1. الحين أول سؤال ... وين نروح في العين؟؟؟؟؟؟


2. 1) جبل حفيت


3. 2) مبزرة الخضراء


4. 3- الحصون والقلاع


5. 5- البر! ... والصحراء


6. 6- الحدايق والمنتزهات:


7. 8- المولات والمطاعم


8. شو أكل مميز؟

ليش أغلب المواضيع عن دبي وبوظبي بس؟ ...احم
خلوني أعرفكم بمدينتي الجميلة جداً جداً ... (مدينة العين) ...
تعتبر مدينة العين واحة! .. وجودها في الصحراء مع كثرة أشجار النخيل
في الإمارات أغلب الناس يحبون في العين جوها وهدوءها ... هادية جداً
العين بعيدة جداً عن العمارات المرتفعة!
ومن أكثر المدن اللي راح تشوفون فيها أهل البلاد
(يعني لا تقولون سرنا دبي وكلها هنود واجانب)
بس بطبيعة دبي إنها تجارية وسياحية! تلقون فيها كل الجنسيات
وهل دبي الحلوين الجميلين أجمل شي تراهم مب منقرضين
بس ما يبينون من الزحمة ... -- الله يعينهم
المهم نرجع لحبيبتي (العين)

الحين أول سؤال ... وين نروح في العين؟؟؟؟؟؟

1) جبل حفيت

من أجمل المناظر اللي تبون تشوفونها، هو منظر مدينة العين من فوق جبل حفيت فالليل! .. منظر جميل جدا! ... تقدرون تاخذون عشاكم وتفرشون وتتعشون فوق ... او تروحون وتاخذولكم مكان وتشون ... أو بس تروحون هناك جلسة رومانسية وحبيبة وتشربون كوفي ولا تسولفون ههه المهم المكان جداً رايق ... ولكن ابتعدوا عن الويك اند خصوصا الجمعة! ... قوم خان ما يرحمون

2) مبزرة الخضراء

هنيه ترومون تستمتعون بمياه كبريتية حارة! (ناس كثير يروحون هناك عشان الأمراض الجلدية - يتودنون فالماي خ) ... ومسابح وأفلاج! ... بتحصلون استراحات ومرافق وألعاب للأطفال! .. المكان جداً ممتع ولكنه فالمناسبات الاجتماعية لا يطاق من الزحمة (مثل الأعياد وغيره) ... (مبزرة الخضراء تحت جبل حفيت مباشرةً يعني ممكن تروحون جبل حفيت وتنزلون على مبزرة تكملون يلستكم أو العكس). بعد شي قوارب وبحيرة أو نافورة فيها اسماك ممكن تأكلوهم .. وشي مثل كارتس صغيرة تركبونها وتتحرك في اليبل! ... وناسة يعني
تعرفون شي؟ .. شي شاليهات ممكن تجزونها في مبزرة .... وتستمتعون بالجو!

3- الحصون والقلاع

عاد فديت العين وحصونها وقلاعها! ... كان مقر الحكم قديما في مدينة العين! ... من القلاع:
قلعة مزيد (بداية القرن التاسع عشر) قلعة مريجب (1816) قلعة الجاهلي (1891) متحف قصر العين، يُعرف أيضاً باسم قصر الشيخ زايد (1937) قلعة المربعة (1948) الحصن الشرقي، يُعرف أيضاً باسم قلعة الشيخ سلطان بن زايد (بداية القرن العشرين) ترومون تزورون متحف قصر العين، جدا ممتع ... ويوم تخلصون تخفون صوب الجاهلي! ... وتستمتعون بالحديقة والمنظر الجميل لقلعة الجاهلي ،،، أو انكم تاخذون لكم فنيال قهوة من ستاربكس ...
4- الأفلاج:
تشتهر العين بالأفلاج! .. مثل أفلاج هيلي والصاروج! ... جداً جميلة أن الواحد يتمشى بين النخل

5- البر! ... والصحراء

عاد نقول العين يعني نقول رحلات وكشتات برية! ،،، خصوصا صوب بدع بنت سعود ،، ومنطقة الهير وغيره! ... ويوم يحل المساء تلقون على اطراف الشوارع صوب منطقة البدع كله شباب مورين ظو ويالسين! .. وفالنهار عائلات يالسين تحت الشير والغاف ومعينين من الله خير ويطبخون غداهم ولا اييبون فوالتهم العصر ويقعدون!! .... الشتى فالعين غير .... وفي وايد محلات تأجير سيارات وباجي وسوالف ثانية ... وناسة! بعد للعلم خصوصاً يوم الجو حلو ومطر البدع يندحب من كثر الشباب -- يتجمعون عشان يلعبون بالسيايير .. الله يحفظهم بس

6- الحدايق والمنتزهات:

عندكم حديقة العاب الهيلي، بتلقون فيها العاب لليهال والكبار .. وشي حديقة الطوية والجاهلي والفوعة ... حدايق عائلية مفتوحة ... وشي حديقة مريجب والبصرة فقط للنساء ... هالحدايق للتمشي .. بس لكن حديقة العاب هيلي فيها العاب واجهزة (بحط لكم عنها تقرير) ... وشي حديقة آثار الهيلي وفيها وايد من آثار ما قبل الميلاد ...

8- المولات والمطاعم

أهم أربع مولات حالياً (الجيمي مول - العين مول - واحة هيلي مول - بوادي مول) وكل هالمولات فيهم كافيات ومطاعهم اشكال وانواع! ... يعني اللي يقول وين اكل فالعين؟ اقوله سير المولات وتخير اللي تباه لول ... واذا تبون مطاعم خارجية شي:
1- المجلس
2- عالم الطعام
3- الشوكة الذهبية
4- الاتحاد (فالزعفرانة)
وفي سوق الزعفرانة سوق يعني بيعيب وايد الحريم ... فيه كنادير وشغلات جيه ... يتونسن عليه الحريمشو بعد ... خلاص تعبت .... اللي يسأل شي ... يتفضل ... وبرد عليه ... بس هذي بعض الملاحظات:

• شو الفنادق فالعين؟

1) روتانا وسط المدينة
2) روتانا هيلي
3) انتركونتننتال
4) شاليهات مبزرة
5) آيلا (4 نجوم ومكانة حلو)
6) Mercure Grand (فوق جبل حفيت - مكانه مميز جدا شوفوا الصور في بوكينغ)
7) الهيلتون (مب حلو)
8) ستي سيزن (3 نجوم )
9) شاليهات عين الفايضة (قريبة من جبل حفيت ومبزرة وحديقة الحيوانات)
0- منتجع دانات (5 نجوم وفيه اكتيفيتيز)

• أحسن وقت لزيارة المدينة؟

الشتا الشتا الشتا الشتا يعني لين شهر 2 او 3 الجو حلو وجميل
حاليا ومع نهاية اكتوبر الجو جميل جدا فالمسا ومهب حلو

• كم يوم نقعد فالعين؟

يومين او ثلاث ...

• فناتك خاصة بهل العين؟

يبالكم تجربون خبز الرقاق اللي فصناعية هيلي ههه وكرك وبراتا راشد علي ... (بس اذا تسممتوا ما يخصني فيكم شغل هنود ولكن نحبهم لول)

شو أكل مميز؟

يوم اتون العين هب تهبون فالهمبرجر ومطاعم الهنود والايطالية وجيه ... لازم تجربون خبز الرقاق بالعسل والجبن .. والخمير والمحلا .. ومحلا زايد .. والقرص المدقوق بالسح ... والبلاليط ... ترا حتى مهياوه عندنا ... وحتى سحناه عندنا ،،، وتجربون المجبوس والبرياني والمالح والعرسية واليشيد والهريس ... شو بعد؟ ... عشان تعيشون الجو ...
وحياكم في مدينتي العيناوية الجميلة
الصور من تجميعي فقط لا غير
ما امتلك ولا ادعي امتلاك اي صورة في الموضوع