السلام عليكم ورحمة الله وبركاته
انا يا جماعه جايبلكم استفسارات مهمه ومعلومات مهمه عن رحلتي
وحابب تعطوني رايكم وتجاوبوني على استفساراتي
اول شي انا كنت ناوي اسافر على ايطاليا واجلس فيها 9 ايام وبعدين سويسرا واجلس فيها 9 ايام
يعني الذهاب كنت مخطط يكون على روما والعودة من جنيف
المهم وماحصلت رحلات ابدا على روما في الايام اللي ابغى السفر فيها
فاطريت اعكس خط السير واخلي ( جده _ جنيف _ روما _ جده )
وموعد الذهاب 11 _ ابريل _ 2011
وموعد العوده 30 _ ابريل _ 2011
وحجزت واكدت الحجز واشتريت التذاكر على الخطوط السعودية
واللي شجعني سعر التذكرة بصراحه كان خيالي
وكان سعر التذكره لشخصين ( 3900 ) ريال سعودي
بصراحه سعر حسدوني كتير عليه
وبسببه وقعت في مشكلة كبيرة جدا وحاب استفسر عنها منكم
انه اكتشفت ان الاسبلينج لاسمي الاول في الحجز يختلف عن الاسبلينج لاسمي الاول في جواز السفر
وعلشان اوضحلكم اكتر
اسمي في الحجز والتذكره ( raeed ) واسمي في جواز السفر ( raid )
طبعا بالنسبة للقب مافي اختلافات
طبعا رحت الخطوط وحاولت اعدل الاسم لكن للاسف مافي طريقة اعدل فيها الاسم
لان التذكرة اللي اشتريتها سعرها تشجيعي ومخفض جدا ومن شروطها ماتقدر تعدل اي تعديل على الحجز مهما كان
وبصراحه من كتر القهر بغيت ابكي
ههه
المهم حاولت معاهم بشتى الطرق مافي امل ابدا
وفي اكتر من موظف قالي عادي ممكن يمشوك
طبعا بالنسبة لمطار جده ان شاء الله مافي مشكلة لان اخويا يشتغل بنفس المطار
ومطار جنيف مافي مشكلة لاني راح اوصل على هناك فما اظن انه مهم يطلعوا على التذكرة ويطابقوها بالجواز
لكن المشكلة اللي خايف منها في مطار روما
ما ادري هل موضوع زي دا ممكن يعدي ولا ماراح يعدي
وايش ممكن تكون العواقب
مع العلم انه اكتر من موظف في الخطوط قلي عادي ممكن يمشوك ولا يدققو
المهم دا موضوع الحجز والتذاكر واتمنى تفيدني فيه
وفي موضوع تاني :
وهو موضوع الفيزا
انا رحت عن طريق مكتب الطيار وسالته عن الفيزا وقال انه الفيزا اللي يصدرها فيزا فرنسية شبنجن
وسالته هل الفيزا دي تدخلي سويسرا وايطاليا قالي ايوة
مع العلم انه وجهة السفر الاولى راح تكون على جنيف فهل هناك مشكلة ولا عادي ؟؟
يعني بالعربي هل علشانها فرنسية لازم انزل اول شي بفرنسا وبعدين اتنقل بكيفي ولا عادي اقدر انزل في اي مكان ؟؟
وكانت تكلفة الفيزا لشخصين 1600 ريال
وآسف على الاطاله
لكن مالي بعد الله غيركم
وانا في انتظار ردودكم يا غاليين
تحياتي