السلام عليكم ورحمة الله وبركاته
أود أن أشكر كل من ساهم في ارشاد اخوانه السياح في هذا المنتدى وان الله يجزاهم بالخير
أمس فندق فلامنقو في بينانغ كل ماجيت اطلع من الفندق وحصلت التكاسي واقفه أمام الفندق او عند الشارع وسألتهم عن قيمة أقرب مشوار مايكلمونك الا من عشرة رنقت و15 رنقت والمشوار لو انت نشيط وصلته على رجلك
لكن أحد الاعضاء جزاه الله خير ارشدني وقالي ان امام الفندق كبينه انتظار للباصات توديك أي مكان في بينانغ ب2 رنقت وفعلا لما طلعت من الفندق حصلت امامي كبينه انتظار باصات تدخل البلد وفي الجهة الثانية عند الاشارة كبينة انتظار تروح لشاطي فرنجي بيتش والسوق الليلي وغيره وفعلا ركبت انا وزوجتي وطفلي وخذوا علي 1,40 للشخص الواحد والطفل ببلاش يعني طلع مشواري بالباص من فندق فلامنقو انا وعيالي ب 2 رنقت و80 سنت ( هلله ) يابلاش لا والباص لما تركبة ثلجه ماشاء الله من قوة التكييف ونظيف وكراسيه على مستوى.
بس فيه ملاحظة قبل ماتركب الباص خل معاك صرف رنقات لأن لو تعطيه 5 رنقت أو عشرة رنقت مايصرف لك ويحسب المشوار بقيمة الخمسة والعشرة رنقت لأنه يتحجج بأنه لا يوجد صرف رنقات.
طبعا أي مشوار في بالك تبيه يوديك له ولما تجي للمكان اللي انت تبيه قوله يوقف ويوقف مو شرط انه يوقف في محطة الانتظار.
هذا ما وددت أن أنبه عنه بالنسشبة للمواصلات في بينانغ ركوب الباص افضل بكثير من ركوب التكاسي الاستغلاليين.
ملاحظة أخيرة لسكان فندق فلامنقو والفنادق المجاورة الباص أخر حد له الساعة 11,30 دقيقة وبعدها خلاص يوقف المشاوير
يعني اللي يروح للسوق الليلي ويتعشى بالمطاعم هناك ويبي يرجع بالباص يبكر قبل الساعة 11,30
وسلامتكم