1. ثم اتجهنا الى الشوتينج للشباب

نبتدي معاكم مشوار الرحلات والمغامرات
طبعاً رحلاتها كلها كانت بروحنا بدون القروبات ( بصراحه وايد احسن واريح ) ، إلي نختار المكان إلي نبي نروح له ، نشوف البروشرات ونبلغ ليدرنا ( اسمها فيكي حدها طيبه وحبوبه ) .
رحلة اليوم الأول ، كان خط سير الرحله كالآتي :

• رحلة سفاري الفيله
• رحلة سباق السيارات
• رحلة الشوتينج ( المسدسات )
• البوتينج بيتش للغداء
• رحلة الفانتاسيا ( فانتسي وورلد )

أولا : رحلة الفيله ، وأخليكم مع الصور هي تتحدث عن نفسها .
ثم اتجهنا الى سباق السيارات ، نسيت اسمه
انا طبعاً ركبت بس للاسف ما صورت الكاميرا كانت معاي في الجنطه .

ثم اتجهنا الى الشوتينج للشباب

بعد هالمشاوير رحنا شارع البوتينج بيتش للغداء ( تغدينا في ماكدونالدز ) ، وهو شارع مقابل البحر وكله محلات ومطاعم واكشاك ، يعني شارع حيوي ، وطبعاً الشاطئ متروس من الذبايح إلي قاعده تصلخ روحها ، اقصد قاعدين يتشمسون
وبعدها انطلقنا الى آخر مكان في هاليوم ( مكان قمه في الابداع والتفكير ) ، وهو عباره عن مكان يتم عرض لرقصاتهم الشعبية مع حركات الليزر وابداعات والله مادري شلون اوصفه ( للاسف المكان ممنوع التصوير فيه
) .
وخارج المسرح فيه اقسام مختلفه لصناعتهم اليدويه واكشاك لبيع البضائع المختلفه من ملابس والعاب واكسسوارات ومطاعم . بس بصراحه المكان قمه في الروعه .
هذا المسرح إلي يسوون فيه العروض
وهذي الصور بعد خروجنا من العرض
وبعد هالرحله الممتعه رجعنا الفندق وارتحنا ونستعد لليوم الثاني ولأحلى رحلات رحنالها .
انتظروني ...

1. بعدها انطلقنا الى مكان ممتع آخر وهو البقيات او ما يسمى A T V

رحلة اليوم الثاني في بوكيت :
خط سير الرحله :

• المعبد + القرود
• الرافتينج Discovery Rafting
• A T V ( البقيات او الدباب ) بس رحلة غير شكل
• الشلال
• باتينج بيتش للغداء

مثل ما انتوا شايفين خط سير الرحله مليان وممتع ، ومسافة الطريق كانت لمدة ساعتين ، لأن هالأماكن كلها خارج جزيرة بوكيت .
المكان الأول وهو المعبد وجبل للقرده تقدرين تأكلينهم الموز او اي اكل ثاني ( في اكشاك مخصصه لبيع اكل القرود ) .
وبعدها دخلنا معبدهم وفيها البوذا نايم ( الحمد لله والشكر ياخذ قيلوله الظاهر ) .
أخليكم مع الصور
في هذي الصوره احنا مأجرين سيكل عشان مشاوير الجمعية ، وفي مثل هذه الرحلات نطلع من الفندق واحنا لابسين المايوه الاسلامي ، فكنا في قمة الهلاقه
( بس انا لابسه قميص فوقه عشان أرقع السالفه ) ، بس اكتشفنا ان الكل في بوكيت بنفس المستوى ، يعني ماكو كشخه ومكياج .
وهذي الصور داخل المعبد
وبعد هالمشوار انتقلنا الى امتع رحله رحت لها في حياتي وهي الرافتينج ، وهو عباره عن الطراد المطاطي داخل امواج وصخر النهر .
ما قدرت اصور لأن الكاميرا بالسيفتي بوكس ومافي مجال أصلاً أصور ، فلقيت لكم صور من عمي قوقل .
وهني بعد ما خلصنا واستمتعنا ، وزعوا علينا الأناناس والرقي والماي والقهوه ، وفي الصوره معانا الليدر فيكي مالت رحلاتنا .

بعدها انطلقنا الى مكان ممتع آخر وهو البقيات او ما يسمى A T V

ونفس الشي ما قدرت اصور لأن الكاميرا مو معاي ، وبصراحه انا كنت اتصور ان الرحله عاديه وما فيها شي ، بس يوم ركبنا البقيات ومشينا كانت الرحله من نوع آخر يعني كنا نركب على الصخر ونطب بالماي ونركب فوق صعدات ونزلات ، يعني حده وناسه ، وإلي زاد الوناسه أن كان المطر ينزل علينا بغزاره . واو
وبعد هالمشوار رجعنا واخذنا اغراضنا وركبونا مثل وانيت وانطلقنا إلى الشلال ، طبيعه ما بعدها طبيعه ، وتسبحنا بالماي البارد .
وبعد هالرحله الممتعه رجعنا الى داخل بوكيت ورحنا باتينج بيتش للغداء والعشاء لأن ميتين من الجوع ، وطبعاً قعدنا بالمايوهات عادي خلك طبيعي خ .
تغدينا في مطعم ايطالي Pizza Company
ورحنا للفندق خذينا شور ونمنا مثل المقتولين من التعب .
انتظروني مع اليوم الثالث ...

بداية رائعة ومشوقة واصلى متابعين معاج
تقبلى تحياتى أختج الفلاسية ( أم جمال )

تقرير رائع اختى ماشاء الله سفره حلوه الله يهنيكم والحمدلله عالسلامة

الحمدلله علي السلامة يا اختي اتمني انج توفقتي بالرحلة
وبداية طيبة وقوية وانا متابع معاج للنهاية
ويعطيج الف عافية وتسلم الايادي علي هالتقرير والصور
اخوكم :- عبدالله الكويتي - خبير تايلند

احس حدكم استانستوفي انتظار الباقي

الفلاسية
اي الحمد لله وايد استانسنا لأن في اشياء اول مره انجربها ، والقادم احلى

اكمل معاكم تقريري لليوم الثالث
وخصصنا هاليوم للشوبينج ( غلطة ما تتكرر مره ثانية ان شالله ان نتسوق في بوكيت ) لأن بوكيت للرحلات والمغامرات احلى .

• آوت ليت ( بريميوم )
• مول بوتينج بيتش ( ما اعرف اسمه )

رحنا الآوت ليت ( الطريق لمدة نص ساعه ) بس للاسف ما توقعته يكون جذيه ، سوق عادي جداً جداً وما فيه إلا محلاتهم وصناعتهم ، وعدد قليل من محلات الرياضه المعروفه .
يعني مافيه محلات الماركات العالميه مثل ما تعودنا بالآوت ليت .

وبعدها اتجنا الى البوتينج بيتش وفيه مول كبير تمشينا فيه ولقينا محلات بالدور الأرضي لتنظيف البشره ، ومن حسن حظنا احدى المحلات عندهم مكان يصلح لنا نحن المحجبات ، يعني سراير وعليها ستاير ، وبعد ما خذينا موعد لأن المكان كان زحمه رحنا تغدينا في مطعم ايطالي بنفس المجمع وبعدها رجعنا وسوينا تنظيف بشره ، ( بس ما سوينا إلا لما تأكدنا ان إلي يسوون لنا حريم مو جنوس ) واكثر شي موجود في تايلاند الجنوس الله يقطعهم .

وبعدها تمشينا شويه بالمول وما عجبنا شي ، يعني جداً عادي ، وحسافه ضاع يومنا على الفاضي .
وانتهى يومنا الثالث

اليوم الرابع رجعنا حق رحلاتنا ومغامراتنا .
اخترنا كالعاده الأماكن إلي نبي نزورها ، وهالمره دور الرحلات البحريه .
خط سير الرحله كالتالي :

• الكهف
• جزيرة جيمس بوند
• A T V بس نوع آخر عن الأولي
• بوتينج بيتش كالعاده للغداء

انطلقنا في الصباح وبعد طريق تقريباً ساعه ونص ركبنا المركب الطويل وكنا بروحنا كالعاده ، واتجهنا الى الكهف عن طريق الطراد المطاطي الصغير . اليكم الصور عن الرحله
وبعدها انتقلنا الى جزيرة جيمس بوند ( الجزيره إلي صور فيها الفنان جيمس بوند فيلمه وسميت هالجزيره باسمه ) .
وهالجزيره ما فيها سباحه ولكن مخصصه للتصوير وعرض مجموعه من المشغولات اليدويه .
شرايكم في هاللقطه
وبآخر صوره نكون ودعنا جزيرة جيمس بوند .
وتوجهنا إلى مكان مخصص للبقيات ولرحلة A T V بس مو مثل الأولى ، هذا أخطر وأصعب والصخر أكبر والحفر أكبر ، والله انها تخرع ، وماكو فايده هم جربناها عشان ما نتحسّف .
خلصنا وانكتب لنا عمر جديد خ وملابسنا كلها تراب وغبار ، رحنا الفندق وغسلنا وبدلنا ملابسنا ورحنا للبوتينج بيتش للغداء .
وفي هالمره تغدينا في مطعم سي فوود اسمه رويال مارد ( اظن جذيه ) وهو تابع لفندق موجود امام شاطئ البوتينج بيتش .
بصراحه المطعم كان رخيص ( غير المتوفع ) الاستكوزا الصغيره طلعت علينا ب 3 دنانير وطلبنا ربيان وقباقب .
والصور تشهد شكثر كان الأكل لذيذ واحنا في قمة الجوع .
وبعدها تمشينا على البحر ( فرصه ماكو ناس تتشمس ) .
وما نستغني عن الأكله المقرره اليوميه بعد العشاء ( كريب الكاكاو مع الموز ) يم يم يم يم
عصير تايم
Mony Time
ورجعنا للفندق وخلصنا اليوم الرابع .
انتظروني قريباً جداً مع آخر يوم لنا في بوكيت .