زيارة سريعة لقطر
الجزء الأول
من فترة و أنا أدور لي خوي يروح وياي قطر ... كان هدفي أزور بعض أصدقاء الدراسة في أمريكا و كذلك أشوف التطور اللي حصل في قطر من بعد اخر زيارة و اللي كانت سنة 2002 ...
أخيرا احد الأصدقاء اقتنع يوم الاربعاء و كان الاتفاق على انه السفر يكون في الويكند ... يعني عندي ليلة أضبط فيها الحجوزات !!!!!
الحجوزات
دخلت بوابة قطر و اشكركم على كل المعلومات اللي موجودة هنيه و مشاركتي هاذي رد لجميلكم و لتعم الاستفادة على الجميع ..
نصيحة ما اقدر ااخرها ... احجز قبل لا تسافر قطر بفترة طويلة لانه كل الفنادق مليانه ..
مهرجانات و بطولات ما تخلص في قطر .. في وقت زيارتي كان مهرجان الدوحة الثقافي و بعد كان بطولة الدراجات موتر جي بي ..
اتصلت على .. فورسيزون - ريتز - ريدجز - الانتر - الشيراتون - ماريوت
ها الفنادق كلها ما حصلت فيها حجز .. ولما سألت عن اسعار بعضهم 2000 ريال وفوق
بعدها كان مصير الرحلة الالغاء ... حتى كان الانقاذ من فندق و ابراج موفنبيك ..
اتصلت عليهم و حصلت غرفة ب 1450 شاملة الضرايب .. بس لما حجزت اخذ اسمي و بس ..
انا شكيت في الموضوع . قلت خلني ادخل على موقعهم دخلت خصلت غرف موجودة بسعر 1250 شاملة الضرايب .. قلت اجرب احجز معهم اونلاين بس ما عندي فيزا .. بس فيزا الكترون ..
جرب ياعمي و احط لهم الرقم و يمشي الحجز ووصلني رقم تأكيد الحجز على الايميل ..
يعني اللي يبغي يسكن عندهم يحجز من الموقع اسعاره اقل ..
انطلاق الرحلة
مكان انطلاق الرحلة : أبوظبي
تاريح الانطلاق : 6 - 3- 2008
وقت الانطلاق : 11:30 صباحا
المسافة الى مركز حدود الغويفات : 350 كم حط في بالك 3 ساعات .. و عن السرعة
اجراءات مركز الغويفات و مركز البطحاء كانت سريعة جدا لانه ما صادفنا زحمه .. التأمين لمدة اسبوع .
السفر كان باستخدام بطاقة الهوية الجديدة و دخلنابها السعودية و قطر ..
بعد مركز البطحاء أول محطة بترول ساسكو أستراحة .. و بترول و ياعيني على الاسعار .. الله يديمها عليكم
و يصبرنا على الاسعار عندنا .. بس اكل المطعم ما عجبني مع انه له ذكريات قديمة في كل سفراتي لازم
امر عليه ..
المسافة من البطحاء الى مركز سلوى 150 كم .. (المسافات شوي تقريبية مش بالضبط !)
بعد الاجراءات هنيه و في مركز بوسمرة كانت سريعة ..
الخروج من مركز بوسمرة الساعة 4:15 بتوقيت الامارات .. 3:15 بتوقيت قطر ..
اللوحة على الشارع تقول الدوحة 90 كم ... يعني أقل من ساعة (المنطق)
الواقع ... التحويلات كانت من بوسمرة الى تقاطع الصناعية الجسر الجديد يعني تقريبا كل الطريق الى
الدوحة تحويلات .. الحذر الحذر لانه فيه تحويلات خطرة وشفنا حادث على الطريق .. الحذر بعد من الرادارات
الكثيرة على ها الطريق و في كل قطر ..
أقولكم بس كتابة .. انتظر ردودكم عشان نكمل بقية التقرير
اقول للاعضاء اللي ينتظرون صور يعذروني .. ما ركزت على التصوير بس بعد فيه صور لكم في الجزء القادم