السلام عليكم ورحمة الله وبركاته
هذه اول مشاركة لي فالمنتدي ، بعد بحث مطول في المنتديات وجدت إن هذا
المنتدي هو الموسوعه الاولي للمسافر العربي ،،
ومحتاج مساعده ضرورية ومستعجلة تخص المالديف لاني ناوي احجز
هالايام تذاكر وفنادق وصارلي شهرين ادور ما عرفت شو الفنادق الافضل
انا دخلت معظم المواضيع في الموقع بس محتار ،
وبوجه كلامي بالخصوص للخبراء وكل اللي راح المالديف ،،
راح احط ميزانيتي و ان شاء الله كل حد عنده تخطيط يساعدني
بالنسبة للتذاكر ناوي احجز ع الاتحاد او السيلانيه الامارتية علي حسب
الرحله اللي اتوصل المالديف الصبح ع الساعة 8 او 9 تقريباً ،،
عدد الليالي 4 من تاريخ 4 / 5 الي 8 / 5
الميزانية للاربع ليالي 24 الف درهم يعني 6000 في كل ليلة ( قيمة
الفندق + الاكل + النشاطات )
مواصفات الفندق اللي أباها :
· يكون الخصوصيه فيه عاليه لان نبا ناخذ راحتنا انا والحرمة .
· تكون الفيلا شاطئية لان نبا نستانس برمال البحر ومب شرط يكون داخلها
مسبح لان يكفينا البحر ، المسبح بيكون عبء ومب محتاج له اصلاً .
· في فنادق عندها جزيرة خاصه لمدة ساعات معدوده مثل فندق W او
توصل لجزيرة نائية ومهجورة هذه ضروري أباها بس ما عرفت شو هاي
الفنادق ما ذكروها الاعضاء .
· يكون مستوي الاكل والخدمة زين مب أي كلام .
· هل احجز هاف بورد ؟ وشو المقصود بالهاف بورد غدا او عشا ؟
· هل في مجال اني اقسم الاربع ايام علي فندقين يكونو عدال بعض ؟ او
انتقل من الفيلا الشاطئية الي الفلا اللي داخل البحر مع اني لاحظت ان الفلل
اللي داخل البحر لو حد نزل للبحر ممكن حد يشوفه وهو يسبح صح كلامي؟
بالنسبة للطائرة المائية الكل مدحها بس أنا ما أبيها لان السعر وايد مبالغ
فية تقريباً 3800 درهم لشخصين فوسيلة المواصلات اللي أبيها هي البوت
أرجوكم أرجوكم أرجوكم ساعدوني لاني جداً محتار ومتأكد ما حد
بيساعدني غيركم وأبي احجز الحين قبل لا تروح الفنادق الحلوة ،
انتظر ردودكم ولا تتأخرون علي دخيلكم
ويزاكم الله خير مقدماً.