفر لوحدنا وخاصة ان اهلي بيسافرون بنفس الوقت تقريبآ ، وصعب أسفر صغاري مع اهلي وحنا نسافر لوحدنا ، صعب !! إستخرت الله وقلت نسافر كلنا لإي دوله قربيه وسهله ، حتى إن شاء الله يكبرون ويخف حملهم ويستمتعون معنا بالسفر الى أي مكان بعييد .. وبعدين جاء موعد الإختيار لدوله مناسبه للجميع .. الإختيار الأول : ( دبي ) الإمارات الدوله الوحيده اللي ماأمل منها أبدآآآآآآ لو كررتها .. ( ماشاء الله دائماً متطوره ومتجدده ) وأحبها واحب أهلها الطيبين وزرناها اكثر من مره ، الله يحفظها من كل حاسد وبلادنا وجميع بلاد المسلمين ،، آآآآمين بس عيبها الوحيد بالصيف حر ورطوبه ، وزوجي مايطيق الحر ، ولايمكن يستمتع أبدآ ، ( اهم شي هو إذا إنبسط بسّطنا معه ) والعكس صحيح ورغم ان دبي فيها مهرجانات الصيف ومناسبه جدا للأطفال ( فيها مدينة مدهش الترفيهيه ) بس الجو الحار ينكد على الكل !!! الإختيار الثاني : ماليزيا و تايلند ، ماليزيا زرناها انا وزوجي قبل اربع سنوات خلاص يكفي ،، وجوها كذلك رطوبه شوي ، وغير كذا بعيده بالطيران ، اكثر من سبع ساعات ، وفيها تنقلات بين المدن .. وتايلند كذلك بعيده شوي ، يمكن بعديين نفكر في زيارتها ، رغم اني لا أهوى شرق آسيا كثيرآ .. تركيا : سبق لي زيارتها مع الأهل ، وزوجي يقول فيها إضطرابات شوي ومايحبون العرب !!! وانا ماتحمست لها لبنان : وما أدراك مالبنان ؟؟؟ كان نفسي وأمنيتي ازورها ، بس للأسف الأوضاع الأمنيه ماتشجع أبدآ .. (المغرب الجزائر تونس) : سبق لي زيارتها ، وحبيت فقط المغرب !!! ماأدري ليش ؟؟؟ طولت عليكم إخواني بهالمقدمه الطويله العريضه لكن إستحملوني !!! حبيت أن أضعكم بالصوره معي المهم قلنا مافيه إلا حبيبتنا .. مصر أرض الكنانه أم الدنيا ,,التي لاتُمل ..
نكمل بقية صور الشقه
صوره للصاله الجانبيه
المطبخ
جانب من المطبخ
غرفة النوم الثانيه
شارع جامعة الدول العربيه من الشقه /الدور الخامس
صور دعايات افلام الموسم / امام الشقه
حديقه او إستراحه صغيره امام العماره
جانب من شارع جامعة الدول ويظهر فيه على الركن شارع البطل احمد
نكمل ماتبقى من الإجراءات الغريب إن الأستاذ إقتنع أخيراً بمصر ، وبسهوله ،، كييف ؟؟ ما أدري ؟؟ من كثر ماذكرت له عنها وعن تعدد أماكنها المناسبه للعوائل وإنها حلوه للأطفال ،، قال : علشان عين تكرم مدينه ،، علشان كتاكيتي الصغيره مستعد لإي شي يناسبهم وينبسطون فيه ،، ودايمآ على لسانهم : بابا ياللا ودينا ( مثر ) مصر ,, بابا بنركب القطار ، بابا نبغى نروح نرقص ونغني بالسفينه بالبحر ( المراكب النيليه ) .. وحاولنا نحجز : للقاهره من الرياض على الخطوط السعوديه مافيه !!! على الخطوط المصريه برضو مافيه ،، من جده بعد مافيه ،، كله فُل !!!! طيب على شرم الشيخ ( واضعينها بالخطه ) فيه،، بس إنتظار ويمكن يصير اوكي ،، الحمدلله ، قلنا إن شاء الله يتأكد .. وراح الوقت علينا وبقى أسبوع على بدء إجازة زوجي ،، والى الآن ؟؟؟ الذهاب تأكد للشرم لكن العوده إنتظار من القاهره ,, وش نسوي يارب !!! ورحنا لأكثر من مكتب سياحي ومافيه فايده كل الرحلات تقفلت ،، يقولون ليش تأخرتوا بالحجز ؟؟؟ مصر بالذات الصيف هذا زحمه مره مره ،, نشوف ونكلم عليكم ،، أعذرونا !!!! سبحان الله ،، وعلشان الله كاتبها لنا روحة مصر ، وماكتب لنا روحه ل أوروبا ( رغم اننا لاقين رحله لباريس بكل سهوله ويسر ،،، لكن !!! مثل ماقلت!! "الإنسان مُسير مو مُخير" ) أخيرآ لقيت أنا حجز عن طريق النت على موقع الخطوط السعوديه الحمد لله وقبل الرحله بإسبوع أو أقل ،، ومن بكرى قصينا التذاكر ( ماصدّقنا / نخاف بعد تضييع مننا الرحله ) وكان خط رحلتنا على النحو التالي : ( الرياض القاهره شرم الشيخ جده ) وكنا نريد بالأول المحطه الأولى شرم الشيخ ونختتم الرحله من القاهره / يعني العكس // لكن الحمدلله أننا لقينا حجز وهذا هو الأهم،، سعر التذكره : الكبير : 2335 ريال ( عن طريق موقع الخطوط كما ذكرت ) تذكرةالصغير ( الطفل ) : 1950ريال ( ماني متأكده بالضبط من تذكرة الصغير) مدة الرحله(27) يوم 16يوم القاهره 3 أيام مارينا / بورتو مارينا 1يوم إسكندريه 7 أيام شرم الشيخ الذهاب من الرياض في 14 يوليو العوده الى جده في 9 أغسطس
بسم الله نبدأ وعلى بركة الله .. وصلنا الى مطار الملك خالد الدولي بالرياض في الساعه الثانيه صباحآ من يوم السبت الموافق 14 يوليو 2007م وبدأنا بالإجراءات الروتينيه المعروفه .. ولله الحمد ، كل شئ على مايرام توجهنا الى الصاله رقم ( 23 ) يمكن والله ناسيه !!! ومن المفروض ان موعد الإقلاع الساعه 4،10صباحآ ,, ولكن كعادة الخطوط السعوديه ( الله يسامحها )تأخر موعد الإقلاع حوالي ساعه ونصف ( مدري متى بتترك عنها هالعاده الشينه ) اللي صارت صفه من صفاتها. واقلعت الطائره الساعه،، ووصلنا الى مطار القاهره الجديد الساعه صباحآ أو أكثر شوي .. ( نسيت الكاميرا في إحدى الشنطة ) وإلا كان صورت لكم من داخل الطائره وفي المطار .. سوينا إجراءات الدخول وبكل سهوله ولله الحمد .. وصرف زوجي نصف الدولارات اللي معانا الى جنيه مصري .. وكان سعر الريال السعودي = جنيه مصري أما سعر الدولار جنيه تقريبآ ( ماني مُلمه بالأسعار والتحويلات ) هذي مُهمة زوجي ( انا أخطط فقط ، وهو يدفع ) وعليه الباقي ( الله يخليه لي ) إستلمنا الشنط وخرجنا من ارض المطار ، وكان ينتظرنا واحد مصري ( معرِفه) يعرفه أخوي من العام الماضي بالقاهره ، ( وكان نعم الرفيق الحبيب ) ودانا ( 3) شقق كان مجهزهم لنا علشان نختار وحده فيهم ، الأولى بالزمالك ، والثانيه بالمهندسين ( شارع جامعة الدول العربيه ) والثالثه نسيت موقعها أظنها كانت على النيل ، وأخترنا الشقه الثانيه اللي على نفس شارع جامعة الدول العربيه تقريبآ قدام تقاطع شارع البطل أحمد عبدالعزيز مع شارع لبنان .. ماقدرنا نواصل البحث عن شقق أخرى من التعب ..ولقينا هذي مناسبه على الاقل نجربها!!! الشقه موقعها رائئئئئئئئئئئئئئئئئع وتحت العماره جميع الخدمات من مقاهي ومطاعم ومحلات متنوعه ( وهذا اللي نبيه ) من العام الماضي وانا حاطه عيني عليه .. ( كنا ساكنين العام الماضي على كورنيش العجوزه ) هذا الشارع غني عن التعريف أظنكم كلكم تعرفونه ؟؟ المهم أخذنا الشقه ب 750 جنيه باليوم لمدة17يوم ملاحظه : أسعار الشقق والفنادق والمطاعم وغيره من المزارات السياحيه هذي السنه أغلى من العام الماضي ، نظرآ لتزايد السواح هذا الصيف .. وكانت الشقه تتكون من غرفتين نوم ودورتين مياه ( أعزكم الله ) وصاله واسعه ومطبخ حلو ،، اهم شي عندي انها نظيفه ،، ومريحه للنفس .. انا عندي قناعه تامه بإن السكن هو أهم عناصر الرحله الناجحه .. واول مره نأخذ شقه في سفرنا ،، علشان معانا اطفالنا والخادمه والمده طويله شوي .. عادةً نفضل السكن بالفنادق .. وهذه بعضآ من صور الشقه ... إيش رأيكم فيها ؟؟؟ هذه طاولة الطعام اللي بالصاله ، وموقعها تطل على الشارع الصاله الرئيسيه مكتبة التلفزيون بالصاله صاله جانبيه دخلنا الشقه وحنا هلكانين وتعبانين من السفر والبحث عن شقق .. جاب لنا صديقنا الحبيب أغراض بسيطه من السوبرماركت ( ماء / عصيرات / كيك وبسكوت للصغار )
صلينا الظهر ونمنا عالطول وماقمنا إلا قبل المغرب ،، وسوينا قهوه عربيه
( أنا وزوجي مُدمنين قهوه ) وتقهوينا مع تمر ومعمول ( معنا بعض الإحتياجات ) ولبسنا وصلينا ونزلنا نتمشى بنفس شارعنا وندور على مطعم ( غداء وعشاء بنفس الوقت ) ودخلنا مطعم دار القمر القريب من الشقه ، وكان مطعم لبناني اكله حلو ونظيف بس زحمه شوي ، أكلنا فيه المقسوم وطلعنا نكمل مسيرتنا ونستكشف الشارع البديع الذي تنبض فيه الحياة ( شارع حي ليل نهار ) ماشاءالله .. وأخذنا شرائح جوال من شركة (إتصالات) من احد محلات الجوالات بالشارع .. الشريحه ب25جنيه وشحنته ب 100 جنيه ، وشريحه أخرى للخادمه وشحن ب 40 جنيه ،، ( علشان لو أطلع انا وزوجي خارج الشقه أصير أكلمها أطمئن على اطفالي ). اما زوجي فهو معمم جواله السعودي من زمان ( من أول سفره لنا مع بعض ) ولايعترف بأي شريحه ثانيه .. ودخلنا سوبر ماركت حلو وفيه كل شي بس بعيد شوي عنا ، وأخذنا منه معظم متطلباتنا اليوميه من مواد غذائيه بسيطه وأغراض أخرى للبيت .. وبعدين ذهبنا للشقه وسهرنا شوي عند التلفزيون ، وجلسنا في الصاله المكشوفه اللي ترد الروح ،، صاله كل واجهتها زجاج مباشر على الشارع الكبير .. منظر رائئئئئئئئئئئئئئئع وبديع .. ونمنا ،، قبل ما أبدأ في تفصيل يومياتنا أحب أوضح لكم الأماكن السياحيه المعروفه اللي زرتها مع الاهل العام الماضي ولا حبيت أكررها السنه هذي ، لإنها تكفي زياره للمره الواحده فقط : ]وفيه بعض الأماكن زرتها مع الاهل وكررت زيارتها لإأهميتها وجمالها .. ستعرفونها خلال تقريري .. وهناك مزارات جديده لإول مره أزورها ..
أولاً وقبل كل شي أتوجه بالشكر الجزيل والتقدير والعرفان لكل من ساهم وساعد
في إنجاح رحلتنا ( العام الماضي والصيف هذا )ومدنّا بالمعلومات المفيده والقيّمه عن
أم الدنيا مصر
كما وعدتكم احبتي بكتابة تقرير متواضع لرحلتنا إلى مصر ب ( سمر 2007 )..
مع أجمل تحياتي
أختكم
ليا لي