1. بعد السلام والتحية


2. ماهو رأيك في هذا النوع من الضيافة؟


3. أكرر قلي بربك واصدقني القول

بعد السلام والتحية

بحكم إن علاقتي بمصر تمتد لأكثر من ثلاثين سنه لأن والدي درس الدراسات العليا في الأزهر في فترة السبعينات الميلادية وتملك شقه وبعدها بعد حرب الخليج اشترى فله جهة الشروق قبل العاشر من رمضان وانا ولله الحمد تملكت شقه في الشروق وعلى وشك اخذ ارض وسويها استراحه بحديقة وجمام سباحة يعني لا هي فله ما اقدر على سعرها ولا هي شقه اتضايق فيها
المهم فيه كثير من قرايبنا ومعارفنا ما نشوفهم الا في مصر وقت الاجازات وبحكم ان الوالد طول الله عمره بعد التقاعد من الجامعه اغلب وقته في مصر ومعه طبعا الوالده بعد ما زوج عياله اللي عددهم 6 بما فيهم انا
وصار كل واحد ينزل مصر اول مره يقول امر على الوجيه د. عبدالله هو يعرف مصر اكثر ويدلنا على الاماكن الزينه
ومن هنا المعاناة
1- اطلع اخذهم من المطار
2- ياغديناهم يا عشيناهم
3- واذا هم قرايب يومونون نامو عندنا اول يوم
4- اقعد الف بهم يدورون على سكن
5- تبدى الارتباطات والعزايم اللي ما لها قبله يعني نكشت مره في القناطر ومره عند البحر ومره يعزمونا بعض المصريين اللي شغالين في السعودية في مزارعهم وهكذا يعني جو جديد
السؤال

ماهو رأيك في هذا النوع من الضيافة؟

بمعنى انا نازل مصر اتمشى واستانس والا استقبل واخدم على ناس ما عندها دم
وبعدين يازينهم اهل نجد بالذات وبالذات اهل البديعه والربوه غير القرايا من القصيم وسدير وانت رايح ما يصلحلهم البحر ولا الباخره الفرعونيه ولا المطاعم المختلطه ونص الرحله خناقه بين المره وزوجها على البصبصه والعيال وين راحوا وتغطي يابنت وعدلي عباتك
لي سنتين مفتك من هالضيوف وان كان ابوي احيانا يزعل اذا ما جيت اسلم عليهم بس اخوي اللي استلم راية الضيافه بعدي قرر هذا العيد ينتحر في النيل اذا جاء احد وقلتله خل انتحارك يوم العيد ووفر علينا الضحيه والمشكله انه عريس جديد ووده يروح كم يوم شرم الشيخ وقاله ابوي ما يخالف رح بس لا تضيعنا احتمال يجينا ضيوف اللي يسمعه يقول شرم الشيخ الشارع الثاني

أكرر قلي بربك واصدقني القول

هل وقت الإجازة فيه متسع لمثل هؤلاء (بنزل مصر 00 مالك هم ابو خالد وعياله يبخصون مصر شبر شبر اتصل على ابو خالد وهو يرسل السواق والا واحد من عياله ولا تستحي ترى الوجيه بيزعل ان درى انك نزلت مصر والا مريته)
سبب سؤالي هو معاناتي انا واخواني واسرتي كما رويت لكم
ارجوا التفضل بالمشاركه وان كانت لن تغير من الامر شيء ولكن اشكر من تفهم موقفي وقدر معاناتي