دولتشي بوتيك هو مزيج رائع بين المنتج المتميز وفن التصميم الداخلي ، أما إذا تحدثنا عن المنتج المتميز فسيحتار الزائر للوهلة الأولى فيما يختار فيوجد العديد من الأصناف التي قد يراها لأول مرة مثل التوست (البْرِد) بالنكهات المختلفة والمتميزة ،وكذلك الفطاير والكيك بطعمه الرائع وبتصاميمه الملفته ،والكثير من المنتجات التي روعي فيها أدق التفاصيل سواء من ناحية الطعم أو الشكل.
أما التصميم الداخلي فلقد روعي فيه توظيف الألوان بشكل مريح للنفس والعين ووظفت داخليا لتتراكب وتتمازج مع كل قطعة في صالة العرض.
هذي مقدمة محل دولتشي في صفحتهم الرسمية في فيس بوك أما تقريري عن المحل بعد زيارتي الخاصة لهم وكانت بالفعل زيارة مميزة وحسيت اني مو متعود على هذا النمط الراقي من الاماكن وبصراحة كانت عندهم شغلات حلوة وغير العادة
راح احصر بعض المنتجات الي جربتها
اول ما ابدأ بالكيك عندهم مختلف عن باقي المحلات طعمه ولا أروع وشكله خيالي يمكن يكون سعره غالي شوي بس يستاهل وأكيد ارخص من المحلات في الخبر والرياض
والترافلز أول مره اعرفها عندهم وهي شوكولاته دائرية وتجي بحشوات كثير حلوة للتقديم في المناسبات والعزايم وبعد الميني كب كيك بعد حركة حلوة للي يبون يتميزون وهي كب كيك بس تجي حجم صغير.
وأخيرا حصلت احد يبيع ماكرون وبصراحة ألذ من الي أكلته عند لادوري في دبي سعر الحبة عند دولتشي تطلع تقريبا 3.5 ريال اما عند لادوري في دبي يبيع الحبة 11 ريال
عندهم الفطاير عجيبة وهي منتج غير المعجنات تبع المناسبات ،الفطاير تجي حجمين كبير تصلح حق فطور أو حتى عشى خفيف وحشواتها وعجينتها خيال
أما أكثر شي شدني في المحل هو البريد حقهم ....مو طبيعي اول مرة اشوف بريد بالجبن منه وفيه يعني لا تتعب نفسك وتدهن البريده بالجبن بس افتح الكيس واكل على طول وفيه نكهات كثير مثل النوتيلا والتمر بالقرفة وزبدة الفول السوداني بالعسل وفيه حشوات غير بس ما اذكرها ونصيحة ألي يبي يجربها يروح بكير لأنها تخلص بسرعة.
والحلو في المحل أنهم مخصصين قسم للمناسبات والتقديمات عبارة عن قسمين القسم الأول تمريات وموالح والمعجنات
أنا جربت عندهم المعجنات وهي نوعين معجنات سبيشال يعني مميزة ومعجنات عادية والنوعين طريقة شغلهم فيها غير الموجود في السوق وحشواتها حلوة كثير.
والقسم الثاني متخصص بالشوكولاته وبصراحة الشوكولاته عندهم كلمة رائعة قليلة عليها
وما أنسى قسم الشاي أخذت شاي من عندهم غريب لأنه الشاي في الملعقة نفسها يعني افتح المغلف وحط الشاي في الماي المغلي وبس وتطلع النكهة من الملعقة آو العود نفسها جربت نكهة وحده بس وهي الشاي الأحمر وعجبتني احلى من اللبتون بكثير.
سألتهم عن استعدادهم لتلبية المناسبات والحفلات بالشرقية والرياض قالوا أنهم على أتم استعداد وعندهم خدمة التوصيل
موقعهم : المنطقة الشرقية – الاحساء - الهفوف
طريق الخليج (خط قطر) مقابل الإدارة العامة للتربية والتعليم بنين قبل محطة البنزين وبعد صيدلية