اول مره اكتب تقرير عن قطر .. ومن 2003 مارحت لها . لكن اصريت اكتب التقرير الغير مصور لأني شفت ان الدوحة تستاهل .
كان السفر يوم الأحد 7 مارس والطيران على القطرية .. طبعا طيران الخمس نجوم الالتزام بالمواعيد والطائرات الجديدة.
وصلت قطر الساعه 11 الظهر وأجرت لي سياره من المطار واتجهت الي منطقة الابراج حسب ماعرفت ان هذا اسمها وفعلا فيها ابراج اشكال والوان.
السكن كان في فندق موفنبيك تاور والحجز كان موقع بوكينق. الفندق ممتاز جدا (خصوصا الدور 23 والمنظر الرائع)
الفندق ممتاز جدا بس يعيبة وجود اخوانا ال(دارفوريين) في جميع انحاء الفندق وحسب كلام الاستقبال انهم موجوديين لغاية 25 مارس. والسبب ان عاجبهم القعدة لأن مشكلتهم خلصت ووقعوا بس عجبهم القعده وكانوا بالشيراتون والحين بموفنبيك حسب كلام صديق قطري والدفع على حساب الدولة.
صراحة اهل قطر معروفين بالكرم.. ماخلوني افر (من غدا الي عشى) فماطلعت الا يوم واحد يوم الأثنين من الساعه 6 الي الساعه 12 بالليل اخذني صديق يمشيني بقطر وزرت سوق واقف هالسوق اللي اتذكر قبل كان قديم. ولكن مع التجديد وبالأحتفاظ بالطراز المعماري القديم طلع شي خيال لدرجة ان الوقت يروح وانت ماتحس فيه قعدنا خمس ساعات بدون لانحس .. لدرجة ان من شدة اعجابي فيه بعد ماطلعت من الفندق وقبل الذهاب للمطار قررت احسب لي توقف ساعتين امر اتمشى فية.
ورحت صوب مشروع المطار الجديد وفندق شرق ..
ومن كثر الأماكن والخيارات اللي اسمع عنها مايكفي ان اقعد 4 ايام بقطر.. اعتقد شوية.
سمعت في مجمع فيلاجيو. ومشروع اللؤلوؤة او المارينا؟ شي جذي .
وانا قررت انشالله ان لي زيارة بنفس هالوقت العام المقبل ان شاء الله. وبزيد من عدد الايام لأن عجبني الجو.
مشالله شعب راقي ويحترم القوانين(المرورية) .
طبعا مايحتاج نمدح بأهل قطر .. اهلي .
بس ملاحظة ان مافي سوبرماركت تالي الليل.. طلعت من الديوانية وانا بأتجاه الفندق بغيت سوبرماركت .. مافي. كان الوقت الساعه 12 تقريبا.
الاحظ وجود فنادق تتسابق في البناء لتفتح في قطر(لاحظت الهيلتون وماريوت كورتيارد). وهذا يدل على ان قطرتتجه الي افضل مما عليه الان.. ممايدل على سرعة التغيير بالبلد والتطور . (ماتلحق الا وتشوف شي جديد).
وغير هذا مافي اي ملاحظات غير الشغلات الزينه بقطر وبأهلها.
الله يحفظكم ويحفظ بلدكم وعمار ياقطر.