هلا فيك وحياك اختي كويتيه ذووق
بدايه جميله ,,,, واكيد بنستمتع بما تكتبين
اسعد بأن اكون اول متابعيك
وعساج على القوه

قايدعنادك
حياك الله اخ قايد
اسعدني وجوودك.

اليوم الاول
السفر كان على الاماراتية للطيران وطبعا مواعيدهم ممتازة.
سفرتنا كانت ثالث يوم عيد الفطر الساعة 10،20 مساء بتوقيت الكويت.
تم التوجه الى المطار الساعة 7 ونص لان بلغونا ان المطار زحمة. وفعلا كان زحمة وخلصنا اجراءاتنا وحطينا سيارتنا بالمدى الطويل كلفتنا 42 دينار دفعناها عند الرجوع اليوم ينحسب دينارين.
صعدنا الطيارة وطرنا بعد التوكل على الله ووصلنا دبي الساعة 1 ونص صباحا بتوقيت دبي. ترانزيت ساعتين ونص.
المطار ممتع والتسوق فيه متعه ولقيت في المطار شبكة انترنت كانت عند احد البوابات. ما ادري اذا كانت تبع المطار او شبكة مفتوحة لاحد الاشخاص بس حظي كان حلو وشبكت فيها.
طرنا من دبي الساعة 4 صباحا متوجهين الى فرانكفورت.
ايجابيات الطيران بليل ولان بعطلنا وتونا مخلصين رمضان ومتعودين ع السهر فكان حلو وقت الطيارة لان الكل نايم خصوصا الاطفال وهدوء الطيارة.
مقاعدنا كانت ثلاثة جدام وثلاث وراهم حجزنا مقاعدنا بالنت وما توقعنا انه صحيح بس ماشاء الله على طيران الامارات مريح حييل.
وصلنا فرانكفورت الساعة 8 ونص بتوقيتهم واستلمنا السيارة وكان اجراءاتها سهلة ما تعبتنا.
طلعنا من المطار الساعة 11. من شروط فندقنا بفرانكفورت انا نستلم الغرفة الساعة 3 وهذا يعتبر من غلطاتنا. لان طول هالوقت واحنا نفتر بالشوارع وعيالي نايميين بالسيارة وزوجي تعبان من الطيارة. تغدينا بماكدونلز قريب من فندقنا.
استلمنا غرفتنا في فندق Micador Appartementhaus.
في منطقة اسمها نيدرنهاوين. مكتوب جذي في بوكينج.
الفندق: الغرف واسعه. بعيد عن السنتر. بمنطقة هادية. غير مكيف. جدامه قعدة حلووة. قريب منه ماكدونلز 2 كيلو. الانترنت باللوبي فقط. الفندق صغير واعتقد انه ينقسم الى قسمين.
التكييف ماكان ضروري لان الجو كان حلوو وبليل صار بارد نسبيا. المواقف مجانيه.
النظافة اعطيه 10/8
اعتقد هالفندق فيه اكثر من واحد بفرانكفورت لان بنفس الوقت اللي سكنا في فندقنا اخوي كان مسافر مع ربعه وساكن بنفس اسم الفندق بفرانكفورت بس مو نفس منطقتنا.
اذا بتسألون ممكن اسكن فيه مرة ثانيه بقولكم ايه حلو الفندق مافيه شي هادي.
بقولكم شغلة بما ان السكن حق ليلة وحدة انا كنت مجهزة جنطه صغيرة فيها ملابس حقنا كلنا تكفينا لليلة مع بعض الاغراض اللي نحتاجها. وشوية اكل اخذتهم معاي من الكويت باستثناء السوائل. اخذت فطاير وشبس وككاوات وحلويات.
صار فيني موقف اول ماوصلنا الفندق ولدي كان يلعب وانا قاعدة ارتب اغراضي وتوني مريحيين الا حافة الطاولة شقت راس ولدي وقام يصب دم غزيير. بس انا عندي فكره عن الاسعافات الاولية وكان وقتها تعبانين بالحيل. والشق اللي براس ولدي محتاج خياط. طلبت من الفندق اسعافات اولية بس للاسف ماعندهم فاضطريت انزل جنطتي من السيارة فيها عدتي. عقمت الجرح وحطيت كريم للجروح ولفيت راسه بشاش وشربته ادول وخليته ينام. والحمد لله صحى يوم ثاني مافيه شي بس غيرت الشاش.
طولت عليكم باليوم الاول. انتظروني اجهز اليوم الثاني.

الحمد لله على السلامه
ومنتظرين التكمله ان شاء الله

الحمد لله عالسلامه وما عليه شر ولدج
ليش ما كلمتوا الفندق قبل عشان اذا في مجال دخول مبكر ؟!!
متابعين معاج

شكرا لك
بس التكلفه عاليه ام نصيب الطيران هو الاوفر منها والتسوق
ماشاءالله علي قلبك كيف طاوعك ولا وديتي الطفل للمستشفي
وحمدلله علي سلامته

سلامت الولد ,,,, مايشوف شر
متابع معج بارك الله فيج

الله سلم ولدكم
متابعين التقرير وفعلآ مثل ماقال الأخ فيصل التكلفة عالية
نتمنى التفاصيل