- السلام عليكم
الاعضاء الكرام
السلام عليكم
كلنا نخطط ونتعب قبل السفره ونضبط الامور ونوزن القريشات وناخذ الاجازات ونختار الفنادق والبعض يبداء يسوي رياضه وتنشيف عشان البدي المهم انه ما يجي وقت الطيارة الا وانت منهك نفسياً وجسديا .
طيب وصلنا هناك وبدينا السهر والاسفهلال والتمشي والترزز بالكافيات ولعب البلياردو والبولنج والسباحه والقليل كتابة القصايد والقصص القصيره وبدينا تعب ثاني غير التعب اللي قبل السفره وبالنهاية بغمضة عين الا انت بيوم السفر عائد للديرهوالعبره خانقتك ما تدري وش تسوي تركب الطيارة وتطل من دريشة الطيارة وتقول وداعاً مانيلا على امل اللقاء
ايه وصلت الديره وهذا محور حديثي ونلخص اش تسوي عشان تعدي مرحلة الحزن والاسى الشديدين الذي يرافق العوده من السفره الممتعه .
1- اول ما توصل تسلم ع الوالد والوالده واذا هم بعدين ماله داعي واذا انت متزوج تبوس الحرمه والعيال واذا هم بعدين ما امها داعي وتدخل غرفتك وتقفل الباب عليك وتعلق لافته ممنوع الازعاج وتحط راسك وتتخيل انك بفندقك اللي كنت فيه .
2- لما تصحى من النومه اتروشت البس واطلع الى اقرب كافي شوب يكون قريب من ستايل كافي شوب تحبه في مانيلا واطلب شاهي اخضر او كافي لاتيه واذا منت من هواة البارد اطلب هوليستن بارده
3- عيش اول ليله في موقعك هذا لا تتحرك ولا تفتح جوالك لاي اتصال لانه لو ترد عليه رايح يفتح مواجع .
4- ارجع البيت نام واصحى الصبح وعشان تدخل المود السعودي لازم تفطر فول وتميس بكذا حنا بدينا رحلة العلاج من اعراض انتهاء السفره .
5- بعد ما تفطر يا تقعد من العيله او تسحب عليهم وتروح مع اصدقائك بشرط الطلب منهم عدم فتح اي موضوع عن السفره .
6- لازم تسوي اتصال ع الفلبين لو تكلم الفندق اللي كنت ساكن فيه تسلم عليهم عامل نفسي
7- تدور ع صديق يكون من هواة الفلبين وله مده ما سافر لها وتروح تلف معه بالسيارة وتسولف معه بادق التفاصيل ووقتها تنتقل العبره منك له لانه ما سافر بكذا قطعنا نصف مشوار العلاج .
8- ترجع لغرفتك تقفل ع نفسك الباب وتفتح جوالك اكيد انك مزبن كم صورة بالجوال للايام السوداء وتعيش ذكرياتك مره ثانيه .
9- تصحى اليوم الثالث وع طول تدق على خويك اللي سولفت معه عن السفره وتقوله بمرك ومر وخذه ووره الصور وقول بعد ما تشوفه اخذفها .
اذا صاحبك قالك روح لاقرب مكتب طيران يبي يحجز للفلبين فاعرف انك شفيت وعدت المرحله بسلام
واذا رحت مع صاحبك تحجز لنفسك معه فاعرف انه مافيك طب انت مدمن حتى النخاع
ودمتم بود
تجربة من مجرب خير برهان