السلام عليكم ورحمة الله وبركاته ...
ولله الحمد وصلت قبل أمس الفجر للرياض من ماليزيا الرائعه ..
والله على كثر ماسمعت عنها ماتوقعتها بهالروعه وجمال الطبيعه ماشاء الله خيال ..
المشكله اني لما رجعت اشتقت لها ومدري متى ربي يكتب لنا ونشوفها مره ثانيه ..
بالنسبه للرحله بكتب لكم بالترتيب جدولنا في التمشيات والسفر .. وطبعا الفنادق وباذن الله تستفيدوا منها:::
رحلتنا الأحد2/7/2007 الساعه 12 الليل قبلها بيوم قصينا البوردنق وحركات تشرطنا بالمقاعد اول الصف وسرير طفل لبنتي وجاء وقت الرحله وللااسف لما دخلنا الطياره بعد تاخير ساعه اعطينا المضيف البوردنق وقال لنا مافيه مقاعد الحقوا بس على كراسي الطياره تغيرت وجت من جده وفيها ركاب بيروحوا معكم لماليزيا :112: ومقاعدكم محجوزه لهم ؟؟؟؟ ماصدقت .. قلت له وسرير البنت قال بعد الاقلاع ..
ونطير انا وزوجي كل واحد في جهه ندور لنا مقاعد وحصلنا ولله الحمد مقعدين وجلسنا فيهم على وعد من المضيفين بتبديل مكاننا عشان الطفله .. ومعي شنطه غيارات لبنتي واكل ورضعات كبيره شوي زوجي يفتح اماكن الشنط اللي فوقنا مليانه ، قال لنا المضيف مالها مكان بنزلها مع العفش قلت اغرااض البنت بتحتاجها وقت الرحله ضروريه قال اجل خلوها عند رجلينكم وشو ؟؟؟ ليه مادفعنا 3150 على كل واحد مثل هذولا ؟؟ وهي ناقصه ضيق عشان نضيق على رجولنا بعد !!! وعدنا انه يكلم اللي باول صف عشان قدامهم اوسع .. قال انتظروا بعد الاقلاع ..
انتظرنا حتى الاقلاع طياره الله لايوريكم ضييق وحر وواضح انها قديمه ومكسره ووسخه ..واغلبهم ماليزيين معتمرين جااين من جده ...
و طبعا بعد الاقلاع ماعاد شفنا المضيفين الرجال السعوديين والوعود تبخرت والشنطه تحت رجولنا والبنت نايمه على رجولي وشوي على رجول ابوها حسيت بقهر وودي اصيح بس وش نقول والله حالتنا كانهم مركبينا بلالالاش .. والمضيفات نفوس شينه ويالله الوحده تتكلم وتكشير !!! طلبناهم يكلمون اللي قدام نتبادل الأماكن قالوا كلموهم انتم مالنا دخل راح زوجي كلمهم ماليزي وزوجته تخيلوا زوجي يشرح له حالتنا الشنطه والبنت وضيق وهو يسمع بالأخير ماقال لا .. قال معصي ... جتني الصيحه وجلست ادعي عليهم 8ساعات وحنا معاناة الله لايجزاهم خير ...
لا وزاد الطين بله ( طاولة الأكل اللي في مقعدي مكسوره وكل ماحطوا شيء لازم امسكها واذا مر أحد طاح منها الأكل !!! قهههر .. وطول الرحله والطياره تهتز شوي يمين شوي يسار كل شوي اقول بنطيح .. مانقدر نمشي ولا نروح دورات المياه الواحد مايقدر يوقف من رجة هالطياره .. حسبي الله عليهم ...
تدرون وش القهر ؟؟؟ وحنا نحجز المقاعد كانت الطياره غير .. ويوم ركبنا قالوا غيرناها .. ولما سالنا اللي جايين معنا من جده قالوا لنا احنا من حجزنا واحنا عارفين اننا بنوقف في الرياض وان هذي طيارتنا !!!
مدري وش لون هذي اسمها خطوط ؟؟ وقسم بالله خطوط ايرآسيا انظف وأجد وروعه ونظافه وتكييف ومقاعد شيء يفتح النفس على صغرها ...
المهم وصلنا كوالالمبور .. الله على ذيك المناظر وعلى التنظيم والمطار ..
ماودي اطيل عليكم بلخص لكم الرحله والأماكن اللي رحناها ...
رحلتنا كانت ليلتين كوالالمبور .. السفر بالباص الى بينانق 4ليال .. السفر بالعباره الى لنكاوي و 3ليال
ثم الرجوع لكوالالمبور 3ليال ..
باقي الرحله باذن الله ساكمله في وقت قريب ... وماراح اطول عليكم فيه ..