1. السلام عليكم,


2. عرفت بعدين ان فيه فلل احلى واحلى...


3. مزعوط ولا لا ترى الى الحين مدري؟ ههه

السلام عليكم,

جاءني اتصال من احد الاصدقاء كان في المغرب, تعال يا عبدالفتاح افندي, قلت وشلون يا رجل, عندي موعد مهم جدا بعد اسبوع , بعدها اجلس معكم لو تبي شهر, قال لا عندنا دوامات وراجعين انت احسبها في بالك.... ان ما رحت ومعك ناس تعرف في المغرب متب رايح ابد...
عاد اخوكم في الله كان مهموم شوي في الرياض .. خاطب وفسخت الخطبة و الجو حر ونص اللي اعرفهم مسافرين... ومحتاج تغيير جو..محتاج لسفر خاصة ان الرياض في الصيف لا تطاق.. :112:
قعدت افكر في المقالات اللي مكتوبة هنا, والناس المزعوطة... قلت ما هوب معقول... خلني اروح واحلل كل شي... وأدقق في كل شي عشان اعرف السر... السحر نؤمن فيه كمسلمين لكن مستحيل كل واحد راح انسحر خليك واقعي.. اعرف سر السحر الحلال سحر الطبيعة وسحر البلد
ابي اعرف سر الزعطة اللي تجي الناس.. لاني سافرت لبلدان كثيرة لكن ماحد ينزعط فيها زي المغرب.... رح وحلل الوضع يا فيلسوف زمانك واوصل لاستنتاج معين واشرحها في كلمات ان كنت رجال..
واروح بعدها بساعة لمكتب سياحة وسفر ما لقيت الا بزنس كلاس, تذكرة ب سبع آلاف وشوي... على اني اجلس خمسة أيام هناك... قلت يلا... حيروحوا من ربنا فين....
قالوا لي جب دولارات واروح للمطار قبل الرحلة و اصرف تقريبا ست آلاف دولار والف وشوي درهم مغربي... بعدين اكتشفت اني غلطان والدولارات مصيرك تحولها للمغربي... ( ما صرفتها كلها وعارف انها كثيرة على خمس أيام لكن احب احتاط دائما لدرجة اني استعمل الفيزا احيانا عشان ما اصرف الكاش )
من بكرة وانا في الطيارة اقول لنفسي, والله انك خبل... انت مستوعب انك الآن في طيارة للدار البيضاء؟ سبع ساعات وشوي؟ مسوي فيها عنتر؟
رديت و قلت لي... لا ما استوعبت... بس بتستوعب بعدين وش معجلك؟ بعدين اول مرة تسويها وتسافر كذا بشكل ارتجالي بدون تخطيط؟ ههه
أهم شي حلل كل صغيرة وكبيرة تشوفها من تعامل الناس وثقافتهم وعلاقتهم مع بعض الخ اعرف سر الزعطة
هل هي فقط عشان الفساد اللي هناك مثل ما يقول البعض؟ ولا فيها "شي ثاني" صعب شرحه مثل ما يقول البعض الآخر؟ ( كنت اميل وقتها الى مزيج من الجوابين )
رايح وفي راسي احلل سبب الزعطة اللي تصيب الناس في البلد هذه واحلل كل صغيرة وكبيرة لو واحد التفت علي حللتها ههه
وصلت هناك المطار... واللي هناك كانوا محذريني منهم... لانهم عارفين اني دائما ابخشش في السفر واعطي فلوس عشان افك عمري... قالوا ان عطيت ترى بيجيك مليون واحد والله يعينك... خاصة انك ما تعرف لهجتهم....
ولا تقول يعطيك العافية ( العافية يعني النار عندهم ) ولا تقول ولا تسوي قلت ياخوي مانيب قايل شي لين ما اوصل عند اللي اعرفهم ههه اخاف اغلط في شي...
بصراحة عربيتهم كأنها لغة ثانية .....شوي واطلب من الناس تتكلم باللغة العربية الفحصى... عاد من جد وقتها تحس انك عايش في عصر هارون الرشيد ههه ( هيا بنا الى الفندق يا فتى لنأكل بعض الشطائر ويا حبذا لو كانت بالزبدة ها ها ها ههه )
بس مرت الامور بكل سلاسة... رحت آخذ شنطتي مع العفش الجاي, وواحد جنبي مغربي شال شنطة جايبها وضرب واحد مغربي ثاني ضربة بسيطة بالغلط.... الا واخونا في الله ينفجر بالمغربي ما فهمت منه ولا كلمة ... احاول افهم عجزت.... بس وجهه كان زي كذا :112:
قلت يا حبيبي......... هذه ما يبي لها تحليل.... الرجال شوي ويذبحه على شغلة ما تستاهل...... يا غريب كن أديب... رحت بعدت عشان اشيل شنطتي بعيد عنه عشان ما اضربه بالغلط ههه
يكلمني واحد حق الشناط مدري وش قال .... وصدقوني احاول اركز لكن ما قدرت افهم.. رديت قلت نعم؟ عاد كلامه لي.. قمت احك دقني وافكر.. كأني سمعته يقول كحلاء... يعني اكيد يقصد لون من الألوان..... يعني يتكلم عن الشنطة..... وقلت له "حمراء" وطلع استنتاجي صح
واطلع ريالات سعودية معي يمكن ثمانية ريال ( ما عديتها ) واعطيه بدون ماحد يشوف خفت يتجمعون علي ووقتها من جد مانيب فاهم ولا كلمة...
انا من النوع اللي اذا سافرت ما البس زي الخليجيين ابدا ولا احب الفت الانظار.. يعني لبس حلو ومرتب وانيق لكن ما يلفت النظر... حلو بس بذوق يعني ما تلقى على جبهتي ختم فيرزاتشي مثلا مثل البعض...... فمشت كل اموري تمام... مع الجوازات والتفتيش
لقيت الشباب ( ما اعرف الا واحد منهم قبل لقاءهم هناك ) مرسلين لي سواق, ركبت معه رايح الرباط قعدت اسولف معه شوي قلت له ترى ان قلت يعطيك العافية لا تزعل ترى حبايب ههه ( شايل همها لانها دايم على لساني ههه ) المهم خذت معه كورس سريع لهجة مغربية... ووقف في الطريق عند مقهى شعبي جلست انا وياه نشرب شاهي وكملنا...
اطالع في الطريق والخضار على اليمين واليسار, والسيارات يا سيارات فخمة يا سيارات قديمة جدا ما فيه شي في النص فشعرت ان الطبقة الوسطى قليل عددها وان هناك فئتين من الناس الفئة الغنية الارستقراطية والفئة العاملة والتجار الصغار والفلاحين... ( اللي يقول عنده مزرعة في الرياض ولا شاف مزارعهم خلوه يعرف ان ما عنده مزرعة ههه )
وصلت للفيلا ديالهم ( يعني حقتهم, خلوني استعرض شوي اللي تعلمته ههه ).. اللي هم ساكنين فيها, فلة رائعة في منطقة راقية... لكن بعدين انا فهمت ان الفلل سمعتها مش ولا بد...
لكن ببراءة عشقت الفيلا اللي سكنت فيها, تقريبا الف وخمس مائة متر ( تقدير من راسي ), وتصاميم تحسسك انك عايش في عصر هارون الرشيد.. روعة.. حدائق... يعني الف ليلة وليلة من جد..... احساس ما يوصف.. لقيت الشباب نامين كلهم...

عرفت بعدين ان فيه فلل احلى واحلى...

كل شي في الفيلا جميلة ما عدا بعض الاشياء البسيطة ممكن تتعدل.. قلت بكم؟ قالوا يمكن 300 او 400 الف دولار.. للتملك... مستأجرينها بتقريبا خمس مائة دولار في اليوم ( اقل بشوي ) ... وعلى سعر الشراء, احسن بكثير من فلل الرياض صراحة.. لكن لو كانت في الرياض ماتت الحديقة من الحر والمسبح نشف وامتلأ غبار ههه
طلعنا اكلنا في المحمدية على البحر مع شباب في السفارة السعودية ما قصروا معنا... جلسة ولا اروع...
لكن قائمة الطلبات كله فالفرنسي.... واحد معنا خليناه يطلب لنا... لانه حتى كلامهم بالعربي نحتاج وقت عشان يفهمون علينا ونفهم عليهم... ماحد فينا فاهم الثاني بسرعة
رجعنا قال صاحبنا بكرة باجيب لكم اكل مغربي مطبوخ في بيت...
من بكرة لقيته مرسل اكلة مدري وش اسمها... كأنها لزانيا من برا لكن من جوا ربيان صغير وسمك...
وعلى جنب لحم يخليك تحس ان اللحم اللي تاكله في الرياض بلاستك... طباخة ماهرة اللي مسويتها لكن ما اعرف مين ههه
والشوربة حقتهم نسيت وش اسمها لكن روعة...
بعد ما مسحت الصحن وحمدت الله....طلبت من اللي معي ننتقل لمدينة اخرى قالوا نوريك كازا قلت كازا كازا... احنا ورانا حاجة؟ قالوا يا حياة ريجنسي اعتقد ولا الشيراتون نسكن فيها... سكنا في الشيراتون..
قلت خلونا نطلع ترى ما شفت شي, ودونا لمقهى اسمه الديوان.. يقولون المقهى تغير عليهم... شربنا شاهي مغربي... جلسنا يمكن 15 دقيقة وطلعنا...
بعدها قالوا بنوريك مكان حلو عرفت بعدين انه مكان عبارة عن ملهى ليلي مشهور... وعلى بلاطة ما هي من الاماكن اللي ارتاح فيها...لكن رحت جلست معهم عشان ما نفترق...
مع اني أؤمن بانه عشان تستمتع في السفر لازم تتعرف على بلد وناسها ومدنها صغيرها وكبيرها والحياة الاجتماعية كيف, وطريقة تفكيرهم كيف ونظرتهم للآخرين كيف.... وعاداتهم تقاليدهم وطبقات الناس عندهم والقوانين الخ
فاللي ما يتعرف على هالاشياء ولا يعرف غير السهرات والله انه مسكين و محروم... لكن وش تقول تجي وما تعرف شي وتتشرط؟ ههه
سبق وان قابلت بنفسي واحد عايش في بلد غربي سكنت فيه انا سنوات طويلة جدا , عاش فيها ست سنين ما يعرف عنها شيء لانه بصراحة ضايع ومساكين هالنوعية ما تعلموا شي في السفر.. حتى لغتهم ما يعرفها...
عودة للموضوع جلست معهم لان الخيار الآن الجلوس وحدي في الفندق ههه لكن على الأقل عرفت المكان ونوعية الناس اللي تروح له الخ...
اليوم الثاني قلت يلا جلست معكم امس ( ذليتهم فيها ههه ) نبي نروح لسوق شعبي باشتري ثياب مغربية والطاقية حقتهم ونعال مغربية الله يكرمكم... وواحد نفس الشي يبي يشتري لزوجته في السعودية هدايا ومثلي يبي يطلع ... ما كنت اعرفه قبل السفر بس حسيت انه فاهمني وتفكيره قريب لتفكيري
لبست الملابس حسيت اني سندباد, ما نقصني الا السجادة اللي تطير عليها.... لو لقيت السجادة سافرت عليها لاغادير لكن ما لك الا الطيارة.... ههه
طلعنا بعد ما عبينا ينزين لسواقنا ( معنا يوميا ) بفوق المائتين وخمسين ريال .. البنزين نار ( عافية ههه ) عندهم..
رحنا وفي الطريق اشوف مكان مكتوب عليه المكتبة السلفية... واشوف رجال ملتحين... وحريم منقبات زي عندنا. . لكن البشت ازرق... كادت تدمع عيني لما تشوف ناس متمسكين في دينهم بهالشكل مع أن الاستعمار ترك اثره... غصب عليك تشعر بكل احترام اتجاه هؤلاء.... لكن نسيت اسم الحي
لاحظ اننا في مدينة كبيرة, ومتأثرة جدا بالاستعمار الفرنسي.. فلما علقت قال احدهم ( اخوه متزوج من المغرب من سنوات طويلة ) ما شفت شيي رح لبعض القرى والمناطق.. تلاقي عالم ثانية, ترى كازا كبيرة وفيها انواع الناس...
بالفعل في بعض القرى والمناطق عايشين عيشة بسيطة جدا, لكن كل شي مرتب... وتلك الحياة لا تقدر بثمن على بساطتها...والشوارع على قدر كبير من النظافة..
بعدها رحت للسوبرماركت اشتري فوطة وشامبو, تجيني واحدة تقول شي.... بس مدري وشو ههه... كلامها كأنه احد يتمضمض... عرفت انها تتكلم فرنسي...
انا اعرف انجليزي بطلاقة مثل ما اعرف عربي بالضبط وعادة انا المترجم في اي مكان واي سفرة ومسوي عنتر...
فحسيت اني ابله من جد...
رديت عليها قلت Sorry, but I don't speak French. . يعني تعرفون فرنسي اعرف انجليزي زيي زيكم ههه
بعدين كلمتها بالعربي اللي نعتز فيها كلنا, عرفت اني سعودي وسهلت كلامها لي وقاعد تقول لي عن تخفيض عندهم....
اتصلت على صديق لي في الرياض, لما قلت له اني باروح للمغرب قال الله يستر بس.... قال هاه كيف المغرب؟ مثل ما يقولون؟ ( يقصد انك تعشقها بسرعة )
قلت والله بلد جميلة الى ابعد درجة.. لكن حرام ان ما عندي وقت... لكن بشكل عام من اللي اسمعه.. احس ان الكلام عنها مبالغ فيه شوي... يعني صحيح جميلة جدا البلد لكن فيه مبالغات
يمكن من جانب الناس اللي كل همهم في السفر السهرات الخ لكن واضح ان هذا ما هو كل شي....
واضح ان فيه جانب آخر وانا شفت شوي منه لكن باقي اشياء كثيرة اشوفها واتعلمها......فاللي يعرف في البلد يشوف وجه آخر غير اللي نسمعه لكن للاسف ما عندي وقت زيادة للاستكشاف....
لكن محكوم بالوقت, خمسة ايام ما تسوي شي... وايضا محكوم وبغيري لاننا مسوين فيها ديمقراطية...وقلة معلوماتي
بس على جمالها اللي شفته ما صرت مزعوط زي اللي نسمعه من البعض... يعني مهوب لهالدرجة.. بس بلد حلوة وجميلة ونادم على الاماكن الكثيرة اللي ما شفتها...
في الأخير قربت الرجعة, وانا في نفسي اروح طنجة, اغادير, فاس ومكناس و مراكش...يعني حسيت اني ما شفت شي.. والسفرة بدأت تحلو...
رحنا للمطار في الرجعة... ما ودي ارجع لكن ضروري عندي موعد مهم يوم السبت.. وموعد لا يقبل التغيير ابدا... ولا كان جلست وخليت اللي معي يرجعون... عمر الشقي بقي ما راح اضيع... الا مع كلامهم بس يالله حد واخد منها حاجة؟ ههه
( بالمناسبة كلامهم جميل جدا فلاحد يفهم من كلامي شي ثاني بالعكس امنيتي اتعلم لكنه صعب اذا ما سهلوا كلامهم لك )
وانا راكب الطيارة, اقول في نفسي والله بلد حلوة, هذا وانت ما شفت شي.. لا بد انك ترجع.. وعلى راحتك تمر كل مدينة ومعك شخص او شخصين بالكثير... وتكون تعرفهم كلهم زين.....
يعني اقل شي ثلاثة اسابيع الى شهر... وتمر اغادير وفاس وطنجة ومراكش و و و و و
لكن ما صرت مزعوط... كل اللي ابيه رحلة اخرى... وبسرعة قبل لا يبرد الحماس ههه.... خمسة ايام ما تكفي حرام.. هذه رحلة استكشافية سريعة فقط لا غير...
يوم وصلت للرياض, الاقي نفسي امدح مدح غير طبيعي في المغرب.. ووللاسف مع الاصدقاء القريبين فقط لانه حتى لو كنت "محترم" في سفرك... ماحد مصدقك وينظر لك بعين الشك الا لو كانت زوجتك معك وانا اعزب أساسا..... فما اقول لاي احد اني رحت للمغرب...
ثاني يوم امدح أكثر... واقلب فكرة السفر للمغرب مرة اخرى في راسي...
ثالث يوم بدأت اخطط لرحلة اخرى...
وان شاء الله لي عودة الى تلك البلاد قريبا جدا... ولو سمح الجدول... بعد اسبوعين ... ههه
وتفكيري الآن كله في ترتيب جدولي بحيث استطيع اسافر لها مرة اخرى لمدة ثلاثة اسابيع الى شهر... ومع شخص او اثنين اعرفهم زين ان سمحت لهم ظروفهم بالسفر في نفس الوقت اللي اخطط له

مزعوط ولا لا ترى الى الحين مدري؟ ههه

وللعلم بالنسبة للي ما غمره سافر للمغرب ....والله لا تعرفت على نساء ولا شي ( حتى رجال ما اعرف غير السواق وموظفين الفندق ههه ) ... لكن والله المغرب فيها حاجة.. غير كذا الجو العام ما ادري كيف اوصفه... لكنه مريح بشكل غريب... لكنه من النوع اللي تحس فيه اذا فقدته....
ولاحظ ان المدينتين اللي شفتها العاصمة الادارية الرباط, والعاصمة التجارية الدار البيضاء ( كازابلانكا ) يعني لا فاس ولا طنجة ولا مراكش ولا اغادير ولا مكناس ولا ولا...
وصدقوني ان هالبلد, بالمزايا والعيوب, على فلسفتي الزائدة....عجزت احللها... تجمع متناقضات... بشكل يصعب تفسيره... وبشكل يعطيها جمال عجيب.. تركت تحليلها وبدأت احلل في نفسي وش اللي صار لي ههه
ملخص التحليل ان أكبر عيب في المغرب.. انها بعيدة... ولو انها قريبة بعد رحلة اخرى "تستاهل"... ما استبعد شراء سكن دائم هناك او مزرعة... لكن الواقع يحكمك احيانا ويجب تغليب العقل...
فعلا كانت تجربة سيئة.... فالوقت لم يسمح.... مثل اللي يذوقك اكله حلوة ويسحبها منك
وبالمناسبة, اللي يقول ان المغرب ما تنفع شهر عسل... ما عنده سالفة... المغرب روعة لشهر عسل للانسان العاقل اللي عينه ما هي زايغة..... و اذا عرفت وين تروح واي وقت من السنة الخ
عندي تعليقات وملاحظات وتحليل للبيئة المغربية لو استمريت فيها الفت كتاب .....الله يستر لو رحت شهر.... فآسف على الاطالة...
وان شاء الله ان رحت مرة ثانية بيكون معي صور لكل منطقة...
والسلام عليكم