1. 6-الفيزه قيمتها 25 دولار لشخص الواحد.


2. اخيرا نصيحة مجربه من واحد شمالي صدره وسعه على الاخير ولله الحمد.

السلام عليكم ورحمة الله وبركاته:
اسعد الله صباحكم اخواني واخواتي بكل خير. من مكتبي المتواضع اقدم لكم بعض التنبهات المكرره اللي ان شاء الله راح تنفعاكم كثير وخصوصا اخواني المسافرين اول مره لندونيسيا:
1- شراء العزبه من السعوديه افضل لان اسعار المعلبات والاجبان وغيره هناك غاليه كثيره.
2-صرف الفلوس من السعوديه افضل ومن وجهة نظري تحويل المبلغ من ريال الى دولار.
3-تذكر دائما الوزن في المطار. ولا تتجاوز الحد المسموح به.اما اذا كنتم اكثر من اثنين فقسموا الوزن الى كراتين . في السعوديه راح يفزعون لكم بس في اندونيسيا انسى.
4-جدد جوازك قبل السفر اذا كان باقي فيه ستة شهور. لان نظام اندونيسيا يرفض الجوازات اللي اقل من ستة اشهر.
5-قم تعبئة كرت الزياره باالطائره لتجنب الزحمه في مطار اندونيسيا.

6-الفيزه قيمتها 25 دولار لشخص الواحد.

7-بعد تختيم جوازك راح يرجع لك الموظف نصف كرت الزياره "الكرت لونه ابيض".انتبه لا تحذفه احتفظ فيه لانهم راح يطلبونه منك عند المغادره. اذا فقدته راح يدفعونك مبلغ 300 الف روبيه.
8-ترى موظف المطار هناك غالبا راح يعقدونك كله عشان ياخذون بخشيش. فانتبه من حركاتهم انهم يطلبون منك تفتح العزبه ويسلونك مثل عن بعض الاغراض ليش جايبها مثل الرز. راح يطلبون منك ام تنزل الرز او تدفع بخشيش. فانت في هذي اللحظه خلك ذيب قلهم انك جاي سياحه وانك جايب 10 او 15 كيلو رز عشان تاكل ما هو عشان تاجر فيه. واذا اصروا خلك ذيب بعد واطلب منهم ورقه رسميه عند الدفع. وصدقني راح يماطلون فيك ويرفضون لان ما عندهم قانون يقول خذ من السائح فلوس على اغراضه وعزبته. واذا صار لك مشكله دائما هددهم بسفاره. ترى يخافون لان سفارتنا هناك ولله الحمد قويه.
9-اصرف في المطار دولارتك الى روبيه عند احسن محل يعطيك اعلى سعر.انتبه لا تصرف الدولارات كلها. اصرف حق يومين فقط يعني قربت 100 دولار او 200 دولار.
10-حاول انك لا تستخدم بطاقتك الائتمانيه او بطاقة بنك الصراف عشان ما يخذون عليك فرق العمله مع الخدمه.
11-بنسبه لتاكسي فهي متوفره باالمطار. لا تستعجل خذ اقل سعر لتوصيل. واهم شي اساله هل سيارته كبيره اذا كان عندك اغراض كثيره او كان عددكم كبير.
12-يوجد مكاتب في المطار لحجز الغرف او الشقق مثل "مكتب كاها" عند بوابة الخروج من المطار وقريب من الصرافيين.
13-بعد ما تريح في الشقه او في الغرفه المغرب.خذلك تكسي وروح على مجمع الاتوريوم في الدور الرابع او الخامس يوجد صرافيين اذا كنت ترغب في الصرافه. وتذكر دائما لا تحاول تصرف دولاراتك كلها .اصرف على قد احتياجك فقط.لان فلوسهم كثيره.
14- بنسبه على التاكسي في جاكرتا. لازم تطلب منهم يشغلون العدد لان المشاوير هناك قريبه وليست بعيده. يعني مشاويرك راح تترواح ما بين 27 الف روبيه الى 55 الف روبيه. وتذكر ايضا ان العداد راح يحسب عليك اذا خليت التكسي ينتظرك عند محل او مجمع. فا الافضل اذا كنت بطول انك تحاسبه وتمشيه.وبعد ما تخلص تاخذ غيره.
15-تذكر ايضا انك لا تصفط دولارتك لان قيمتها راح تقل.وهذي فرصة الصرافيين عشان ينزلون سعر الصرف.
16-اذا كنت تريد ان تاكل في مطاعم عربيه.فتذكر شارع رادين صالح.وايضا يوجد هناك مكتب كاها في مطعم اميره. مع اني افضل انك تاكل من العزبه اللي انت جايبه معاك من السعوديه. ترى الكبسات هناك حلوه.
17-اذا كنت ترغب في الذهاب الى الجبل. فخذ التاكسي من جاكرتا الى الجبل ولكن اشترط عليه انه ما يخليك الا لما تحصل لك فيلا. ترى انا في عطية التاكسي تقريبا 400 الف من الجبل الى جاكرتا. لا وافتريت تقريبا 3 ساعات على ما حصلت لي على فيلا. بعد ما توصل رح اشتر لك تيس صغير يحبه قلبك وكنت اخذه ب250 الف روبيه ومزمز عليه مع الجو الطبيعي.
18-انا افضل الخصوصيه في الجبل. يعني احب اسكن في فيله خاصه لها بوابه ومدخل خاص فيها. ولا افضل المجمعات لانه مكشوفه على بعضه. وغالبا تكون فيها مظاهر الدعاره واضحه بعض الشي من قبل بعض شبابنا هدائهم الله.
19-لا تاخذ تكسي بااليوم لانه سوف ترهقك بدفع. خذ التكسي على قد مشوارك. يعني اذا انت رايح تتمشى مثلا لسفاري. فراح يكون السعر تقريبا 250 الف روبيه فمعناها انه راح يوديك وينتظرك بعد.
20-دائما في الجبل او غيره لا تحاسب سواق التكسي على طول عشان ما تشين اخلاقه عليك.بلا انتظر لما ترجع الى الفيلا. باالعاده السواق ياخذك ويوديك الى اقرب محطه عشان يعبي بنزين فيطلب منك الحساب انت عاد عطه 100 الف روبيه فقط. وبقية الحساب لما ترجع الى الفيلا.
21-بنسبه الى الصرف فيوجد صرافين كثير عند البقاله السعوديه في الجبل. تذكر انك لا تصرف الا عند اللي يعطيك افضل سعر.
22- نصيحتي اذا كنت ما اعندك مشوار خارج الفيلا. قل لشغاله تدق لك على الصرافيين المتجولين امثال "عبدالقادر رجل طويل نحيف ملتحي وفيه سمر اشوي" وسعره دائما اقل من السوق ب5000 روبيه فقط.فهو سوف يوفر عليك اجرة التكسي او الدباب.
23-بنسبه لشغاله: فاانا في عز زحمة صيف 2008 كنت اعطيها 80 الف روبيه في اليوم. لكن في المواسم العاديه لاتعطيه اكثر من 50 الف روبيه في اليوم. وصدقني راح تحصل اقل.وعليه انها تسويلك الفطور والغداء والغشاء وتنظف لكم الفيلا وايضا تغسل ملابسكم.
24-تذكر دائما انك اذا تركت بوابة الفيلا مفتوحه فمعناتها انك تقول للبائعات والمتجولات والبائعين تفضلوا حياكم الله يعني راح يعرضون عليك بضاعاتهم لتشتري مثل "العود,ملابس اطفال ونساء,كريمات,ادويه جنسيه,ادوية عظام روماتيزم,العاب اطفال,احذيه,ساعات رجاليه ونسائيه,تحف,وغيره...".
وايضا راح يجيك بنات الليل والمتسولين وغيرهم. فاانتبه على جولاتك وفلوسك وجوازك.
25-نصيحتي لك لا تشتري من البائعه المتجولين على الفيلل. لان اسعارهم غاليه جدا. وراح تتاكد من كلامي لما تروح جاكرتا.
26-ايضا دائما قفل باب غرفتك باالمفتاح. ولا تفتحاه الا عند التنظيف وبعدها قم على طول قفل الشبابيك والباب باالمفتاح. للحفاظ على اموالك وجوازك من السرقه.
27- لاتنسى تسجل جوازك اذا جيت تستاجر الفيلا عند شخص اسمه "عبدالقادر".هو راح يجيك الفيلا بطلب من الحارس.
28-لا تستخدم شريحتك السعوديه هناك.لان اسعار شركة الاتصالات غاليه هناك. اشتر شريحه اندونيسيه مثل اندوسات وغيرها. ولتخفيظ ضع هذا الرقم قبل طلب الرقم اللذي تريده 10106 "مثال 10106966505033333".
29-اذا رجعت الى جاكرتا فتذكر انه يوجد سوق رخيص هناك اسمه اي تي سي. والله عليك بساعات رويلكس المقلده.ترى انا اخذه على 140 الف دائما.
30-تذكر انك قبل لا تغادر هذا البلد بيومين او اكثر تاكد حجزك. لا تقول انا تذكرة المغادره حقتي اوكيه. ترى يجحدونك شركة الطيران هناك زي سلموا عليكم. فاانتبه واحرص انك تاكد تذكرة الرجعه ولا يروح عليك الموعد. اذا كنت في جاكرتا فانصحك في مكتب كاها اللي في مطعم اميره في شارع رادين صالح. واذا كنت في الجبل ففيه كذا مكتب عند البقاله السعوديه. تعطيه تقريبه 40 الف روبيه وضبطون لك الامور. اهم شي انك تاكد حجزك.
31-تذكر دائما ان فيزة دخول هذا البلد 30 يوم فقط "يعني شهر واحد" فاانتبه انك تمدد اكثر ترى راح تدخل في متاهات كثيره. منها انك راح تنحط على البلك لست "يعني راح يمنعونك من دخول هذا البلد مره ثانيه" حتى لو عطيتهم بخشيش او حتى لو جاك واحد من الموظفين وقالك ادفع شي بسيط وانا اسنع امورك. فتراه يضحك عليك وراح يحط الفلوس في جيبه وانت رايح يحطك على بلك لست. فانتبه وخذ منه ورقه رسميه باالمبلغ.
32-اذا مددة اكثر من شهر اقامتك هناك. فاانت مجبور تدفع عن كل يوم تاخير 25 دولار. فاالله يعينك.
33-لو لا سمح الله صار لك شي او لا احد اصحابك مثل مرض. وذهبت الى المستشفى قالوا لك عمليه مثل زايده او مراره اوغيره. فانتبه انك توافق وتسويها عندهم ترى مستشفياتهم واطبائهم رايحين فيها. اذا اشتد عليك التعب. كل ما عليك هو انك تتصل على سفارتنا وتبلغهم وهم رايح يطلبون منك انك تتوجه الى مستشفى هم يتعاملون معاه.وراح يتبعون حالتك بعد.
34-تذكر ان الله يراقبك في السر والعلانيه. فا اجتنب المحرمات. وتذكر ان هذا البلد اصبح يشار اليه باالبنان عندما يتحدث الناس عن الايدز والامراض الجنسيه . فااتقي الله.
30-ايضا تذكر ان اهل هذه البلد فقراء.فحاول انك تتصدق بمبلغ بيط مثل 5000 الف او 10000 روبيه اوغيره. وتذكر ان الصدقه تطفى غضب الرب. وتبعد الكوارث والبلاء عنك بامر الله.
35-تذكر ايضا ان هذا الشعب يحب المكاسر . يعني اذا اشتريت سلعه او ركبت تكسي فكاسر على ربع السعر اللي عطاك. وصدقني انه راح يحلف ويزعل بس لما يشوفك مصر على سعرك راح يعطيك السلعه على طول.يعني اذا قالك 100 الف روبيه وكبتها لك على اللاالحاسبه فانت على طول قله لا وقله 25 الف روبيه . وخل نفسك طويل وتذكر انك ماوراك شي يعني لو تقعد معا الى بكرا. وصدقني في الاخير راح توصل لسعر المطلوب اللي يرضيك.

اخيرا نصيحة مجربه من واحد شمالي صدره وسعه على الاخير ولله الحمد.

لا تتعاملون الا مع الاندونيسين فقط. ابعدوا عن الجنسيات الاخرى ولا تتعاملون معاهم والله لو حطو لكم الشمس بكف والقمر بكف. وتذكروا بعد دائما انكم دافعين قيمة تذكره غاليه وتسع ساعات متواصله باالجو عشان تستانسون وتريحون اعصابكم. يعني ابعد عن المغثه بمعنى اخرى. لا تحاول انك تعطي وجه لا احد هناك. وخصوصا غير اهل البلد.
اسف على الاطاله. واللي عنده زياده على هذه التنبيهات فلا يبخل علينا خصوصا الشباب اللي راحوا الى باندونق وبالي وسوربايا وغيرها....
واخيرا لا تنسونا من داعائكم وتفريرتكم الحلوه.