السلام عليكم ورحمة الله وبركاته ...
حبيت افيدكم واقولكم راي في الفنادق الي سكناها صيف 2007 ..
تمت حجوزاتنا عبر مكتب سياحي في اسطانبول .. ماعدا اول فندق عرفناه بالصدفه .. والحمدلله الله يسر لنا ..
وحجز لنا الفنادق بسعر ممتاز ..
.
.
.
بحط تقييم للفنادق .. الدرجه من 10
.
.
.
بالنسبه لاسطانبول ..
فندق رويال ...
(( هذا النكبه .. حجزناه عبر مكتب سياحي في الدوله ))
يوجد في منطقة لي لي ...
اعطيه صفر من 10 ..
لعدة اسباب :
فندق قديم جدا .. بعيد عن وسط المدينه .. معامله زفته .. مكيافاته ماتشتغل في اغلب الغرف .. فطور جبن ومربى واتكل على الله ..
غرف صيقة جدا .. ياله كفتنا انا وزوجي والشنط ..
اغلب سكانه انجليز وافارقه .. وينظرون للمرأة المتحجبه و المنقبه بنظره غريبه ..
ومافيه خدمة انترنيت واير ليس الا باللوبي مجاني
++ كان هذا الفندق صدمه بالنسبه لنا .. لأننا دفعنا فيه 700 درهم لليله الوحده ..
وهو حتى لو قالولي اسكن فيه ببلاش والله ماسكنته ++
وعلى فكره لقينا فيه 3 عوائل سعوديه وكويتية وقالو نفس ملاحظتنا وماقدرو يكملون في الفندق وطلعو ..
.
.
.
يلوا
فندق مرمرة .. اعطيه 8 من 10 ..
الفندق نظيف جدا .. وغرف لاباس بها .. واثاثه جديد فيه مكيف .. مطل على البحر .. يقع مقابل فندق ايلجنس
اللي لاحظته انه خالي من النزلاء .. مع اننا سكناه شهر 8 .. ماكان في الفندق الا احنا وعائله ساكنه بالطابق الاول ...
المطعم .. اكله بسيط ومتواضع .. بس صراحه خدومين ...واول ماوصلنا .. حطو لنا كراسي برا وجابو لنا دجاج مشوي ...
عيبه ..
بعيد عن وسط المدينه .. يحرمك الاستمتاع في يلوا الى اخر الليل ..ومافيه انترنيت .
++ لو زرت يلوا ما بختاره .. برغم انه فندق رائع .. لكن بعد المسافه .. عائق كبير ++
.
.
.
بورصه
فندق اناطوليا ..
اعطيه 5 من 10 ..
الفندق نظيف واثاثه اوكي .. لكن انواع الازعاج .. كل العرب فيه .. ومن غير الديسكو في نص الفندق ..
وهاتك يا موسيقى واغاني وهز ياوز ..
المكيف تعبان متنا حر:112: ، ويمنعون تدخل معك الاكل .. طبعا بالتهريب كل شي يمشي
ماعجبني بصراحه .. فيه الا الفطور وموقعه حلو بعد .. بس مستحيل اسكن فيه مره ثانيه ...
.
.
.
طرابزون ..
فندق فوندا
اعطيه 9 من 10
فندق راقي ونظيف تعاملهم زين مع العرب .. وفطورهم حلو .. موقع الفندق بعد حلو قريب من المطاعم ..
واثاثه مودرن ونظيف .. المكيف بارد >> اهم شي عندي المكيف ماقدر انام بدونه
عيبه الوحيد .. الحمام مافيه شطاف ..
.
.
.
اوزنجول
سكنا في بانسيون اكسيونس ..
اعطيه 7 من 10 ..
البانسيون موقعه ممتاز .. مقابل البحيره بجانب المسجد ... وعنده البقاله و كوفي نت ..
يعتبر ممتاز بالنسبه لفنادق هذي المنطقه ..
بس عيبه الوحيد .. انه مافيه مكيف .. مع ان الجو معتدل بالليل .. وعيبه بعد انك اول ما تفتح باب البلكونه يهل عليك البعوض من كل صوب ..
(( هذا العيب مش عيب الفندق .. عيب المنطقه لنها بحيره وشجر ووجود الحشرات امر طبيعي ))
.
.
.
متشكا
فندق سوميلا ..
يعتبر افضل فندق في متشكا ..
اعطيه 9 من 10
فندق حلو ونظيف .. اثاثه جيد .. والانترنيت مجاني في الغرفه واير ليس .. الغرفه واسعه ..
وقريب من المحلات ..
.
.
.
ايدر
بنسيون ليوا
اعطيه 7 من 10
ممتاز بالنسبه لبنسيونات هذه المنطقه .. مقابل الشلال ... والخضره ..
فطورهم عادي .. لازم قبل لاتدخل الغرفه تحط النعال الله يكرمكم برا في صناديق مخصصه لها في كل طابق
وعيب المنطقه انه تكثر فيها الحشرات يعني الواحد مايقدر يستمتع بجو ايدر البارد خاصه فالليل .. ولايقدر يفتح الدرايش ..
وعيب الفندق انه مافيه مكيف لنه المنطقه اصلا بارده ..
انا اشوف ان ايدر اصلا ماتستحق المبيت فيها ..مافيها الاشلال وجبال خضرا
وهالمنظر مألوف في الشمال التركي ..
الشي الوحيد الي يشفع لها الجو البارد ..
.
.
.
اخيرا .. في طريق العوده ..
اسطانبول
فندق كوناك
اعطيه 8 من 10
فندق لابأس فيه مب فخم وايد ولكنه نظيف .. اغلب سكانه خليجين .. فطورهم حلو .. وموقعه ممتاز قريب من ماكدونالز وبيتزا هت
الواير ليس فيه مجاني بالغرف .. وفيه بار صغير بالغرفه فيه بويلر ماي .. وعدة للشاي والمشروبات الساخنه
عيبه ان الحمام مافيه شطاف ..
++ ملاحظه ++ الغرفه الي سكناها كان المكيف فيها بارد .. بس فالرسبشن كانت هناك عائله كويتية تطلب تغيير الغرفه لنه المكيف حار ++
.
.
.
اتمنى قدرت افيدكم بما عندي
ورحله موفقه للجميع الي بيسافر هالسنه .. يجيب لي معاه صحن اسكندر كباب وكثرو السمنه فوقه