ليـلك
08-12-2022 - 01:08 pm
بسم الله الرحمن الرحيم
موضوعي بسيط واتمنى يساعد كل شخص حاب يسكن
بشقق نظيفة وجديدة وواسعة .. وبالأخص العوائل
لأن بالغالب مستوى الشقق صراحة مايشجع للسكن
وبالذات مع وجود الاطفال
وطبعا مو الكل يقدر على الفنادق واسعارها الخيالية
هالشي شجعني اكتب هالتقرير عن هالشقق ’’ جوان ’’
اللي بصراحة عجبتني من كل النواحي ..
كسعر .. ونظافة .. وموقعها الحلو
صحيح ماهي مطلة على البحر بس هالشي مايهمني
يكفي اني اكون بالدمام العزيزة على قلبي ..
واول ماعطاني زوجي خبر بموعد السفر .. اول ماخطر ببالي
السكن واذا بنحصل شقق نظيفة يومها والا بنجلس نلف ونلف
كالعادة ندور على شقق ..
وخطر على بالي اختصر الوقت وادور شقق عن طريق
موقع Booking.com
بس للأسف الشقق المعروضة مره ماشجعتني
احجز فيها .. ياغالية مرره وشكلها مبين عليها
مو ذاك المستوى بالصور ..
او فنادق وطبعا سعرها مجنون مايحتاج اقول ..
جاني احباط صراحة يومها وقلت لزوجي
فقالي خلاص لاتشيلي هم لمن نوصل الدمام
اكيد بنحصل شقق الدنيا مليانه هناك..
وكان موعد سفرنا بالاسبوع الاخير من اختبارات المدارس..
انا وزوجي وولدي وبنتي .. وجلسنا أسبوع بالدمام
وايامها على حظنا كانت موجة البرد القويه
اللي اول مره نصادف هالبرد على كثر روحاتنا للدمام..
والحمدلله ماتعبنا وحصلنا الشقة وبتشوفون صور لها بالتقرير ..
بس بالأول بحط عنوان الشقة مثل ماهو موجود بالفاتورة
جوان للوحدات السكنية المفروشة
شارع الملك سعود _تقاطع شارع ابو بكر الصديق (التجاري91)
هاتف8223444_ فاكس:8225255
الشقق موجودة على شارع الملك سعود وباينة على الشارع
موقعها .. وهي جديدة لمن سكنا فيها كان لهم اسبوع بس من الافتتاح..
وكمان بنفس شارع الملك سعود .. كذا شقق سكنية جديدة بالتشطيبات
الاخيرة لها ..
وقريب من الشقق جامع اعتقد اسمة جامع النخيل ماني متأكدة صراحة
من الاسم ... وبنفس الشارع الموجود فيه الجامع محلات كثيرة ..
وصيدلية ومغسلة ملابس ومطاعم ..
وأول صورة ابحطها للشقق من برا
كنت اتمنى اصور الاستقبال بس ماقدرت دايم احصل فيه ناس واستحيت
اصور قدامهم .. بس عوضتها بصور مفصلة للشقة وهي الاهم ..
ذي الصور للصالة وموجود فيها دولاب المطبخ والثلاجة
وكل شي جديد بالشقة ونظيف جدا
الثلاجات للقهوة والشاي وفناجيل كلها جديدة .. بس ماقدرت استخدمها
وسواس النظافة ماخلاني استخدمها
الفرن الكهربائي حبيته كثير وكنت استخدمة كدفاية للصالة
البرد شديد وخفت على اولادي واستفدت من هالفرن اشغلة وياسلام
على الدفا وزوجي يقولي لو يدرون عنك وش تسوين بالفرن حقهم
مداهم يشيلونه لاتحرقيه
مايحتاج التلفزيون اهم شي والاهم كل قنوات افلام كرتون موجودة ..
هذا غير المصارعة اللي استقبلتنا الشقة فيها اول ماشغلنا التلفزيون
والباب الابيض بالصورة للحمام وانتم بكرامة ..
وعلى يمينه غرفة النوم الرئيسية .. واليسار غرفة بسريرين تصلح للأطفال
الشراشف نظيفة وكمان البطانيات .. ومع كذا ما احب استخدمها وجايبة معاي كل شي
وبعد هالصور للشقة بالكامل نوصل للجزء المهم .. سعر الشقة
ولاننا اخذناها بايام المدارس وقبل الاجازة
سعرها 250 لليوم .. واشوفها تستاهل صراحة
لان حصلنا شقق اغلى من كذا ومره حرام فيها سعرها
وشي كمان بالنسبة للأنترنت .. متوفر بالشقة وجابوا لنا المودم
ثاني يوم مع انه ماطلبناهم ..
واخيرا .. موقع الشقة جبته من قوقل ايرث
وكمان صورة للشقق من الأيباد حسيتها اوضح من قوقل ايرث
أعجيني موقعها الحيوي ... ونظافتها ... وسعرها المناسب ...
ألف شكر أختي المميزة ( ليلك ) على التقرير المميز ... والمجهود الكبير في تنزيله
وأحب أشيد كثيرا بالخرائط الموجودة بختام التقرير ... تساعد في الوصول للشقق بكل سهولة