قرطبة999
16-12-2022 - 12:03 pm
السلام عليكم ورحمة الله وبركاته
احي كل من في هذا الصرح الشامخ واخص من يشرفني مروره
في البداية كانت الفكرة لسفرة لبلد جميل ويقل فيه السايح العربي خاصة في الوقت الذي ناوي اذهب فيه وقت الاجازة وبالصدفة وقعت عيني على رسالة واتساب تتحدث عن جورجيا ومن يومها وانا جالس اقلبها لين توكلت على الله ونويت الذهاب انا بالحقيقة عندي استفسارات وادري بأن جلها موجود في تقارير الاخوة الافاضل لكن لضروف العمل لا استطيع دخول النت بشكل دايم فياليت احصل من اهل الخبرة اجوبة لبعض استفساراتي فلكم كل الود والاحترام.
أعضاء الرحلة انا وزوجتي وشبلي صالح الله يصلحه ست سنوات الوقت في 3 اغسطس الناقل فلاي دبي من المملكة،،،،
1-هل الوقت مناسب وكيف راح يكون الجو.
2-الخطة الزمنية كم يكفي للرحلة في بالي تبليس3 ايام باتومي 3 ايام ثم تبليس يوم او يومين قبل العوده.
3-اماكن السكن واسامي الفنادق او الشقق المفروشة ليتسنا لي حجزها من بوكينج وتكون قريبة من المطاعم والزحمة او المقاهي ولو يحصل في المنطقة الحيوية.
4-برنامج للزيارات السياحية في كل منطقة.
5-ايهم افضل اصرف دولار ولا يورو.
6-كم المصروف المتوقع وهل هي تعتبر منطقة تسوق بالنسبة للملابس من ناحية السعر والجودة.
وآسف ع الاطالة فلكم كل الحب
انا توني رجعت منها بتاريخ 20 ابريل .جلسنا بتبليسي 3ليالي وبعدها رحنا بتومي 3ليالي ورجعنا تبليسي ليلتين وكان الترتيب جيد .
بخصوص طيران فلاي دبي دايما ايطيرون على 2 بالليل فانصحك بالتالي ..منطقة الانتظار حق فلاي دبي صغيرة وفيها مطاعم فاست فود مثل كنتاكي ومكدونالدز وسب واي وكم كوفي شب تقدر تتعشى واتروح المصلى وتتمشى بالسوق الحرة . حبيت انصحك تاخذ معاك بطانية وماي لان كل شي على الطيران له سعر البطانية ب7دينار
وبخصوص السكن والسياحة بجورجيا انا اخذت بكج من مكتب سياحة جورجي حجز لي الفنادق واخذنا من المطار بالسايق وكان معانا طول الرحلة ب450 دولار للشخص صراحة كان السعر مغري والحمدلله حجز لنا فنادق في المنطقتين وكان معانا طوال الرحلة . المشكلة بجورجيا هي حاجز اللغه ومن كذا تحتاج احد يكون معاك يعرف لغتهم .الشعب الجورجي ودود بس فقير .
كانت فنادقنا ب 3نجوم .بتبليسي سكنا بفندق ميروبيلا .فندق بسيط ونظيف جدا وحديث والغرف مناسبة الحجم والنت من احسن الاشياء فية بس مشكلته ان مافية اصنصير ومافي نقل للعفش للغرف
وفي بتومي سكنا في فندق مارينا كان كمان 3نجوم لان البكج الي اخترناه مع مكتب السياحة يشمل فنادق 3نجوم .وفي حاله اختيار فنادق 4نجوم السعر ممكن يزيد حوالي 100دولار للشخص وللامانه انا تمنيت اني اخترت فنادق 4نجوم ودفعت الفرق والا اني اشيل الشنط
بخصوص التنقل من تبليسي الى بتومي عندك خيار انك تروح بالسيارة واتشوف مناطق بطريقك الى ان تصل بتومي او خيار انك تروح بالقطار الليلي تركب القطار الدرجة الاولى يمشي الساعه 10وتوصل بتومي 6ونص صباحا بسعر 25لاري للشخص القطار قديم بس الغرفه بيكون فيها 4اسره تقدر تنام او ترتاح احسن من 6ساعات او اكثر بالسيارة حتى لو نزلت وشفت مناطق على الطريق .والخيار مفتوح لك وعلى حسب احتياجك تختار . احنا جربنا القطار برحلة الذهاب من تبليسي لبتومي وبالرجوع مع الباص لشركة السياحة .بس حسيت القطار اريح .
بخصوص المناطق السياحية جورجيا مليانه مناظر طبيعية وغابات وشلالات وبحيرات وعندهم كنايس كثيير وبالغالب بيودونك عليها .اذا كنت مثلي اتمل من الكنايس قول لهم من اول السالفه احب اشوف اشياء ثانية غير الكنايس .
ولو عندك وقت وتقدر تطول ممكن تروح من بتومي برحلة ب3 ساعات بالبر الى طرابزون بتركيا وتسكن فيها كم ليلة انا ماقدرت اسويها لان رحلتي كانت ل8ليالي فقط.
اذا اتحب اتكلم مكتب التورز الي تعاملت معاه ممكن اعطيك صفحتهم وتخاطبهم .
بخصوص العملة انا اخذت دولار وكانت ال100 دولار تساوي 174 لاري
وجدول الرحلة ان شاء الله بابعثه لك سريعا