من إسمي أنا من عشاق السفر لحالي وها السنة قررت اني أسافر لتركيا مع واحد تركي ( أدري انكم بتقولون يامجنون كيف وثقت فيه وأنت لحالك بسح حلاوتها بمغامرتها (طبعا هذا المثل من تأليفي)
المهم قررت أروح أنا وصديقي الأرقداش التركي من الرياض الى تركيا بالباص ( مشوار) بس أنا حبيت أسافر بالباص من باب المغامرة حتى رجعت بالخطوط التركية One way مع إنها أغلا عن الtwo way لني دفعت بالرجعة 739 ليرة يعني تقريباً2135ريال المهم ركبنا باص من شركة نور ووصلنا لمنفذ الحديثة ( بعد ماضيع الباص بحايل ورحنا من طريق مختصر جديد بس خطير وأنا الوحيد السعودي بالباص ومتوهق كل ماجيت أعلم السواق عن اللوحات اللي بالطريق مايسمع كلامي ويروح من طريق خطا لن اللوحات بالعربي وهو مايفهم وقامو الأتراك اللي بالباص يشترون كراتين بيبسي وسألت خويي ليش قال البيبسي غالي بالأردن ونادر بسوريا وغالي بتركيا وفعلاً البيبسي بتركيا ب3.5ريال ) المهم دخلنا الحدود الأردنية ثم طلب مننا سواق الباص شراء علب دخان ويوم سألت خويي ليش قال علشان نمشي أمورنا مع الجوازات والجمارك السورية ودخلنا سوريا بدون تفتيش
أنطاكية المهم بعد يوم ونص بالطريق وصلنا منفذ باب الهوى بسوريا و دفعت 20 دولار بالحدود التركية ودخلنا أنطاكية وأصر خويي أنه يسكني ببيته هناك ونمت عنده ليلتين وأنا منحرج من أهله وخططت أني أنحاش وأروح فندق بس بيت صاحبنا فوق جبل وبعيد عن الداون تاون ومنطقة الفنادق وأنا ما أعرف شي هناك يعني بالعربي توهقت وصرت زي الخاتم بيده بس الصراحة رحمت خويي يوم شفت أمه وأخوانة يصيحون ويصارخون يوم شافوه ويحبون يدينه ورجولة والله موقف مؤثر حتى أنا دمعت
المهم تمشيت أنا وخويي بأنطاكية وكان الجو مشمس بس الهوا بارد مع رطوبه يعني زي المكيف الصحراوي سبحان الله ....... بس أنا ماأعجبتني أنطاكية لين رحت لمنطقة حربيات وشفت الشلالات وسحر الطبيعه وأكلنا بمطعم هناك بمكان مرتفع يطل على الشلالات وأكله روعة وبحط لكم صورته بعدين .
وفي اليوم الثاني بأنطاكية تمشينا بالسوق والله يعين على الزحمة والحر والريحه وأكلنا بمطعم عليه زحمة إسمه ماكدونيز وضحكت يوم قريت أسمه قلت بيقلدون مكدونالدز بس يوم أكلت أكلهم أنهبلت وطلع المطعم فايف ستار وكل السواح الأجانب يجون هناك وأكله غير مكدونالدز كله أنواع السندوتشات والأطباق و هناك أكلت الشاورما التركية الأصلية الأورجنال أول مرة ......
وفي صباح اليوم الثالث وهو اليوم اللي مشينا فيه من أنطاكية لمنطقة بولو رحنا للسوق ثاني مرة وشريت نظارة ب52ليرة مع اني ادري انها تقليد وغالي عليها هاالسعر أضطريت أني أشتريها لن الشمس أعمتني ونسيت نظاراتي الاصلية بالرياض ورحنا للحديقة العامة بأنطاكية وشربنا شاهي ماينشرب وتكسرت رجليني من المشي وخويي مسوي شديد كل ماقلتله نجلس يقول لي لا ياكسلان المهم مرينا حلاق وحلقت دقن بس ب5ليرات يعني 14.5ريال سعودي تقريبا وطلع الحلاق كان يشتغل بالسعودية بجدة ويعرف عربي (يعني خويي في هذه اللحظات طلع ماله فايده ههه )وحط لي كل أنواع الكريمات والكلونيا اللي عنده وفرك وجهي لين طلع قزازه ( قولوا نعيماً وما شاء الله) المهم رحنا لشركة HAS وهي أكبر وأفخم وأغلى شركة نقل جماعي بتركيا كل باصاتها2006-2007 لن القوانين التركية ماتسمح بخدمة الباص أكثر من3سنوات يعني لاتستغربون أذا لقيتو الباصات بتركيا أفخم وأنظف من الباصات بالرياض وبعد ماحجزنا من الشركة الى منطقة بولو-أبانت ركبت الباص وتفاجئت إن الباص فية خدمة 5نجوم ويوزعون مشروبات غازية وماء وقهوه ومكسرات وكيك طول الطريق وبعد فيه بالباص تواليت وأنتم بكرامة وشاشات تعرض أفلام وقدام كل كرسي سماعه ممكن تشبكها بالكرسي اللي قدامك وتستمتع بالموسيقى التركيه وكالعادة انا السعودي الوحيد بالباص والباقي اتراك*اتراك وكلهم يدرون أني أجنبي
أعذروني على رداءة الأسلوب بس ترقبو الحلقة الجاية يوم وصلت بولو ولحق وراي الكلب حق الجيش