السلام عليكم ورحمة الله وبركاته
احب امسي على اعضاء هالمنتدى بالخير كل ابوهم من اولهم الى آخرهم المهم :_
انا ان شاء الله رايح للهند في تاريخ 1962008 م 1561428ه يعني بعد 3 اسابيع تقريبا
طبعا رحلة السير من الرياض ____ دلهي . وانا رجال ما قد رحت للهند طبعاً الغرض وهو العلاج وحاب استفسر عن عدة شغلات مهمة لكل مسافر وياليت تردون باسرع وقت :_
1 وشلون ادبر سكن هل احجز من الانترنت او اروح على عماها ( لان وقت وصولي للهند بتكون في نص الاختبارات يعني ممكن مافي زحمة )
2 اول ما اوصل هل ابلقى مترجمين يتكلمون عربي لاني ما اعرف اتكلم انجليزي يااله حدي امشي نفسي بس .
3 هل المترجمين يعرفون المستشفيات هناك وراح يفيدوني .وتقريبا بكم يوميتهم عشان مايلعبون علي .
4 وش المدن الزينة اللي بجنب دلهي قريبة يعني ممكن نروح لها (لانه ما ابغى نبعد لان اخاف من مواعيد المستشفى )بالعربي نبي منطقة فيها خضار وانهار وشلالات عشان يبسط الوالد .
5الوالد على عربية فهل هناك اشكالية من ناحية التنقل ( لاني خايف يقولون زحمة غير طبيعية )
6اذا احد يعرف مستشفى للعيون مشهور لا يبخل علينا .
7هل يحتاج استأجر مترجم مع سائق او يكفي التكاسي.
واخيرا ومعليش على الاطالة لاكن تعرفون لو اني رايح لحالي يمكن اخارج نفسي لاكن مع الوالد وهو معاق يعني وش اصالي ووش اخلي .
واذا احد يعرف مترجم ممتاز في دلهي امين ومجرب ويعرف المنطقة يرسل لي بياناته لي على الخاص .
والله يعطيكم الف الف عافية على المساعدة